10 oct. 2007

Márketing, Sidra & Blogs

La publicidá ye una cuestión qu'habría d'estudiase na escuela. Lo que ye. Lo que fai. Cómo lo fai. Por qué lo fai. En resume, too enllaza direutamente colo que se dio en llamar marketing y que ye d'obligao tratamientu n'estudios empresariales o económicos, pero precisamente pola rellación direuta qu'hai ente consumidor y productu, ye dicir, como ciencia qu'estudia la manera de que dalguién venda más eficientemente un productu.


Internet ye un escaparate más de les empreses pa dase a conocer y llanzar les sos propuestes. Nes últimes elleiciones a Conceyu y Autonómiques dalgunos socialistes cabeces de llista crearon ex professo blogs pa dase publicidá, faciendo creer qu'esmolecíos pola xente, la rede de redes yera una manera de tar más en contautu cola realidá social. Pero too quedó pa práu n'acabando les elleiciones, amosando asina que mintieron a los sos votantes, porque lloñe d'usar los blogs como ferramienta afayadizo pa rellacionase cola ciudadanía, usaron los blogs como reclamu «publicitariu». Cuando llegó'l día les elleiciones acabóse esi enfotu nos sos respeutivos blogs. ¿Ónde ta la páxina «Asturianos por Areces»? Lleva tiempu ensin tar operativa. ¿Ónde ta'l blog de Paz Fernández Felgueroso? Otru cuartu y mitá. ¿Ónde ta'l blog de Paloma Sainz? Ta ensin remocicar dende'l día 25 de mayu, ¡cóime, si les elleiciones fueron el 27 de mayu!, ¿pa qué siguir con él en pasando'l día de votación?, ¿namás interesa tar en contautu cola sociedá en campaña elleutoral?


Toos estos exemplos amuesan que con tal de vender, val too. La política, por desgracia, ye un munchu per cientu marketing. Y la xente ciudadano habría decatase d'ello. Poro, publicidá o márketing, habría d'estudiase nes escueles ya institutos, pa que na hora de la verdá delantre la urna, la xente tenga mente abierta y crítica y nun se dexe engañar por una clas política que nagua (namás) por siguir sentada na poltrona.


La comunidá bloguera n'asturianu, tamos aguantando tiempu ehí, enantes durante y depués de les elleiciones siguimos dándo-y a la parpayuela cibernética. Munches vegaes (y falo por min) como quien fala consigo mesmo sabiendo que naide lu llee. Sicasí, nos últimos tiempos paez que ta entamando a crease una conciencia de comunidá bloguera n'asturianu importante, penriba de coyuntures sociales y polítiques. Encamiénto-y a tol mundu a visitar el sitiu web del I Sidra & Blogues y dexe la so opinión. Eso, camiento, ye mui bono pa la llingua asturiana y amuesa qu'esti blog, xunto con tantos otros, nun ye marketing, nun quier vender nada. Ye más una necesidá de mio. De la llingua asturiana.

4 comentarios:

  1. Nós llanzamos a la rede lo que nos prestaría lleer y tenemos siempres presente, esi sentimientu de falar congigo mesmu. Yo creo que la reivindicación llingüistica, ya demostró fai tiempu que nun ye marketing.

    ResponderEliminar
  2. Munches gracies pola visita, Ricardo.
    Dicía Vazquez Montalban va tiempu que”tamos dientro d’una normalidá reformista homologada, pero seriamente amenazao pol esfarrapamientu del texíu social críticu construyíu so’l franquismu”. Enantes teníamos movimientos sindicales y vecinales fuertes y agora nun tenemos nada d’eso porque’l sistema xintólos guapamente, asina que namás hai resistencia dende proyectos mui pequeños que nun tienen sonadía, porque los medios nun-yos van facer casu.
    Na blogosfera tovía se puen facer coses. Nun voi poder dir a esi alcuentru, pero de xuru voi tar n’espíritu, y taré más alantre, en cuantes haya que dir faciendo coses.
    Gracies pola visita.
    Salú.

    ResponderEliminar
  3. Lleves razón en too, comparto esi sentimientu... Y esi noxu pola clas política d'esti país... qu'a ver si los lleva'l diañu...

    ResponderEliminar
  4. Gracies Atevayana y embaxador pola vuestra visita. Y poles vuestres sabies pallabres coles que comulgo. Saludos.

    ResponderEliminar