La esfoyaza

Profecía

2012-03-02T14:35:00.003+01:00

Profecía del principiu. Arriba la quietú baxo'l sudu de la lluz, tres la llamarga de los espeyos, sol sollutu de los caminos onde naide nun pasa.

Puntu corpuscular del presente, encruciyada onde afonden los raigaños de les entrugues que somos, tamién ehí espera la converxencia del futuru.

Alcordanza del morrer, solombra del pretéritu que m'emburria hasta l'abismu. Tres el vacíu, tampoco quedo yo.

Ehí queden

2012-02-14T22:39:00.002+01:00

¿Qué xirigoncies de cuerpos esnudos baxen pelos cadriles de la memoria? ¿Cuántu silenciu atropen los llabios en cada besu? Ehí queden estes entrugues, pa los mordiatos de l'alborada y la lluz de los adientros.

¿Hasta ónde llega'l diente col que mos mordigaña la nueche? La carne que llevantes ¿estroza la lluz?, ¿come solombra?, ¿arrinca espaciu pal amor? Ehí queden estes entrugues que nada dicen y too responden.

parllamentu, el

2012-02-10T21:51:00.003+01:00

parllamentu, el: sust. Conceyu [formáu polos diputaos d’un país, que componen la institución cimera del poder llexislativu culpable de producir llamentos]. 2 Edificiu [onde s’aconceyen los diputaos del poder llexislativu d’un país pa tomar decisiones llamentables] (Nel parllamentu decidieron recortar drechos a la xente trabayador y la xente llaméntalo).

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

Pegavos la patada

2012-02-03T14:18:00.003+01:00

Lladronen paz y quietú a los probes. Amburando la paciencia infinita de la xente, esboliguen les sos pallabres pel filu l'insultu. Ehí tán, ehí agarren más de lo qu'atropar pueden les sos manes. Sinvergüences del capital, timócrates afuracando entá más la resignación en mio casa.

¡Timócrates d’esta era, usurpadores de la semántica, combayones del capital, temblái! Nun tais namás quedando como la gocha, sinón tamién col culu al aire. Asina ye más cenciello pegavos la patada.

Palíndromos

2012-01-11T14:43:00.004+01:00

Desdicir ye la manera de tornar al pasáu, dicir del revés lo antedicho, revirar les pallabres pa cuspiles del revés. Desfacer lo mentao, volver pisando nes mesmes buelgues que dexó cada pallabra.

Palíndromos de la política, zorramplos del desdichu. Esa ye la nuestra desdicha.

¿Y qué importa?

2011-12-24T13:58:00.002+01:00

¿Y qué importa qu'un paisanu muerra güei?, ¿ónde les sos pallabres tamién muertes descansen?, ¿xunto al borde de qué vacíu circula agora la so voz?, ¿pa ónde la solombra de la so figura, güérfana humedá que s'evapora?, ¿quién cartografiar podrá otra vuelta'l so andar pesao de brazu mancu?, ¿la so sabencia tres qué bardial quedó atapecida?, ¿y qué importa yá esto y tolo mundano?

A mi m'importa. Yera'l mio güelu.

republicar

2011-12-16T00:39:00.004+01:00

republicar: v. tr. Volver facer públicu [un secretu, un llibru]. 2. Volver facer qu'un Estáu recueya como sistema de gobiernu la República (Muncha xente quier republicar España).

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

Perfil

2011-12-14T01:09:00.004+01:00

Fondigonáu na poza más fonda, más p'abaxo del reversu de la solombra, embaxo la rindición y el vergoñosu pesu del silenciu. Ehí ta'l xacíu, ehí la esperanza mordigañada pol perfil d'esta democracia.

Los sinvergonzones nun comen carne de sinvergonzones. Ye lo que pasa nos sos comederos. Baxo les sos buelgues tamos, pisaos como colilles.

Escomencipiar

2011-12-11T02:50:00.002+01:00

Escomencipiar depués de venir d'allá alantrones, d'au naide miraba. Agora, allongar la vista, acolumbrar tanta sienda, toles buelgues onde entá pesa la mio solombra. Too eso ye parte de mio casa.

Entamo otra vuelta, con otra cara, otru perfil claváu nel rostru. Soi'l que se mira nel espeyu, el que llegó en marchando. Esi mesmu pensatible que fala muncho pa dicir lo mesmo de siempre.

Amirándonos l'embeligru

2011-09-22T14:30:00.000+02:00

Un güelpe d'impotencia apuerta como vafu apegao nes gafes. Nada vemos. Entós siguimos amirándonos les ñarres y los deos qu'apalpen cercanía.

Lloñe, la llocura sema cuelmes nos corazones. ¿D'ónde vien esti rescamplíu que mos ciega?, ¿quién unvía esti vapor condensao qu'empaña los ventanos?

Siguimos amirándonos l'embeligru. Otros yá nun pueden.

Despexái la equis

2011-09-12T22:40:00.000+02:00

Tienen mieu, la medrana entró-yos de sópitu, apaecío a un calafríu qu'esboliga como un escalagüerzu pel llombu. Los paries nun tienen xusticia, namás estos plizquiños de gociu que van quedar pa prau (¡pero cómo presten mientres duren!).

Per otra parte, pa lleer periódicos hai que saber mátemátiques. Regla de tres: si a lo que yo llamo bon xacíu ellos lo llamen austeridá, a lo que yo llamo despilfarru ellos lo llamen equis.

El 67

2011-07-22T00:07:00.000+02:00

El 67 ye un númberu enteru, natural, impar y primu según les matemátiques. A partir de güei ye, arriendes d'ello, un númberu vergoñosu. Bienllegaos al conxuntu de los númberos vergoñosos. Años d'escaezu social y sistema políticu enfermizu glayaron al altu la lleva ¡eureka! Sinvergüences son los creadores de la criatura.

A partir d'agora nun me llaméis escolín cuando estudie matemátiques. Llamáime indignáu. Nel próximu esame enfótome en sacar nun diez.

llinguarru, -a, -o

2011-07-07T19:28:00.009+02:00

llinguarru, -a, -o: ax. Que ye malfaláu, que diz pallabres malsonantes. 2. ax. Descaráu, sinvergüenza, n'especial en política (Fernando Lastra ye'l más llinguarru de la FSA).

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

Caminos

2011-07-07T19:28:00.001+02:00

Pel camín a lo vieyo, ehí xarabaten duldes y cavilgos pensatibles. Munches bredes enforma emprunes dexamos atrás. Tamién la memoria ye pindia. Otres siendes son buelgues na nieve, xelaos espacios que callen hasta morrer.

Nun se respeten nin los sacros caminos. L'ecu de la distancia finca los caniles nos nuestros pasos. Dacuando apetez parase y pensar que tas en casa.

indignación, la

2011-06-28T22:09:00.001+02:00

indignación, la: sust. Población, conxuntu de persones indignaes [que comparte unes mesmes carauterístiques sociales, históriques, económiques, relixoses, culturales, llingüístiques que puen tener reflexu n’instituciones polítiques propies].

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

Siguir vivu

2011-06-24T02:47:00.000+02:00

Equí tuvieron les alcordances solombriegues de la muerte. Nesta pasera que naide crucia dalguién anubre les buelgues de la distancia.

Too apodrez ensin remielgos. Nos güeyos portes la llave de tanta tristura y va semando camín. Abri la puerta que te traigo. Ye'l mou que tengo de remocicame, ye dicir, de siguir vivu.

Y ensin mentires

2011-06-18T13:07:00.000+02:00

Pallabres ensin patria, llingua seca qu'arreciende a ceniza podre. Nun mos vaga remontar el vuelu, too valta como páxaros ensin exa.

Tolos díes ye'l cabudañu de dalguna verdá. Los sos familiares y collacios rueguen una reflexón crítica nel so nome. Y ensin mentires, a poder ser.

dimisión, la

2011-05-12T15:12:00.001+02:00

dimisión, la: [Esti términu nun esiste na llingua asturiana].

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

partidatura, la

2011-04-25T18:43:00.001+02:00

partidatura, la: sust. Propuesta [que presenta un candidatu pa poder ser escoyíu] que nun fai otro que dividir el votu ente xente que piensa igual. 2 sust. Conxuntu de candidatos [que se presenten nuna eleición por un mesmu partíu] que nun fai otro que dividir el votu ente xente que piensa igual (La partidatura d’esi partíu nun llegará a mediu millar de votos).

