10 dic. 2007

Diversificando, que ye xerundiu

Si daqué quedó claro na última (y primera) xunta de blogueros y blogueres en llingua asturiana ye que, como camentaba'l blogueru de Pingarates, la mayoría de los blogs n'asturianu tienden a ser rellectures de les noticies en prensa. Lo que vien a significar que más o menos toos y toes falamos de lo mesmo.


Ye cierto qu'hai blogs qu'entamen a tar especialiazos o a monotematizase, y esto ha de ser bono pa la llingua asturiana y la blogsfera n'asturianu en xeneral. Dende qu'apaeciere Esbilla.net creo que yá hai un llugar afayadizu pa enllazar noticies de prensa (dixital) y llueu comentales, anque de momentu tea entovía arrancando'l proyeutu. Poro, voi ver si atopo un tema al que dedicar esti modestu llugarín pa diversificar la blogsfera.


Tuve faciendo dalgunos cambeos estéticos al blog pa dir preparándome y espero que pal día 27 d'avientu tenga decidío en qué asuntu concretu voi gastar equí les pallabres. Será entós, cuando'l lema que carauterizó esti blog (llugar bien amañosu pa la reflexón y la crítica en llingua asturiana) camude un poquiñín pa que'l llector fortuitu (pocos más voi tener, sélo) tenga un poco claro onde cayó.


Y si dalguién s'entrugó por qué'l 27 d'avientu ye l'escoyíu pal renacimientu de La esfoyaza y non otru día, comenta-y qu'esi día cumplirá dos añinos la criatura. Yá veis lo grande que ta yá.

2 comentarios:

  1. Ye curioso que con 2 años, teas ún de los blogs más vieyos de la nuesa blogosfera. Dame que pensar...
    Yo tamién pensé neso que fales d'especializar el blog, pero camiento que nun ye cenciello atopar un tema onde poder movete con soltura, onde teas cómodu a la par qu'entreteníu y teas temes abondo pa siguir allargando-y la vida al to blog. Sicasí, toi xuru que dende'l puntu de vista del llector, ye más afayaizo que la totalidá del blog ronde un tema concretu polo que comentes de saber onde cayó y qué pue esperar del sitiu.
    Norabona pol cabu d'añu y tamos a la espera de ver per onde respires ;-)

    ResponderEliminar
  2. Pues sí, Chamicu, da qué pensar... no fondero entá tamos en pañales y entá queda un camín llargu. Pero pasu ente pasu ;)
    Y dafechu d'acuerdu contigo en que ye difícil escoyer un tema. Tengo un par d'ellos en mente, pero bono, reconozo que son poco atractivos, son cuasi aficiones personales y minoritaries ente la xente... yá veremos en qué queda la esfoyaza.
    Y gracies pola norabona, collaciu. Saludos ;)

    ResponderEliminar