14 sept. 2014

Como una entruga

Ellí ta la solombra escosada del destín, ¿ú les sos buelgues serondiegues?, ¿ú la voz ensucha de cuánto fui?

Nada nunca nun muerre si se tresforma en pallabres. Entá esnala pelo prieto de la nueche la cadarma del to secañu.

Ellí toi, como una entruga que naide fai.

10 jun. 2014

PSOE

PSOE: sust. Acrónimu formáu poles sigles Partíu Sofista Obreru Español y que fai referencia a un partíu políticu (Felipe González diz que'l PSOE ye un partíu accidentalista, non republicanu).

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

31 may. 2014

Tamién hai tenrura

Ye un día nublu, de nublu sol y nublos páxaros. Cai asina un murniu silenciu sobre l'aire que güel a muerte nubla. Tolos seres anueden esperances baxo la quema irreparatible de los díes nublos. Pero güei namás les solombres s'afayen pela vida.

Tamién díes como güei cuerre'l tiempu. Flui la lluz. Declama los sos versos el declive de la tarde. Amira de frente tolos abismos qu'atopes, n'ellos tamién hai tenrura escondida ente les sos pallabres feches de piedra y desbentíos.