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

El futurible

2011-03-28T23:13:00.000+02:00

Ye esti un exemplu de cómo una decisión d'un políticu pue camudar el futuru d'un país. Colo qu'hai agora van robanos la merienda una y otra vuelta, como yá camienta dalgún que quier facer.

El futurible d'esti país ye murniu. Pero ensin esperanza, val más morrer.

Tarde

2011-02-07T00:39:00.000+01:00

Tarde significa tarde, llonxitú entemecida col pasáu, pasera de la distancia, oblicua visión qu'añera cerca de lo caduco. Perdifícil ye agarrar el vacíu que dexa la falta de tiempu.

Yo espero la sema, aína llega la so voz. Ha de llegar más pronto que tarde.

Ye tiempu de callar

2010-12-31T01:23:00.000+01:00

Ye tiempu de vergüenza, de tener nuedos en gargüelu y nun ser quien a desatalos. Ye tiempu d'acabar les coses qu'enxamás escomencipiaron, d'echar el güeyu al alma de les coses muertes, d'anubrir les buelgues qu'entá nun dexamos na memoria.

Ye tiempu de too y de nada. De la solombra del vacíu qu'acolumbro allá alantrones, de la ruina voz que nun escuchasti y cayó en duro.

Ye tiempu de callar. Unos más qu'otros.

Estierru

2010-12-03T12:09:00.000+01:00

La llingua de les pallabres ye la solombra del silenciu. Les pallabres dicen pa desdicir. Falen pa callar. Filosofen pa nun pescanciar un res.

Les pallabres son almes solombriegues que viven en tierra mentiroso. Has d'esterrar tanta voz. Nel país del silenciu namás hai sordos.

dedacracia, la

2010-11-07T01:58:00.001+01:00

dedacracia, la: sust. Sistema [de toma de decisiones onde’l deu d'un políticu intervién na alministración y despide al personal alministrativo].

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

deucracia, la

2010-11-07T01:36:00.001+01:00

deucracia, la: sust. Sistema [de toma de decisiones onde’l deu d'un políticu intervién na alministración y escueye al personal alministrativo].

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

De cabeza al cuchu

2010-10-14T03:02:00.000+02:00

Somos un país cada vegada más pequeñu. Pero tenemos el númberu más grande de payasos faciendo burlla y risión per quilómetru cuadráu. Más grande entá ye'l númberu si lu medimos per Ayuntamientu.

Hai otros cómicos que tampoco tienen gracia. Nin igua. Meyor mandalos a toos de cabeza al cuchu, que ye otru mou de facer xusticia.

A berríes

2010-09-18T08:46:00.000+02:00

De tolos seres que berren, quédome colos que presten, non colos qu'anoxen nin colos que meten mieu. La berrida, albidro, ye un fechu diferencial animal.

A berríes habrá que dicilo. Tamién n'internet, faltaría más.

Un poco de respetu

2010-08-24T11:03:00.000+02:00

Babayones ensin vergüenza falamexen sobre'l mio pais, igüen podredorios qu'esparden pa chiscanos coles sos mentirrises. La xente estranxero abluca de les ratoneres qu'atopen per ende.

Lo peor ye qu'equí tamos cegaratos. Va tiempu qu'esto ye inaguantable. Na Xunta'l Principáu fai falta un poco de respetu.

Una bona gadaña

2010-08-01T21:37:00.000+02:00

Entamen los rosales a xorrecer al empar que los sos mentideros. Desfalen pa nada nun dicir, pa callar les sos miseries. Contratalanten, que ye otru mou de refugar lo que necesita Asturies.

Enfótense nos mentideros que salen peles sos bocones. Podre vacíu enllenu escayos.

Ai, quién tuviere una bona gadaña. Yo'l garabatu lu tengo preparáu yá pa tanta broza qu'hai qu'arrastrar.

xuntandanza, la

2010-07-19T18:36:00.001+02:00

xuntandanza, la: sust. Aición y efeutu de xuntandar. 2. sust. Dícese de les xuntances [n'especial de dellos partíos] lentes y abegoses. 3. sust. Enfermedá [qu’infesta a munches persones nacionalistes al mesmu tiempu nun pueblu, nun país].

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

Al borde del abismu

2010-06-21T19:59:00.000+02:00

Fartonando la conseyeraduza ta pel país, dientro la so sesera apoltrona'l bon xacíu. Plizcos d'Asturies debalen per ende. Aína será nenyures.

Falo, lleo, escribo. Dacuando callo. Too paez poco cuando la verdá priende nes coraes. Empruna ye la patria al borde d'un abismu.

Silenciu

2010-05-27T19:52:00.000+02:00

El silenciu ta fechu de vaciu. A costafecha pa fundise a lo callandino na solombriega zuna de lo que nada nun dice. Un furacu muertu baxo la nada, la ferralla mudo de l'ausencia onde añera la voz parao.

Atalantái, sicasí, que'l silenciu ye tamién un cavilgu. Y dacuando una respuesta, gociosa como la vida, pa quien sepa escuchar.

Too apodrez

2010-04-30T08:36:00.000+02:00

Cuanto más aminorga'l mio país, más crez un podredoriu. Porque too apodrez per ende. Hai xente afogao de tanta rosa podriza.

Ye hora, camiento, de podar ciertos matos. De sacar morgazu y quemalo. De barrer pa fuera de casa tanta puxarra.

Respuestes

2010-04-10T12:37:00.000+02:00

Una colgadura nel universu ye la vida, un mordiatu al escaezu, una entruga que tien por respuesta un oxalá.

Si atopes esti besu, como migayu de pan, éches-yoslu a los paxarinos. Ye la mio última manera de ser llibre cuando la muerte alcuentre mio casa.

Camiento qu'esti mundu atropa tanta tristura como tenrura y respuestes alcuentro en ciertes pallabres.

Búscase flonda

2010-03-25T19:25:00.000+01:00

El Goliat ye un elefantontón qu'espataya de mou illegal a la formiga. Anecia como un morgañón qu'anecia como un morgañón. Si Miguel Ánxel llevantare la tiesta ablucaría dafechu col estropiciu que tán faciendo col so David.

Búscase flonda.

Recasorios

2010-03-21T18:43:00.000+01:00

Pasín ente pasu caleyamando a conceyu, pa falandar pel caminón enforma emprunu de la dignidá. Quien lu percuerra que nun cuerra, lo bien fecho, bien paez, diz mio güela.

Hai casorios perdayuri. Y divorcios a la vuelta de la esquina. Lo peor son los recasorios, que ye otra manera de tomanos por fatos.

El próximu añu

2010-03-07T19:41:00.000+01:00

Una manera de llegar a la conciencia ye empobinar camín pelos sentíos. Necesario ye equí onde asturien vezos milenarios, que ye otra manera d'escaecer.

Percorrieron los sentíos p'algamar direutos la conciencia de poca xente. Menos ye quedar como tábemos. Y el próximu añu, otra vuelta a quien-y correspuenda.

bloguetu, el

2010-02-21T19:58:00.001+01:00

bloguetu, el: sust. Términu usáu por xente non venceyao a la llingua asturiana pa referise a un conxuntu de blogues [onde escriben persones de carauterístiques llingüístiques comunes, que son marxinaes pol restu la sociedá].

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

El salmón

2010-02-12T19:52:00.000+01:00

Espatuxa esti país baxo'l calcañu de los sinvergonzones, como un salmón contracorriente que pide fuelgu y naide ye quien a da-y tira. Somorguiaos nos rabiones pica'l salmón n'anzuelu que-y ponen de contino. Arrecostina'l salmón les bregues que dalguna vegada ganó.

Hai un mundu qu'argaya y baxo l'agua de nada sirven les pallabres. Ye hora de que'l salmón saque la tiesta.

Babléfobos y babléfilos

2010-01-21T20:43:00.000+01:00

Llevántase'l telón. Llargando pela boca faen de mio casa babayolandia. Llargues llingües tien la xentecaya llinguatero, babléfobos qu'anoxan. Baxa'l telón y nun ye un chiste

Lleo sobre homes de llingua escrita, pa nada llinguateros. Biblófilos y babléfilos.

Lo demás sigui igual. Los d'arriba siguen afogando, mentanto los otros siguimos intentando sacar la tiesta.

