26 oct. 2007

Al Gore, go home

Nun comparto los oxetivos de la fundación «Príncipe de Asturias», poro, nun pueo tar d'acuerdu col so trabayu empobináu a algamalos. Sorprendióme que Saramago, intelectual d'izquierdes tan comprometíu col pueblu, participara nun premiu que tien como ún de los sos oxetivos facer apoloxía de la institución monárquica. Tampoco me presta un res que presumiendo de ser una institución fondamente asturiana y caltener ente los sos oxetivos l'apoyar (sic) «...la búsqueda del bienestar social y cultural de los asturianos...» desprecie esi bien cultural asturianu nomáu llingua asturiana. Y sorprende entá más viendo cómo entrando na so páxina web atopamos deferencies a llingües tan estremaes como'l polacu, rusu o xaponés. Polo visto, l'alfabetu cirílicu o los idiogrames asiáticos ufren pa los güeyos asturianos más lluz y bienestar que l'asturianu. Que'l detalle ye mínimu, irrisoriu, pero diz muncho.


Pero nun quiero falar de la fundación, sinón de dalgún de los sos premiaos. Nun tolero qu'Al Gore venga a danos llecciones de moralidá. Nun lo soporto. Dalguién habría dici-y a esti estaoxunidense que La Tierra nun ye redonda, porque pensar que ye redonda, ye da-yos la razón a los que pensaben que yera plana (un platu redondu). La Tierra, pol so calter tridimensional, ye cuanto menos esférica. Nun permito qu'esti señor, venga a Asturies a falar ex catedra, cuando ye nel so país onde se ta cuestionando la teoría evolutiva y enseñándose nes escueles (ye dicir, col sofitu alministrativu) el creacionismu como una teoría esplicativa d'esti mundu que nos tocó vivir.


Creo que la fundación, magar nunca la sofité, ta anguaño cayendo nun esteticismu populista poco entendible. Ta dexándose influenciar pola publicidá más xabaz. Y ye la última vez que falo d'estos premios, porque tolos años a estes altures me fierve la sangre con dalguna concesión a esti neolliberalismu pro-estaoxunidense y toi hasta los mesmos tolanos de que se faiga en mio casa, delantre les mios mesmes ñaples.

5 comentarios:

  1. Nun me sorprendió que-y dieran el "Príncipe" a este home, toxs sabemos qué son estos premios. Sorprendéume más, ya decepcionóume, que-y dieran el Nobel de la Paz a un home que, siendo vicepresidente del país más contaminante ya agresor del mundu nun fizo nada por, por exemplu, firmar el Protocolu de Kyoto (que yia bien pouca cousa) ya bombardeó Yugoslavia, Zaire, Sudán, Afganistán...
    El documental parezme basura, demagoxa, carroña, intenta meter miéu ya parezme sentimentalón. Non, asina nun se conciencia. Por nun falar de lo que cobra en cada charla, si lo que quies yia espardir una idea... ¡cuelga el documental n'internet!
    ¡Un saludín!

    ResponderEliminar
  2. Gracies collaciu pol to mensaxe. En cuantes al documental que fizo, pienso esautamente lo mesmo. Saludos

    ResponderEliminar
  3. Pingarates28/10/07 19:41

    A mi tovía me paez más escandaloso lo del PSOE mercando DVDs del famosu documental pa enllenar les escueles.

    ResponderEliminar
  4. Ehí ta la cuestión, hai interés nel cambéu climáticu o en facer caxa? Y el PSOE tragando con ello... dafechu contigo Pingarates ;)

    ResponderEliminar
  5. Toi d\'alcuerdo con delles coses, pero paezme tamién qu\'esi documental quier dicir daqué y tresmitir un mensaxe, y apóyase en datos científicos y rialidaes. La xente ye individualista, egoísta y consumista, lo mesmo que les persones poles que tamos gobernaos, y estos premios nun sé si siquiamente van valir namás pa facer anuncia de 4 midíes nun progama elleutoral y cara a unes elleiciones, envede pa facer dalgo por compromisu. Pero la mio opinión ye que con un poco d\'esi compromisu per parte los estaos, podríen facese munches coses pa que la xente viviere meyor, empecipiando cola probitú, la fame, pasando peles guerres, la desigualdá y acabando col cambiu climáticu. Qu\'Al Gore tea faciendo negociu de too esto o que nel so país heba les mayores emisiones de polución, etc., nun ye a faceme escaecer el fondu de les coses, y esi documental ayuda a velo y dase cuenta.

    ResponderEliminar