22 dic. 2012

Delantre de mio casa

Na anchura de la distancia vivo. Nel llargor últimu de cada pasu espera'l mio nome. Son les áscuares del pasáu estes voces que me llevanten.

Nun hai llonxitú énte los mios güeyos. Namás lluvia tres los cristales. Y lluz nublo delantre d'esta casa.

20 ago. 2012

Ganes de nada

Ganes de nada. Ganes d'escomencipiar el puntu final. Ganes d'afuracar el vacíu como un xiblíu muertu que naide nun escucha.

Na fendedura de l'ausencia busco la mio voz, con esti mirar pensatible que percuerre ente los dientes del silenciu. Busco na quebradura del mañana, con ganes de nada.

21 jun. 2012

Con too y con eso

Indecencia peles enxeves ministeriales nos sos menesteres. Ciencia de la sinvergüenza na capital capital. Vientu podre. Compilación vacía de la solución a tantu mal. Pente la memoria cuerre la sangre de la lluz muerto, ceniza carbonífero.

La salida ta nesti poema. Baxo la cume del acentu, ente la fonación última qu'ayuri moyó los llabios y estes ganes d'españar con too. Con too y con eso, si España, qu'españe.

31 may. 2012

democracia, la

democracia, la: sust. Sistema [políticu d'esclavitú económica onde’l pueblu nun intervién nel gobiernu pero escueye a los sos gobernantes]. 2 Eufemismu de plutocracia.

[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

18 may. 2012

Taxonomía del poema

Hai poemes como tiburones d'enxives espantibles, versos de lluz güeco que te miren como lleña moyao. Otros lleguen a la memoria como l'agua llega a la tierra cuando xarria. Hailos que güelen a alcantariella o a taxidermia de la povisa. Otros tuercen la mirada como la semántica coles faltes d'ortografía.

¿Qué facer cola poesía que declama'l so misteriu? La taxonomía del poema ye una ciencia irresoluta que nun diz más que mentires. Pero si se diz en versu, la cosa cambia. Ovulación prodixosa de les lletres.

12 abr. 2012

Mou imperativu

Asisti, resisti y persisti. Cuerri, percuerri y recuerri. Ten, retén y caltén. Afirma, reafirma y confirma. Vindica y reivindica. Evolucina y revoluciona. Contesta, protesta y detesta. Aiciona y reaiciona.

Yo tamién conozo'l mou imperativu.

18 mar. 2012

Crime

La memoria ye mio casa. La menudancia del presente ye tierra estranxero, llugar que nun esiste, holograma del dicir onde s'espeya la ensucha mirada de la nada.

¿Au mio casa onde afayase? Muerte del pretéritu, xenocidiu de los mios raigaños, yo tamién muerro énte tantu crime.

2 mar. 2012

Profecía

Profecía del principiu. Arriba la quietú baxo'l sudu de la lluz, tres la llamarga de los espeyos, sol sollutu de los caminos onde naide nun pasa.

Puntu corpuscular del presente, encruciyada onde afonden los raigaños de les entrugues que somos, tamién ehí espera la converxencia del futuru.

Alcordanza del morrer, solombra del pretéritu que m'emburria hasta l'abismu. Tres el vacíu, tampoco quedo yo.

14 feb. 2012

Ehí queden

¿Qué xirigoncies de cuerpos esnudos baxen pelos cadriles de la memoria? ¿Cuántu silenciu atropen los llabios en cada besu? Ehí queden estes entrugues, pa los mordiatos de l'alborada y la lluz de los adientros.

¿Hasta ónde llega'l diente col que mos mordigaña la nueche? La carne que llevantes ¿estroza la lluz?, ¿come solombra?, ¿arrinca espaciu pal amor? Ehí queden estes entrugues que nada dicen y too responden.

10 feb. 2012

parllamentu, el

parllamentu, el: sust. Conceyu [formáu polos diputaos d’un país, que componen la institución cimera del poder llexislativu culpable de producir llamentos]. 2 Edificiu [onde s’aconceyen los diputaos del poder llexislativu d’un país pa tomar decisiones llamentables] (Nel parllamentu decidieron recortar drechos a la xente trabayador y la xente llaméntalo).


[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

3 feb. 2012

Pegavos la patada

Lladronen paz y quietú a los probes. Amburando la paciencia infinita de la xente, esboliguen les sos pallabres pel filu l'insultu. Ehí tán, ehí agarren más de lo qu'atropar pueden les sos manes. Sinvergüences del capital, timócrates afuracando entá más la resignación en mio casa.

¡Timócrates d’esta era, usurpadores de la semántica, combayones del capital, temblái! Nun tais namás quedando como la gocha, sinón tamién col culu al aire. Asina ye más cenciello pegavos la patada.

11 ene. 2012

Palíndromos

Desdicir ye la manera de tornar al pasáu, dicir del revés lo antedicho, revirar les pallabres pa cuspiles del revés. Desfacer lo mentao, volver pisando nes mesmes buelgues que dexó cada pallabra.

Palíndromos de la política, zorramplos del desdichu. Esa ye la nuestra desdicha.