Vivo nun requexu

2010-01-05T21:30:00.000+01:00

Vivo nun requexu, que ye dicir vivir nun quexu una y otra vuelta. Quéxome y mexo ¿qué? Naide sabe porque ensin camín, nun hai sebe onde esparder les agües menores. Y cuando nun hai prehistoria, la historia nun tien oficiu nin beneficiu.

Lo meyor ta por saber. Nesti requexu espero la sabencia.

Ye una peonza

2009-12-26T22:13:00.000+01:00

Énte la contradicción una y otra vuelta, contrallectura y más volteretes. La política ye una peonza que davezu marea.

Asina les coses, voi tomar una aspirina enantes de soplar les veles.

prexuntar

2009-12-20T20:48:00.001+01:00

prexuntar: v. intr. Aiciones y socesos previos a la xuntanza [n'especial de dellos partíos] talos como griesques, rocees o creación de microcorpúsculos asociativos clónicos (unos d'otros). 2. v. tr. Facer aiciones favoratibles pa la xuntanza [n'especial de dellos partíos] ensin enfotase nello (Prexuntáronse unos llamaos a los responsables pero nun respondió nin dios).

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

A tomar vientu

2009-12-17T20:52:00.000+01:00

Camuda'l tiempu, aporta'l fríu ivernizu, como una tristura enforma xigante. Ye la época de los tunturrones y los mazapanolis, pero n'Asturies llevamos xintándolos dende abenayá.

Por embargu, per un llau y per otru xente asturiano hai farto d'eses llambiotaes. Y nun son los únicos. Col fríu paga la pena tar en casa y l'añu qu'entra mandar a tomar vientu los dulces.

Afitar los pegollos

2009-12-09T20:08:00.000+01:00

Hai países que pagaríen por ello. El nuestru viéndelo enforma barato. Inda más, como los horros o teitos, val más esgoncialo y pagar a calatraves o niemeyers.

Paradoxa que la Ilesia nun mire pa ciertes ilesies. De cierta xentecaya, que siempre se pasó la cultura asturiana pel forru les sotanes, nun hai qu'escaecese.

¿Hasta cuándo esti debalar como un país ensin xacíu?, ¿cuándo afitar los pegollos pa parar l'esbarrumbe?

Escoyístila bien

2009-11-28T06:43:00.000+01:00

A mio güelos siempre-yos sintí dicir «Ribeseya, Llastres, Lluces». Y mio güelu díxome cuando conoció a la mio moza «escoyístila bien». Y dacuando m'entruga «¿tais yá arrexuntaos?».

Que nun venga nengún manguán agora a falta-yos el respetu. Hai coses coles que nun se xuega.

Síndrome d'Estocolmu y Linux

2009-10-30T09:45:00.000+01:00

Ye enforma ablucante lleer ciertes coses. Les víctimes afalaguen al verdugu. Y viceversa. N'Asturies sobra síndrome d'Estocolmu y falten desplantes.

Per otra banda, Linux ye un aliviu ente tantu espertu sietemesín. Hailos que breguen contra corriente y paga la pena moyase con ellos.

Va de palos

2009-10-14T19:06:00.000+02:00

Los xiblapites falen d'izquierda, pero izquierda de palu, la que sal a flote, porque la madera flota, por mui podre que tea. La xente combayono vive de medayes y anoxa fediondo.

Barrucen palos (o toletes) a esgaya sobre la izquierda, pero la de verdá, la apaleada. Písen-yos los drechos y nada nun pasa.

Namás la verdadera izquierda nun escaez. Lo demás ye dar palos de ciegu. Y medayes a manguanes.

Fálote a tientes

2009-10-01T20:43:00.000+02:00

Nun camuda nada nesta tierra empruno, nesti asoceder de desbentíos y pindia visión. Los de siempre, que son los d'enantes, son los d'agora, perdayuri.

Camiento qu'hai coses qu'espoxiguen p'hacia dientro. Dalguién fala de la so penuria, que ye la d'Asturies y munchos nun saben.

Dixo Benedetti «miro cómo te vas adentrando en la niebla y empiezo a recordarte». Vivo nuna tierra que someya una borrina y fálote a tientes.

La llingua siniestra ye oficial

2009-09-10T15:50:00.000+02:00

La mierdecencia hipocretina que xorrez pelos rosales ye enforma ablucante y paradóxica. Al empar de la risa, eches unes llarimones qu'esboliguen peles mexelles de la impotencia.

Ye la xíriga de los sinvergonzorramplos que falen el falaxe bocayón del capital. Tracamundien manzorga con siniestra y asina cai sobre la xente probe como un impuestu.

La llingua siniestra ye oficial en tol estáu. Y pocos hai que saben la so gramática y ortografía pa facer una bona torna.

Faciendo l'indiu

2009-08-08T05:57:00.000+02:00

Qu'un xostrón de calter morgañón faiga lo que-y venga en gana dientro les llendes la so facienda dame lo mesmo, siempres que nun arrecienda la so cochambre pelos ventanos vecinos.

Agora, cuando la raposa ye zorrampla como ella sola y posa les agües mayores na cacía ayena (diciendo que ye suyo y dexando ensin comer al amu de los cacíos y cuyares), tócame enforma los tolanos. Y el cubil de siempre mirando pa otru llau o faciendo l'indiu.

Nun mos queda nada que tragar

2009-07-09T17:39:00.000+02:00

Un ser en peligru d'estinción, ye lo que somos los románticos. Somos carne de cañón, seres pluricelulares que nos manquen ciertes cosuques, pero da lo mesmo. Reproducímonos como les setes. Siempre habrá otru yo.

Visto lo visto, nun mos queda nada que tragar...

Vivimos na antifábula

2009-06-22T18:55:00.000+02:00

Cuando les rates s'agospien na cocina, cualesquier almuerzu ye enforma dañible pa les persones. Les rates nun falen, sorprienden porque rebuznen. Faen usu de la nevera y apodrecen los güevos.

Si esto ye lo que faen les rates, nun digo nada de les raposes. Estes son zorramples, como fíos de mala madre. Vivimos na antifábula.

Mirar p'alantre

2009-06-04T09:01:00.000+02:00

Atopámonos con morgañones na vida de los que ye enforma difícil escaecese porque van semando abondes pallabres xostrones y ellí per onde pasen tresfórmase en zarramplero.

La manera de parar esti espollete castrón pal mio país ye mirar p'alantre, tolo demás ye repetir lo mesmo.

Mamemos en comuña

2009-05-20T09:31:00.000+02:00

Quien nun llora nun mama. Y de mamones va la cosa, cosadiella, ¿qué cosa, cosuca, cosuquina ye, que nin vien, nin va, nin a quedase quietu ye?

Siempre mos quedará L.lena, dixo Rick Blaine a Ilsa Lund naquella famosa película.

Perru nun come carne de perru

2009-05-04T20:38:00.000+02:00

Alón. Acabóse. Y namás queda aguantase y acallar el pruyimientu. ¿Quién va dar anuncia de la hipocresía más perronera y xabaz? Naide, porque perru nun come carne de perru.

¡Manca la maera, rediós!.

La propiedá de la sinvergonzonería

2009-04-30T20:13:00.000+02:00

Nun acoroxen los sinvergüences. Ye la propiedá de la sinvergonzonería, qu'hai momentos pintiparaos pal espoxigue de lo collorao peles mexelles pero nada, siguen colo suyo, refugando lo irrefugable, o criticando lo autocriticable. Pero oi, del calentón xubiendo pelos papos, nin enxencle amagu.

Dacuando apaez dalguién qu'intenta saca-yos les vergüences, pero hai sinvergonzonería enforma como pa, camiento, saber per onde escomenzar.

Llucha de contrarios

2009-04-19T20:09:00.000+02:00

Nun podemos vivir ensin contrarios, yá falaben los presocráticos de les lluches de contrarios. La solombra implica la lluz. Lo grande namás lo ye si hai daqué pequeño colo que comparase. Les persones que nun tienen un pelu de tontos apaecen cuando hai dalguién que se pasa de llistu. Aquelles persones que lo perdieron fai tiempu contrapónense a aquelles que nun se pierden una. Aquellos otros que nun tienen pelos na llingua tienen delantre a eses que nun dexen pasase nin un pelu...

Y asina in saecula saeculorum.

