6 ene. 2008

Aclaraciones d'esti reflexonar

Sobre too dende la Segunda Guerra Mundial la ciencia amosó'l so potencial poder pa tresformar la sociedá y percorrió la conciencia de parte del mundu. La ciencia pasó a ser tema d'estáu (de los estaos modernos, claro, non d'aquellos que nun saben nin que ye un interruptor). Lo que voi facer con esti blog ye dexar equí reflexones al rodiu la ciencia col enfotu de que la xente tenga una idea más amplia de lo que ye'l fechu científico. Nun hai que pensar que la ciencia vive na torre de marfil (como pensaben los positivistes d'entamu de sieglu) al marxe de la sociedá, sinón que la ciencia ye un conxuntu d'idees, teoríes, científicos y persones o organismos que la financien y qu'empobinen les sos investigaciones y xente o organismos que la reciben. Toos tan nun conxuntu, como un engranaxe mecánicu cada pieza ye importante. ¿Fabricaríense bombes Napalm si nun hubiera países que les fueren a usar escontra persones?, ¿empobinaríase la investigación en medicamentos pa enfermedaes cróniques si nun hubiera pacientes que les mercaren?...


Nel tema de la ciencia, toos y toes tenemos daqué que dicir, nun ye cuestión namás de «científicos» y ello pasa por tar informaos y ser críticos (un gran retu na nuestra sociedá), divulgar la ciencia y alfabetizar teunolóxicamente. Considero la ciencia una gran ferramienta pa tresformar la sociedá, pero de lo que se trata ye de facelo ¿en qué sentíu?, ¿de qué mou? Una de les grandes mentires que nos ficieron creer en plenu sieglu XX foi aquella qu'Armstrong dixo al pisar la Lluna «Un pequeñu pasu pa un home, pero un gran saltu pa la humanidá», ¿pa qué humanidá?, ¿de verdá qu'esi fechu históricu camudó la vida de les persones del nomáu tercer mundu? Camiento qu'hai etnies, families, tribus enteres que siguen bien probetayes ensin agua potable que llevase a la boca, ¿o ye qu'ellos nun son parte de la humanidá?


En 1845 K. Marx escribió Die Philosophen haben die Welt nur verschieden interpretiert; es kömmt drauf an, sie zu verändern, famosa tesis númberu 11 sobre Feuerbach. Traducío al asturianu vien a dicir que los filósofos nun ficieron otra cosa qu'esplicar el mundu; pero de lo que se trata ye de tresformalu. Cierto ye que taba falando d'un contestu y cambéu social pal obreru, pero ¿por qué nun ha d'entendese nun contestu más ampliu? Les pallabres de K. Marx siguen vixentes anguaño. Nun se trata de filosofar dende'l despachu faciendo xuegos malabares coles pallabres (pa eso tan los crucigrames). Trátase de tresformar el mundu, y la ciencia pue facelo (ha de facelo) siempre embaxo l'abellugu de la filosofía (como reflexón crítica). Los filósofos nun ficieron otra cosa qu'esplicar el mundu y de lo que se trata ye de tresformalu, sí, pero tresformalu d'un mou determináu, non de cualquiera. Equí, y yá pa dexar claro ciertes coses, va falase de filosofía de la ciencia y la teunoloxía, divulgación científica, reflexones sobre la ciencia... pero non de teoría científica.

7 comentarios:

  1. Desvelóse un de los principales misterios de la blogosfera asturianu nos caberos díes ;)
    Nun entiendo muncho de ciencia (menos de filosofía o teunoloxía científica), asina que va venime mui bien siguir pasando pequí.
    Un saludu

    ResponderEliminar
  2. Gracies trasgu por tar tan pendiente d'esti llugarín ;)

    ResponderEliminar
  3. ¿Lo de Tini tien explicación científica o ye un expediente X?

    ResponderEliminar
  4. Será un espediente XXL...
    ... menudu tema que garrasti, a ver quién te lleva la contraria :-D

    ResponderEliminar
  5. Lo de tini ye una catástrofe natural.
    Y ye cierto TrayasgayA, tema raru, raru... a ver cómo salgo d'esta ;)

    ResponderEliminar
  6. ¡Hola esfoyaza!
    Va tiempu que nun te dexaba un comentariu, pero nun pienses que dexo de l.leete. Préstame que garres un tema tan separtao de lo que vemos na blogosfera asturiana, tou impaciente por ver cumo te desendolcas nestos asuntos.
    Déxote un enl.laz de blogues sobro ciencia nel que, dacuando, falan de temas que pueden interesate:
    http://weblogs.madrimasd.org/
    Un exemplu d'entrada interesante:
    http://weblogs.madrimasd.org/universo/archive/2008/01/05/81875.aspx

    ResponderEliminar
  7. Home esfarrapando, gracies pol mensaxe y los enllaces que m'apurres son mui interesantes. De fechu, tenía pensao entamar falando de los estudios CTS (tamién llamaos estudios sociales de la ciencia) asina que gracies.
    Un saludu, blog hermanu ;)

    ResponderEliminar