21 nov. 2007

Nun pueo callame

Nun pueo callame. Y quiciás estes lletres nun valgan un res y acaben perdíes pente la rede, al debalu ente la banda ancho y la febra óptico. El casu ye que, pensé, esto tien de sabese. Y ye que, cuanto menos, merez esponese esti asuntu al ágora pública, pal alderique social, tan granible que dicen que ye dalgunos. Porque eso ye una virtú democrática, poder opinar llibremente sobre un tema y meyor entá, camiento, si se ta bien informáu.


Y equí vien lo vergoñoso. Na editorial Anaya, nel llibru de Relixón católica pa escolinos de Primaria (quintu cursu) atopamos un tema tituláu «La democracia» (tema 14). Cuála nun sería la mio sorpresa cuando veo lo que va darréu nesi tema (páxina 117):




Decatáivos no que señalo n'azul. Pa entamar dicir que tamos falando d'escolinos. Pues a eses edaes, yá-yos tan faciendo creer que la «verdadera democracia» ye aquella que defiende la relixón crisitina. ¿Cómo podemos facer esta mecigaya de coses bien estremaes?, ¿cómo pue permitise que la Ilesia pretenda adoctrinar/manipular la conciencia de los escolinos? Pa qu'esista una verdadera democracia nun hai que votar a los que defendan valores cristianos, sinón que basta votar. Lo que ta faciendo la Ilesia ye pretender empobinar el votu, ye despreciar al restu de la sociedá que nun comparte los sos presupuestos de fe. Y cuando falen de qu'hai que votar a los que defiendan a la familia ¿qué ye eso?, ¿acaso una muyer que decide tener un fíu y crialu ella sola nun ye una familia?, ¿una pareya d'homosexuales nun ye una familia?. Tán, otra vuelta, confundiendo coses. Hai delles formes d'entender la familia. Pensar que la so forma d'entendela ye la correuta pueo entendelo, pero de pensalo a imponelo hai un camín enforma llargu. Esta estratexa del llaváu de cerebru a tán temprana edá, bien val una denuncia (¿nun yera la Iglesia y la drecha española la que criticaben asignatures como «Educación pa la convivencia» por incitación ideolóxica?)


Lo que nun se pue permitir ye que na educación obligatoria a escolinos se quiera identificar la democracia col fechu de votar a partíos pro-cristianos. Sostener eso ye una autentica farsa y un menospreciu al bon xacíu nun Estáu español que, azorrando y mirando pa otru llau, caltién nel so artículu 16, párrafu terceru, de la Constitución: ninguna confesión tendrá carácter estatal. Asina la cuestión, nun critico la creencia relixosa nin el so enseñu (acordies cola llibertá de relixón qu'establez la Constitución), sinón l'adoctrinamientu políticu que se produz nes aules y la errónea y canceríxena definición del conceptu de democracia que se fai nelles. Na educación habría d'enseñase a tener capacidá crítica, a decidir por ún mesmu llegáu'l momentu qué hai que votar (y non que te dean el votu yá escoyíu), daqué que viendo lo visto (y viendo los políticos que salen escoyíos n'Asturies elleiciones tres elleiciones) ta seriamente en dulda. Una democracia ta sana cuando hai capacidá critica ente la sociedá votante. L'aborregamientu ye bono namás que pa una élite minoritaria que s'aprovecha de nosotros.

6 comentarios:

  1. los cristianos tienen drechu a una vida publica y a defender les sos opiniones (aunque seyan distintes a les tuyes y te parezcan escandaloses) tanto comu y comu yo.
    En inglaterra , alemanha o portugal nun hay matrimoniu gay .. son por eso teocracies casposes ?
    saludos

    ResponderEliminar
  2. Home, ayalgueru, quiero creer que nun entendisti la mio entrada. Enxamás dixi que nun pudieren defender les sos idees los cristianos, lo mesmo que los comunistes, los nacionalistes, los probes o les muyeres. Faltaría más. Lo malo ye facelo dientro les aules de Primaria. Ye como si'l mayestru que-yos da dibuxu o matemátiques, encamiénta-yos a votar a partíos de dreches porque él ye del PP o porque los del PP prometen dar más hores de dibuxu o matemátiques dientro l'enseñu públicu. Nun me paez de recibu.
    Y claro que pienso que refugar el matrimoniu (polo menos el civil) a los homosexuales ye de democracies recortaes. Lo de teocracies nun sé a qué vien falando d'esos países que nomes.
    Polo demás, saludos.

    ResponderEliminar
  3. Munches gracies pol paseín en coche rapazos. Un saludín. ;-)

    ResponderEliminar
  4. Ricardo, camiento qu’esa páxina ye l’entamu d’un proyeutu similar al que falamos ayeri, entamáu por próspero o dalgún cercanu a él. Fízome gracia atopalo precisamente güei, dempués de venos y falar. Como nun pase como colo de Ximiélgame y Esbilla…

    ResponderEliminar
  5. Bones Ricardo- Nos medios d'información n'asturianu fáltate Gauzonia.
    http://gauzonia.info/

    ResponderEliminar
  6. Yo alcuérdome nel mio colexu que na clase de relixón (yera un colexu concertáu y yera obligatoriu, había dos q nun la daben pero taben na mesma clas q nós y el profesor de relixón -q yera un cura- mandába-yos elli exercicios) cuando tocó falar de la homosexualidá (nun sé xq hai q falar en relixón d´esto) el llibru dicía lliteralmente q la homosexualidá yera una enfermedá asina reconocida, si nun fora poco el profesor (que pa más yera l´unicu de tol colexu q dicía "ye") yá nin falaba d´homosexuales sinon de "maricones".
    Tamién m´alcuerdo q l´últimu profesor de llingua y lliteratura d´España cuando tocó falar de les llingües d´España enseñonos que´l bable yera un dialeutu del llionés, que vinía del llatín pero como yera una llingua muerta tenía de considerase una dialeutu del castellán, tamién dixo que l´euskera yera un inventu de los 60 fecho nos seminarios. Anguaño´l mio profesor ye´l númberu 1 del PP avilesín.

    ResponderEliminar