La llingua de la izquierda

2009-04-04T19:51:00.000+02:00

Gurgutiarrones que s'amontontonen nes poltrones. La llaceria izquierdoliente fiede a bocayón y a cuchuletu. Golores qu'arrencienden les fogueres onde calecer les sos sinvergonzoneríes. Munchu manguante pelos cubiles de la manzorga vendida.

Repunu cafiante nel mio corazón. Anoxu qu'antroxa estos dientes apertaos. Llamargues son les mios mexelles. Soi la llingua de la izquierda.

Vivo na cochambre

2009-03-21T18:00:00.000+01:00

Vivo na cochambre. La Casa Conceyu ye un cubil onde arreciende'l golor a cuchu. Cuando'l gochu fala dios llibre la to casa del so deu.

Los praos nacen con un pan embaxo'l brazu. Y si yes arquiteutu xefe, con embutíu pa facer el bocadillu. Oi, y amás de casa.

Ciempiés

2009-03-08T19:39:00.000+01:00

Camiento que lo máximo que fuimos dende cuantayá hasta güei foi cincuentapiés y yá ye numberar enforma pasao. L'otru día abarrunto que fuimos quincepiés, pue ser que llegáremos a ser ventipiés o trentapiés, pero non más.

El día que seyamos ciempiés, nenguna afatada al empar qu'inorante y apoltronada podrá facenos recular. Un ciempiés tien munchos pies pa que naide-y puea facer nunca dar pasos p'atrás.

El neñu de la oreya verde

2009-02-18T19:07:00.000+01:00

Va ser cosa d'oreyes. Yo crecí col señor de la oreya verde. Sedrá un ser mitolóxicu, camentaba daquella, porque oreyes namás les tuviere visto colloraes pol fríu, por dalgún balonazu nel patiu'l colexu o depués d'un bon tirón si nun acababes el problema, qu'asina les gastaben los maestros de cuando neñu.

Más raro, digo yo, ye esi qu'ha de tener más de dos oreyes de tanta xente qu'hai arrodiándolu falándo-y de coses importantes. Lo más ablucante que por munches oreyes que tenga nun ye a escuchalo too. Habrá que-y lo gritar.

Por suerte hailos que de neños poníen atención a lo que-yos dicía la so güela. Atalanto qu'estos son, tamién, neños de la oreya verde.

Mofu nes esquines

2009-01-29T18:23:00.000+01:00

Fai tiempu que nada escribo porque tán lladronándome les pallabres pa nada nun dicir con elles, namás pantasmales vacíos, ringleres blanques.

L'anoxu medra como l'universu nel puntu cero. Fumu queda nel país que pienso. Y mofu nes esquines.

Fala

2009-01-07T09:13:00.000+01:00

Nun teas atristayáu, pa qué mirar pa lo escuro, pa qué la soledá fría como'l corazón d'un páxaru muertu. Nun caigas al agua, nun esperes l'abrazu últimu nin t'axuntes al silenciu.

Hai munches coses por facer, alloñar les tristures ye'l llabor de la vida mesma.

Ri, besa, suaña. Y, sobre too, fala.

27 d'avientu

2008-12-27T06:24:00.000+01:00

Foi un día talu como güei. Percorrióme les entrañes más vives hasta computase nesti llugarín na rede. Pequeñu ye, sí, pero galán.

Suerbo la nueche. Y asina les pallabres salen escures, como túneles tronadores.

Gracies doi a los y les que somos. Pa los demás tengo estes entrañes, más vives que nunca. Tres añinos y sumando.

Al contrario*

2008-12-17T09:15:00.000+01:00

La mentira aporta per casa como'l fríu cuela perbaxo les puertes. Tamién les cucaraches pasen pelos llugares más ruínos. Ye lo que-yos pasa a los fuínos y seres que malgobiernen les faciendes ayenes.

Siempre nos quedará dalgún llugar calecíu p'atopanos. Ehí vos espero, que fuera ta mui frío.

*(Esti blog entamóse y caltiénse ensin ayuda nenguna de la Conseyería de Cultura del Principáu d'Asturies, más bien, al contrario)

El númberu cero

2008-11-20T07:17:00.000+01:00

Númberos hai perdayuri. Somos númberos que transiten pelos conxuntos. Y buscamos el nuestru mediu númberu Pi, porque l'amor ye lo que tien. Hailos aristócrates y son primos. Hailos que pierden la cabeza y son irracionales. La mayoría somos enteros y suañamos col infinitu, vestímonos con xeometría y les coles del paru son pura entropía.

Y la to casa nun ye una casa, ye una hipoteca. Y el to trabayu ye un sueldu. Y la gayola tien preciu. Y el futuru'l mundu ye de los númberos negativos.

Camiento que la llingua que falo, pa dalgunos, ye'l númberu cero.

El final del cuentu

2008-11-03T19:03:00.000+01:00

Pues nada, que somos seres raros y préstanos da-y a la parpayuela pa siguir ensin dicir un res. Ye'l casu del casoriu. Ye la cena de la cenahoria. La familia reunida pa la fartura.

Camiento qu'hai otra hestoria de los tres gochinos. Y acaba d'entamar. Creo que conozo'l final del cuentu.

Los tres gochinos

2008-10-17T10:14:00.000+02:00

Ascu me da la xente qu'escaez la so historia. L'últimu que-y pidió un autógrafu morrió asesináu. Ye'l primer gochín.

El segundu gochín dicía que yera roxu, pero agora nun se pon nin colloráu cuando combaya al millonariu. Les perres de tolos probes van pa los lladriellos de los pocos ricos.

Autoculpase pa que too siga igual. Esi ye'l gochín onde metíemos les monedes. Pero nunca mos dexaron romper la hucha.

Unos tan gochos y otros con una vida tan perra.

Puxarra

2008-10-16T21:07:00.000+02:00

Nun me grites el silenciu que veo tresparante. Un furacu hai nel banduyu tan grande como la fame. Nun pesen les duldes porque nun hai espaciu nos bolsinos onde guardales.

Esto yera la voz fondo del futuru. L'últimu xiblíu que llegó tarde enantes del pasáu. Ehí t'espero, nel alloñáu llugar onde tamién espera l'amor y les coses con bon xacíu.

La puxarra nun come puxarra. Prefier xintar el nuestru dineru. Pocos edificios cayeron entá, atalanto.

Meyor que llueva

2008-10-06T09:44:00.000+02:00

Paez que fai bon día. El sábadu nun esistió. Tampoco nun esistió'l bon día que fizo n'Uviéu. Nin la xente que faltó.

Asina les coses, meyor que llueva.

Sacar el paraguón

2008-09-18T09:03:00.000+02:00

Un globu, dos globos, tres globos. L'asturianu ye un globu que se m'escapó.

Pasín ente pasu, llega ochobre, cola so o y la so ce y la so hache y la so o repetida y la so be y la so erre y la so e. Cuanta más lleche desnatao bebo más delgaes me salen les lletres. El cielu nublu ta medrando. Asina les coses, sacar el paraguón ye lo que nos queda.

A la cama ensin cenar

2008-09-13T10:10:00.000+02:00

Perdonáilos porque son como rapacinos anque la mayor de les vegaes se paezan más a chimpancés. A dalgún d'ellos, el peluqueru cortó-y, arriendes del pelo, les sos idees.

Lo malo ye que xueguen con fueu. Si los pillara mio padre, azafranába-yos el culu con una bona zapatiella. Y a la cama ensin cenar.

Que lo sepamos

2008-09-02T17:49:00.000+02:00

Esgonciaos sinvergonzones que faltosean les sos manguanaes per allá y per alló. Fusilantes dictatoriales apuntalando les sos carabines escontra los publicanos de la res. Xente que nun vive porque hai xente que nun morrió.

Poles culpes, que son les sos vergüences, de los homecones enxamás paladearé más versos que los yá dichos per boca'l poeta.

(...) Quiero dormir un ratu / un ratu, un minutu, un sieglu; / pero que toos sepan que nun morrí (...).

Pues eso, que lo sepamos.

Pasatiempu

2008-08-26T19:20:00.000+02:00

Ye enforma difícil lleer el periódicu con tantes lletres. Un filosofatu apaez ente medies y naide nun gorguta. Usa les mesmes pallabres que yo usaría pa dicir lo contrario.

Lo peor ye que los hai qu'ayeri dicíen daqué pa güei nun dicir nada. Y sigo pagándo-y la poltrona. El periódicu ye un pasatiempu onde hai qu'atopar les verdaes. Yo prefiero l'autodefiníu silábicu.

Más val una imaxe que mil pallabres.

Yo conxugo, ¿y tu?

2008-08-18T15:50:00.000+02:00

Presente d'indicativu del verbu «asturiar»: yo nun asturio, tu asturies, él/ella asturia, nosotros/es nun asturiamos, vosotros/es asturiáis, ellos/es asturien.

Monterroso

2008-07-29T20:51:00.000+02:00

La honestidá, ¿úla? Embaxo la risión, escuende'l dinosauriu la so fatura faltona. Quiero dir a mio casa, pero'l dinosauriu desanicióla.

Hailos que güei dicen una cosa, pa mañana dicir otra. Pero yo toi seguru de lo que digo.

Cuando esperté, el dinosauriu entovía siguía ehí...

Menú p'Aréstegui

2008-07-22T09:57:00.000+02:00

Menú p'Aréstegui. Como entrantes tenemos «Erizos de mar». De primer platu, hai pa escoyer «Potaje de alubias» o «Gallo de camino». De segundu, ración curiosa de quesu «Ahoga el Gallo». Pa postre hai «Fruta de sartén».

Non

2008-07-12T18:42:00.000+02:00

Ensin ánimu de comunicar

2008-07-11T16:16:00.000+02:00

Manguanes analfabetontorrones salen dafechamente p'amosar les sos incultures y, yá que tamos, apisonar los drechos d'una tierra cada vez más pequeña.

De la mio boca sal lo que piensen munchos. La más fonda pena, l'asomu d'una llamarga fecha de llárimes. La risión de los fatos que sienten cátedra sobre lo que desconocen dafechu valtia'l xacíu. Y ensin ánimu de comunicar, faltaría más, yes babayu.

Si me dixeren pidi un deséu

2008-07-05T11:24:00.000+02:00

Caleidoscopios enfrentamañones coles sos mentirrises. Son falses les sos pallabres, solombres que refuguen dafechu'l bon xacíu.

Pel regatu baxa otru raposu que me quier comer los pinreles. Los míos y los de la xente que quier semar nel güertu.

Necesita'l mio güertu un rau de nube, como dicía l'otru.

Quedamos cayoncos

2008-06-25T20:19:00.000+02:00

El borrín tien los deos llargos. Y ganes de comelo too. Entama desaniciando'l gargüelu de la xente pola que me quito'l sombreru. El borrín tien la cara d'un afatáu.

Agora quedamos cayoncos, tanto como lloñe llega l'acosu.

Los domingos

2008-06-11T19:24:00.000+02:00

Hai tardes de domingu que faen rebusquinos como formiguines pela espalda. Y un gociu rescampla porque orbaya. La humidá caltria pelos suaños pa refrescar la vida.

Pero ye lo malo de los hipócrites, que suelen ser domingueros que fadian hasta tocar el conteníu del ñeru qu'arrecostino ente les piernes. Y queden más panchos que dios.

Va tiempu que los siete díes de la selmana son domingos. Y los xardineros tocándome'l ñeru. A min y a tantos otros.

Llegar tarde

2008-05-26T19:41:00.000+02:00

El xiblíu del tren llega tarde. Lloñe namás hai mofu que se come les víes. El tren nun esiste.

Sigo a pie'l mio camín. Y hai xente non asturiano que se ri.

El reló

2008-05-13T20:36:00.000+02:00

El reló de los mamelucos da les hores d'otru planeta.

Quiérote, nun te quiero, quiérote, nun te quiero, quiérote, nun te quiero dixo la margarita. Y el reló ensin cuerda quedó coles ganes de mandalos a tomar vientu.

Vivo fuera d'esti tiempu. Nel espaciu quietu qu'hai ente que se mueve y non el segunderu.

Desaniciu

2008-05-08T20:27:00.000+02:00

Desaniciái les mios pallabres, manguanes. Tamién sé callar n'asturianu.

Un pruyimientu cafiante

2008-04-30T19:36:00.000+02:00

Les pallabres pesen diferente dependiendo d'au s'alluguen. Equí son solombres alfabétiques enforma llivianes al debalu, xirigoncies de los impresentables que mos desgobiernen y que falen pa nada nun dicir.

N'otros llugares too dicen los soníos del gargüelu, pa too val mover la llingua.

Un parrulu fala equí. Pero nada aporta a los mios oyíos, namás un pruyimientu cafiante.

Ayeri ye güei

2008-04-21T10:14:00.000+02:00

Nun fai nin un añu cuando foi ayeri, falando dende'l corripiu les mentires, la sinvergonzonería córtase col mesmu patrón. Onde ponen el güeyu, ponen el lladriyu.

Les mentires esnalen pa posase. Güei aquelles mentires lleguen y amosen la risión que faen del bon xacíu los sinvergüences.

Ayeri ye güei. Porque los sinvergüences son los de siempre.

Hai

2008-04-11T16:54:00.000+02:00

Hai llinguateros que tienen la llingua tan llarga que son a metela pel santu furacu pa volver sacala y siguir falando. Un golor a parva cuchu aporta.

A vegaes hai dalguién con bon xacíu. L'arume aporta bien prestoso y orbayao ente la tinta prieto de les babayoneríes. Espoxiga'l golor gayaspero del futuru onde la llingua sirva pa daqué. Y Asturies que lo vea.

Llugarinos

2008-04-07T19:30:00.000+02:00

Llugarinos arramplaos qu'agora tornen, llugarinos capitalantaos pa ser llei, dafechuraos teitos ensin llugar. La patriaña de los patriotes llaceriando argaya pela hestoria y con ella vamos toos y toes.

Asturies ye la tierrina que busca más tierra na mar, que ye dicir más perres. Si fuéremos páxaros, ¿a cuanto la masa d'aire?

Sapos y culiebres

2008-03-24T09:57:00.000+01:00

Sapos y culiebres lleo una, dos y tres por cuatro. Sal direuto too dende les entrañes infernales, dende los fedores puercos de lo falso que llastra de contino'l bon xacíu, sal la fechura del engañabobos.

Ehí ta, al llau de los demás que nun faen otro qu'apoltronase. Pa siguir soltando sapos y culiebres que nun lleguen a nenyuri, porque la tierra camuda'l so nome, anantes nun entiendo lo dicho. Y ye un dicir lo mesmo, mesmamente dende min mesmu. El mio país nun esiste, tampoco nun esistiré yo nin los míos. Falaré, entós, dende'l llau invisible de la nada.

Mentirrises

2008-03-13T07:08:00.000+01:00

Lloraba llorando llamargamente. Ría enriba los ribayos. La yerba los yerbatos ta metántanes los mentiradores.

Quien ría penriba'l ríu va ser el mentirador col gomeru de la so llingua. Falen de naderíes de banduyu enllenu porque-yos importa más el votu que'l votante.

Hai un ai na mio boca. Hai munches mentirrises acastellanizaes nes sos parrules cares. Nada importa porque nun esisto.

Trabayandones pa naderíes

2008-03-12T08:01:00.000+01:00

Acabóse y siguimos los trabayandones, viviendo nos terrenales de los pesantes euros. Acabóse que ye dicir lo mesmo qu'entamar, unos apoltronaos pa facer naderíes descomanaes, otros pa siguir nel llugar fondu onde van desapaeciendo los paisanos.

Toi fartu, de lo mesmo. L'escaezu ye lo peor, porque naide ye a llegar ehí pa dar la vuelta. Quedamos los ensin nome. Nin llingua. Nin país.

Aristóteles (na Uiquipedia)

2008-03-07T20:24:00.000+01:00

[Espublizao por min na Uiquipedia embaxo l'artículu Aristóteles]

Crítica a la teoría platónica

Aristóteles critica’l calter separtáu de les idees respeuto al mundu sensible (de los sentíos). Mentanto’l so maestru, Platón, afirmaba la esistencia de dos mundos dixebraos (el mundu corpóreu y el mundu de les idees), él sostenía que les idees (qu’él llamaría formes) taben mezclaes colo sensible (materia y forma facíen un conxuntu xuníu). Esta renuncia al mundu separtáu de les esencies paez que yera debío a que so pa yera médicu y lu influenciare nes disciplines de ciencies positives, rellacionaes cola esperimentación. Asina ye lóxico la so tendencia a mirar más pal mundu natural, físicu, qu’a un mundu non esperimentable polos sentíos.

El so llibru más importante ye’l de la Metafísica onde espón les principales idees sobre lo que ye l’ente en cuanto ente y esmolezse na búsqueda de les causes primeres. El nome que-y punxo, metafísica, significa en griego más allá de la fisica. La ferramienta pa conocer ye la lóxica, siendo l’argumentu lóxicu más importante pa esi fin el siloxismu.

La teoría de la potencia y l’actu

Ún de los esmolecimientos d’Aristóteles yera’l d’aldovinar l’orixe y una explicación al movimiento. Pensaba él que si daqué camuda ye porque pasa d’un estáu a otru y asina llega a postular la diferencia ente ser daqué agora, a lo que llama «ser n’actu» y el poder llegar ser daqué nun futuru, «ser en potencia». Ye dicir, una semiente ye una semiente n’actu, pero ye un árbol en potencia. D’esti mou, el movimiento ocurre cuando daqué pasa de ser n’actu a ser en potencia.

Tou ente corporeu ta compuestu de dos principios sustanciales estremaos, la materia y la forma. Siguiendo la teoría de ser en potencia y n’actu, Aristóteles afirma que la materia (la cosa física, l’oxetu corporeu) ta en potencia pa ser daqué, pero la forma que recibe esa materia, esi oxetu, ye ser n’actu. Ye dicir, un vasu ta formáu pola materia (el cristal) y pola forma (forma cilíndrica). La materia primo o primero ye la mínima sustancia necesario pal cambéu y la forma que recibe col cambéu denomínase forma sustancial. La materia segundo ye una sustancia susceptible de modificaciones accidentales (ye dicir, que nun son necesaries pa que daqué siga siendo daqué), y en casu talu recibiría formes accidentales.

Asina, Aristóteles creyó resolver el problema del movimientu: el pasu del ente en potencia al ente n’actu.

La teoría de les causes

Aristóteles fala de cuatro tipos de causes, dividíos en 2 grupos:

- Causes intrínseques: Causa Material (responde a qué) y Causa Formal (responde a cómo).

- Causes extrínseques: Causa Eficiente (responde a por qué) y Causa Final o teleolóxica (responde para qué).

Un exemplu pa entender esto ye pensar por exemplu na estatua de David de Miguel Ánxel. La causa material sería’l mármol. La causa formal sería la forma humana. La causa eficiente sería l’autor de la obra, quien la fizo, Miguel Ánxel. La causa final o teleolóxica sería pa dar prestixu o embellecer. P’Aristóteles la causa final ye una de les más importantes, porque pa él too tenía un fin, el mundu, el cosmos, seguía una trayectoria hacia un fin o meyor dicho, taba siendo atrayío hacia un fin.

El Dios aristotélicu

Aristóteles afirma la eternidá del movimiento nel cosmos pero tamién afirma la esistencia del primer motor, que ye la causa del movimientu eternu del cosmos. En xeneral, razona él que tolo que se mueve ye movío por otro, ye dicir, hai un motor que lo mueve. Aristóteles nun almite una esplicación circular (nun explica nada pensar que l’últimu motor mueve de nuevo al primeru) nin tampoco almite una esplicación en cadena infinita de motores (tampoco explica pensar qu’hai infinitos motores). Llega a concebir el primer motor inmóvil (motor porque mueve, pero inmóvil porque si ye l’últimu motor nun pue haber otru motor que lu mueva) como causa final. Acaba afirmando que la causa final atrái tol cosmos hacia él, comunicando asina’l movimientu («ye oxetu d’amor o de deséu»). Esti primer motor, causa final, ta claramente separtáu del cosmos, ye actu puru (carece de potencies porque nun ye móvil), autosuficiente, inmaterial, polo tanto, ye’l Dios particular d’Aristóteles, pa nada hai que pensar que s’asemeya al Dios cristianu.

Conocimientu y ciencia

La Metafísica ye una ciencia que trata l’ente en xeneral, l’ente en tanto que ye ente. Y según esti análisis, el ser pue ser entendío de dellos moos, estableciendo les categorías de sustancia y accidentes. La sustancia ye lo necesario que tien de tener daqué pa ser daqué. Los accidentes son les cuestiones circunstanciales que tan al rodiu l’ente pero que son prescindibles pa que daqué seya daqué (la sustancia d’un vasu ye’l cristal del que ta fechu, y que seya grande o pequeñu ye accidental, porque eso nun va condicionar que seya o dexe de ser un vasu)

La lóxica estudia les delles formes válides d’argumentar y construir xuicios colos conceptos que designen al ser y les sos categorías. La lóxica aristotélica básase nel principiu de non contradicción y toma como cadarma básica del razonamiento correutu la del siloxismu (tres premises la última de les cuales, llamada conclusión, síguese de les dos primeres).

No que cinca al conocimiento, Aristóteles defende qu’el conocimiento entama polo sensible (asina damos cola sustancia y colos accidentes), ye dicir, afala l'empirismu como aniciu del conocimientu. Y depués, mediante la nuestra razón vamos superando’l nivel de conocimientu animal y astraemos (facemos astraiciones). Per últimu, emitimos xuicios aplicando les categorías a los conceutos astrautos.

Ética

P’Aristóteles, el fin supremu de toa actividá humana ye la felicidá (Eudemonismu). Afirma qu’el bien y el fin del ser humano ha de ser daqué práutico y realizable. Si lo carauterístico del ser humano ye poseer alma racional y perfeccionala, la felicidá ha d’atopase na vida racional mesma. A la escontra de Platón, la vida racional nun ye namás teórica, sinón tamién práutica, poro hai dos tipos de virtúes. Virtúes intelectives (les teóriques) como la prudencia, y virtúes étiques (práutiques).

La política

De forma paecida a Platón la política d’Aristóteles subordínase a la ética. Al definir al ser humano como animal político o social conclúi qu’el bien supremu o la felicidá namás pue algamase dientro d’una sociedá que tenga como fin el bien común. Aristóteles reconoz tres tipos d’Estáu o organizaciones de la polis: monarquía, aristocracia y democracia. Lo que caracteriza a la democracia ye que tolos ciudadanos participen del poder y tienen los mesmos drechos. L’aristocracia amenorga la participación y los drechos a una minoría y la monarquía a ún solu. P’Aristóteles el réxime por escelencia ye la democracia, pero los otros dos son tamién legítimos mentanto tengan como fin el bien común. Almite que toa forma de gobiernu pue dexenerar hacia la inxusticia, cuando s’abandona l’ideal de bien común.

Platón (na Uiquipedia)

2008-03-06T19:55:00.000+01:00

[Espublizao por min na Uiquipedia embaxo l'artículu Platón]

El doble rechazu

Platón fizo filosofía, a la escontra de los presocráticos y a la escontra de los sofistes. Per un llau, nun taba conforme cola esplicación presocrática del cosmos que basaba'l so razonamientu en proponer un elementu físicu como'l aniciu y razón del mundu. Per otru llau tampoco aceutaba la esplicación sofista polo que tenía de variable. Los sofistes nun reconocíen una verdá, sinón que podría dicise que los sos razonamientos yeren relativistes dafechu, ensin reconocer una única verdá. Poro, Platón establez qu'hai otru mundu más allá del físicu, del sensible, y tamién qu'hai una verdá única a la que paga la pena averase. La motivación inicial de la so filosofía foi fundamentalmente política y moral y pensaba que namás pola esistencia de lo xusto en sí (idea de lo que ye xusto) son posibles actos xustos. L’estudiu d’esti fundamentu empobinará la so teoría de les idees.

Teoría de les Idees

Les idees nun pertenecen al mundu que vemos, ye dicir al sensible, sinón qu'hai otru mundu ideal (de les idees) onde habiten les idees. Toles coses d'esti mundu material y corruptible nel que nos movemos imiten lo que les idees son nel mundu de les idees. Polo tanto, la esencia de les coses ta nes Idees, si daqué ye daqué, yelo porque s'asemeya a la idea de daqué. Pue dicise qu'el mundu sensible tien realidá en tanto que participa del mundu de les Idees (hai dos mundos: el de lo sensible y el de les idees). Cuanto más participa una cosa del nuestru mundu de la una idea, más perfeuta ye.

Epistemoloxía

Platón básase na Mayéutica: conocer ye recordar (y amúesalo col exemplu del esclavu, onde namás faciéndo-y entrugues consigue que l’esclavo pescancie conocimientos matemáticos). La nuestra alma inmortal, preesistente al cuerpu y yá que vivió nel mundu de les idees pue recordar un conocimientu que yá poseía. Nesti procesu de conocimientu Platón distingue dellos graos de conocimientu:

- la doxa (opinión), qu’inclúi la eikasía (imaxinación) y la pístis (creencia).

- la episteme (ciencia), qu’inclúi la diánoia y la nóesis (conocimientu discursivu y razón).

Pa esplicar estos graos de conocimientu utiliza la conocida metáfora de la llínia y el mitu de la caverna (nesti últimu casu fala del progressus o salida de la caverna y regressus o vuelta a la caverna; cola salida el individu algama’l conocimientu más verdaderu al llegar al mundu les idees y cola vuelta regresa al mundu sensible).

Teoría política: La República

En La República trata d’algamar la xusticia: una armonía ente l’orden del cosmos, el de la ciudá y el del alma. Ye importante la distinción alma y cuerpu: l’alma ye inmortal y espiritual y participa de la naturaleza de les idees; el cuerpu ye material y pue corrompese, la muerte del ser humano ye namás la destruición del cuerpu. L’alma tendrá una eterna tresmigración nos cuerpos (reencarnación).

La ética empobínase hacia la conquista del bien supremo que ye la felicidá. A les tres funciones del alma correspuénden-yos tres virtúes:

1- Al alma racional: la sabiduría o prudencia.

2- Al alma irascible: la fortaleza.

3- Al alma apetitiva: la templanza.

Xunto a estes virtúes ta la xusticia que sintetiza (o axunta) les tres virtúes.

La perfección namás s’algama en sociedá. L’Estáu ye l’únicu capaz de garantizar la xusticia. La sociedá ha d’estructurase en tres clases de ciudadanos: gobernantes (filósofos), guerreros y campesinos, nes que predominen respeutivamente caún de los tres tipos d’alma. Y de la mesma manera qu’un alma ye xusta cuando les sos tres partes tán n’armonía, tamién nel Estáu apaez la xusticia como armonía de les tres virtúes (sabiduría o prudencia, fortaleza y templanza). Pa evitar la tentación de favorecer a los amigos o a ún mesmu, les dos clases superiores nun han de tener drechu a propiedaes privaes, nin tampoco a formar una familia estable. D’esta manera, trátase de que vivan comunitariamente y que los sos fíos seyan consideraos toos como si caún de los proxenitores fuera so padre. La familia, el matrimoniu monogámicu y la propiedá privada namás habrían de ser accesibles pa los artesanos o trabayadores, quien, debío al so menor desendolcu intelectual, motívanse solamente por incentivos materiales, talos como aumentar les sos riqueces o’l so bienestar material.

P’acceder a la condición de guardián (guerreru) Platón establez una dura educación, y namás los que superen estes dures pruebes podrán ascender a esta condición. Al mesmu tiempu, d’ente los meyores guardianes, y depués d’otra dura y elevada educación, especialmente basada nel estudiu de les matemátiques y de la dialéutica, seleicionaránse los gobernantes filósofos. Trátase, asina, d’un réxime políticu altamente elitista, anque los gobernantes nun son seleicionaos en función del so orixe social o de la so posición económica, sinón per aciu de los sos méritos y capacidaes. Ye un elitismu intelectual el que defende Platón. Arriendes d’ello, tamién prevé la necesidá d’una política de seleición euxenésica, especialmente ente los guardianes, pa favorecer un procesu d’ameyoramientu de los ciudadanos. Per otra parte, los gobernantes tienen el drechu a exercer una descomanada censura en toles artes, na lliteratura, el teatru y nos conteníos de la enseñanza yá que, siendo ellos los poseedores del conocimientu, son los únicos que puen saber qué ye lo adecuao y qué ye lo perxudicial pa la coleutividá. N’especial, el gobernante habrá d’impedir la lliteratura o’l teatru que ridiculice a los dioses y, más entovía, curiar de les enseñances que reciben los neños, pues ye na infancia onde s’alquieren los peores vicios y se descarríen los futuros ciudadanos.

En cualquier casu, Platón nun introduz diferencies ente homes y muyeres: los dos sexos han de tener los mesmos drechos y recibir la mesma educación. Sicasí, Platón como tolos griegos, taba convencíu de que too cuanto naz (y la polis nun ye una excepción) ta sometío a dexeneración. Por ello, prevé les estremaes etapes de dexeneración que pue sufrir una comunidá humana, y describe les cinco formes de gobiernu que, de manera procesual, exemplifiquen dicha dexeneración. Asíina, pa él, la forma ideal de gobiernu ye la monarquía entendida nel so significáu lliteral: el gobiernu d’una persona, el más capaz (nun ye una monarquía hereditaria polos méritos de la sangre, sinón el gobiernu del meyor). Si son dellos ente los meyores (aristos) los que gobiernan, denomínase aristocracia (nuevamente nun nel sentíu del gobiernu d’una casta social, sinón de los meyores y más preparaos intelectualmente). La dexeneración d’esta forma de gobiernu ye la timocracia, o gobiernu rexíu pol honor más que pol conocimientu, que pue dexenerar na oligarquía (gobiernu d’unos pocos) rexida pol afán de riqueza. Cuanta más importancia se da a la riqueza menos se da a la virtú, diz Platón. Esta situación xenera probitú y aumenta les diferencies sociales, lo que enxendra la democracia, el triunfu de los probes sobre los ricos que conduz a una inevitable crisis de l’autoridá y a la demagoxa (foi un réxime democráticu’l que condenó a muerte a Sócrates). Pero l’escesu de llibertá y de pautes fijxes y racionales de conducta empobina a un camín d’escesu de servidume y desorden que da llugar a l’apaición de la tiranía, la más detestable de les formes de gobiernu y verdadera caricatura del gobiernu xustu que, según Platón, ye la monarquía.

La maxa científica

2008-02-16T11:33:00.000+01:00

La pallabra ciencia paez máxica, porque tol mundu-y concede ensin duldes la verdá y aceuta lo que diz ensin dicir un res. Sicasí, como tengo dicho nesti blog, lo que seya que significa ciencia ha de ser contestualizao dientro d'unes coordenaes espacio-temporales. Lo que yera la ciencia pa Pitágoras nun ha de ser lo mesmo qu'entendía Newton o los científicos anguaño. De fechu, la entendida dixebra ente filosofía y ciencia ye, podríemos dicir, moderna. Recordemos que la obra principal de Newton foi Philosophiae Naturalis Principia Mathematica espublizada en 1687 y que podríemos traducir como Principios Matemáticos de Filosofía Natural, reconociendo, polo tanto, el so llabor matemáticu dientro d'una filosofía xeneral referida a los fenómenos de la Naturaleza. Quiciás, la dixebra ente ciencia y filosofía podríemos constatala a partir del racionalismu tardíu o la época moderna (podríemos dicir, tamién, que na edá media la ciencia y filosofía, arriendes de dir xuntes, diben de la mano de la relixón faciendo difícil la so dixebra).

Esto ye daqué que ta recoyío en bien d'estudios sobre la ciencia por munchos autores criticando (nel sentíu más filosóficu del términu, ensin conteníos peyorativos) la intocabilidá del conceutu de ciencia. Ún de los autores que xeneró tou un movimientu críticu na manera d'entender la ciencia y qu'influyó nos entamos de los estudios CTS foi Thomas S. Khun col so llibru The structure of Scientific Revolutions (hai traducción al castellanu La estructura de las Revoluciones científicas). Nél, l'autor, afala la imposibilidá del llinguaxe neutru cuando falamos de teoríes científiques y polo tanto hemos suponer la implantación d'una teoría científica (incluso de lo que ye o dexa de ser ciencia) na dómina y llugar nel qu'asocede.

TIC y el nuevu conceutu de democracia

2008-02-10T09:00:00.000+01:00

Pudimos lleer na prensa que'l 80% de les 1.700 quexes feches polos xixoneses lleguen al Ayuntamientu vía web. Esto debía ser un indicador importante pa la conciencia política d'esti país (siempres y cuando pensemos que los políticos piensen na ciudadanía y non na poltrona y les perres). Les TIC podríemos definiles como toa aquella teunoloxía que permiten tresmitir, procesar y esparder información de mou direutu ya instantáneu, sobre too referíes a la telecomunicación.

Si partimos de la noticia cola qu'entamo y de la qu'apurro l'enllaz, podemos comprobar qu'hai una rellación direuta ente participación y nueves teunoloxíes (rellacionaes con internet). La participación en democracia ta mermada, vistes les cifres y datos ufríos nes últimes elleiciones estatales pol Ministeriu Interior (ente otros causantes d'ello ta la vergoñosa actitú política y la poca atención qu'hai sobre ello). Asina, nes últimes elleiciones abstuviéronse un 24% del elleutoráu, datu pa nada atendíu polos partíos políticos, pero de muncha importancia polo que significa. ¿Habría la mesma abstención si pudiera votase de mou telemáticu vía internet? Nun taríemos namás falando de participación, sinón d'una más rápida xestión, aforru de papel y menos molesties pa la xente que-y toca tar nes meses elleutorales. Amás, el votu nulu podría llegar a desapaecer.

L'asuntu ta en si los políticos quieren camudar les coses. Facer una democracia participativa dafechu. O van siguir como hasta agora, obviando les prestaciones qu'ufren les nueves teunoloxíes. Camiento que si nun hai grandes pasos nesti asuntu ye porque-yos interesa siguir asina a los partíos de siempre y que saquen los mayores númberos de votos, ye dicir, que les coses, con una democracia más participativa, diben camudar enforma, daqué que camiento que ye malo pa la élite que ta anguaño nel poder.

La Teoría Crítica

2008-01-28T06:19:00.000+01:00

Ún de los movimientos filosóficos más relevantes del sieglu XX ye'l nomáu como Teoría Crítica o Escuela de Frankfurt. Esti grupu de pensadores basaba la so teoría na crítica a la razón que nesa dómina paecía sobrevolar la sociedá, alloñándose per un llau del positivismu lóxicu (que nun paecía resolver más que problemes ficticios) y, per otru llau, remocicando les idees marxistes, naciendo la so filosofía de la sociedá real y de los problemes reales qu'afeutaben al común de los mortales. Pretendíen, sabiendo de la desconexón ente filosofía y sociedá, falar d'una teoría práutica, empobinar el sentir críticu de la razón pel bon camín, denunciando un usu instrumental de la mesma.

Nun fueron ayenos al holocaustu nazi y esi sucesu, amás de marcar les sos vides personales, sería importantísimu pal desendolcu filosóficu de la escuela.

Pienso qu'esti movimientu filosóficu ye mui importante pero, por desgracia, estúdiase mui poco nos institutos. Si pensara mal diría que dende les élites de poder se silencia esti mou de pensar (per otra parte afín o converxente colos estudios CTS). Nin fueron ayenos al nazismu nin a los movimientos contraculturales de los 60 (qu'apoyaben).

Diba poner dalgún llibru de referencia que falara d'esti grupu, pero atopé per internet esta páxina onde se fala de la Escuela de Frankfurt. Creo que ta bien (anque reconozo que pal non averáu a la terminoloxía filosófica pue resultar un poco densu) y pue ser un bon entamu p'averase a esti pensar col que yo, personalmente, comulgo.

La carrera espacial y el llinguaxe

2008-01-21T18:58:00.000+01:00

L'usu del llinguaxe nun ye inocente y apela a una realidá social que ta, en munches ocasiones, per baxo de la conciencia del falante. Asina ye, por exemplu, lo que pasa coles pallabres astronauta y cosmonauta.

L'orixe d'estes pallabres o la so necesaria aparición vien de la nomada carrera espacial que se produxo na segunda metá del sieglu XX. Falando en pallabres cencielles foi una competición ente los (daquella) soviéticos y estaoxunidenses pa facese col prestixu mundial amosando la so prepotencia científico-teunolóxica nos viaxes al espaciu esterior. Esta carrera empobinada pol arguyu patriu costó una indecencia de millones de perres; lloñe de marcar los ritmos los beneficios que d'esos viaxes espaciales podríen sacase y la so aplicación direuta al ciudadanu, quien fizo de marcapasos nun entamu foi la gana d'apuntase tantos delantre'l mundu (que tenía prensa, radio y televisión, ye dicir, los medianamente desarrollaos, porque a los otros naide nunca-yos esplicó un res y tampoco-yos importaba muncho a los EE.XX) y facer propaganda pro-ideolóxica. Y depués, como nun podía ser d'otra manera, sacóse provechu militar, que neso los EE.XX. nun aforren perres.

La investigación científica subvencionada pol gobiernu estaoxunidense (y soviéticu) empobinó'l so llabor a les mires espaciales, dexando de llau otros temes moralmente más aceutables, como por exemplu la mínima aportación al campu educativu o a la sanidá pública, siempre per detrás, añu tres añu, del gastu descomanáu en temes militares ya investigaciones científiques (empobinaes la mayoría a meyorar la teunoloxía militar, colo que tamos no mesmo). Qu'un país gaste más n'armamentu que n'educación yá lo diz too. Depués, de les investigaciones espaciales sacaríense teunoloxíes amañoses pal ciudadanu d'a pie (¿aldovináis quien fueron les primeres persones n'usar pañales, por exemplu?), pero eso, camiento por desgracia, ye un llogru colateral.

Asina la cuestión, pa saber quién ganó la carrera espacial nun tenemos más que pensar qué pallabra escoyemos pa referinos a les persones que viaxen pel espaciu esterior, astronauta (del vocablu inglés astronaut) o cosmonauta (del soviéticu kosmonavt).

Estudios CTS

2008-01-12T13:14:00.000+01:00

Si hai un campu que merez especial atención ye'l nomáu CTS (ciencia, teunoloxía y sociedá), tamíén conocíu como los estudios sociales de la ciencia y la teunoloxía, que s'abrieron camín nel pasáu sieglu XIX (como quien diz ayeri). Efeutivamente, estos estudios d'investigación multidisciplinar carauterícense por conxugar estes tres pallabres máxiques (ciencia, teunoloxía y sociedá) formando una triada que resulta del too difícil dixebrar. Traten, polo tanto, d'amosar la implicación social y la so influencia nos proyeutos científicos y teunolóxicos. Too ello conlleva repensar l'actitú de los ciudadanos y ciudadanes frente a la ciencia.

Pero esta necesaria conexón ente sociedá, ciencia y teunoloxía, nun pue llegar a entendese con una idea inxenua de ciencia (o como se vien denominando conceición heredada de la ciencia). La ciencia tien les sos contradicciones, paradoxes, influencies personales y pequen los sos estudios de los prexuicios humanos de quien ta nella (¿qué dicíen hasta hai bien poco de la homosexualidá los manuales científicos de siquiatría?). Los estudios CTS destapan la caxa de Pandora neso llamao «ciencia» y faen una analis críticu sobre aspeutos pa nada ayenos al común de los mortales. Pa una visión global de les múltiples conceiciones sobre la ciencia que se desendolcaron na historia, pue ún acudir al llibru d'Alan F. Chalmers What is this thing called science? (hai traducción al castellanu ¿Qué es esa cosa llamada ciencia?).

En munches de les entraes que vienen fairé, de xuru, referencia a los estudios CTS, campu que, reitero, ye perinteresante y que-y encamiento profundizar a toa aquella persona interesada na divulgación científica y filosofía de la ciencia. Pa una visión xeneral ya introductoria pero al empar interesante y enllena información útil sobre la historia y lo que son los estudios CTS, encamiento'l llibru de Marta I. González García, José A. López Cerezo y José L. Luján López Ciencia, Tecnología y Sociedad. Una intruducción al estudio social de la ciencia y la tecnología. Nesti mesmu llibru, amás, atoparéis un estudiu CTS sobre la participación pública en política teunolóxica y ambiental, centrándose nel casu de la política forestal n'Asturies (¿foi normal la plantación masiva d'ocalitos n'Asturies, especie vexetal ayena a estes tierres?). Esti estudiu sobre la utilización teunolóxica pa desendolcar polítiques forestales n'Asturies ta más estensu y esplicáu nel llibru Políticas del bosque: expertos, políticos y ciudadanos en la polémica del eucalipto en Asturias qu'años más tarde espublizaríen los mesmos autores José A. López Cerezo y Marta I. González García.

Asina, los estudios CTS, como se camienta nel últimu llibru citáu, nun traten de desacreditar el valor de la ciencia, sinon, ente otres coses, d'amosar los sos límites epistémicos y los sos usos políticos.