26 oct. 2007

Al Gore, go home

Nun comparto los oxetivos de la fundación «Príncipe de Asturias», poro, nun pueo tar d'acuerdu col so trabayu empobináu a algamalos. Sorprendióme que Saramago, intelectual d'izquierdes tan comprometíu col pueblu, participara nun premiu que tien como ún de los sos oxetivos facer apoloxía de la institución monárquica. Tampoco me presta un res que presumiendo de ser una institución fondamente asturiana y caltener ente los sos oxetivos l'apoyar (sic) «...la búsqueda del bienestar social y cultural de los asturianos...» desprecie esi bien cultural asturianu nomáu llingua asturiana. Y sorprende entá más viendo cómo entrando na so páxina web atopamos deferencies a llingües tan estremaes como'l polacu, rusu o xaponés. Polo visto, l'alfabetu cirílicu o los idiogrames asiáticos ufren pa los güeyos asturianos más lluz y bienestar que l'asturianu. Que'l detalle ye mínimu, irrisoriu, pero diz muncho.


Pero nun quiero falar de la fundación, sinón de dalgún de los sos premiaos. Nun tolero qu'Al Gore venga a danos llecciones de moralidá. Nun lo soporto. Dalguién habría dici-y a esti estaoxunidense que La Tierra nun ye redonda, porque pensar que ye redonda, ye da-yos la razón a los que pensaben que yera plana (un platu redondu). La Tierra, pol so calter tridimensional, ye cuanto menos esférica. Nun permito qu'esti señor, venga a Asturies a falar ex catedra, cuando ye nel so país onde se ta cuestionando la teoría evolutiva y enseñándose nes escueles (ye dicir, col sofitu alministrativu) el creacionismu como una teoría esplicativa d'esti mundu que nos tocó vivir.


Creo que la fundación, magar nunca la sofité, ta anguaño cayendo nun esteticismu populista poco entendible. Ta dexándose influenciar pola publicidá más xabaz. Y ye la última vez que falo d'estos premios, porque tolos años a estes altures me fierve la sangre con dalguna concesión a esti neolliberalismu pro-estaoxunidense y toi hasta los mesmos tolanos de que se faiga en mio casa, delantre les mios mesmes ñaples.

10 oct. 2007

Márketing, Sidra & Blogs

La publicidá ye una cuestión qu'habría d'estudiase na escuela. Lo que ye. Lo que fai. Cómo lo fai. Por qué lo fai. En resume, too enllaza direutamente colo que se dio en llamar marketing y que ye d'obligao tratamientu n'estudios empresariales o económicos, pero precisamente pola rellación direuta qu'hai ente consumidor y productu, ye dicir, como ciencia qu'estudia la manera de que dalguién venda más eficientemente un productu.


Internet ye un escaparate más de les empreses pa dase a conocer y llanzar les sos propuestes. Nes últimes elleiciones a Conceyu y Autonómiques dalgunos socialistes cabeces de llista crearon ex professo blogs pa dase publicidá, faciendo creer qu'esmolecíos pola xente, la rede de redes yera una manera de tar más en contautu cola realidá social. Pero too quedó pa práu n'acabando les elleiciones, amosando asina que mintieron a los sos votantes, porque lloñe d'usar los blogs como ferramienta afayadizo pa rellacionase cola ciudadanía, usaron los blogs como reclamu «publicitariu». Cuando llegó'l día les elleiciones acabóse esi enfotu nos sos respeutivos blogs. ¿Ónde ta la páxina «Asturianos por Areces»? Lleva tiempu ensin tar operativa. ¿Ónde ta'l blog de Paz Fernández Felgueroso? Otru cuartu y mitá. ¿Ónde ta'l blog de Paloma Sainz? Ta ensin remocicar dende'l día 25 de mayu, ¡cóime, si les elleiciones fueron el 27 de mayu!, ¿pa qué siguir con él en pasando'l día de votación?, ¿namás interesa tar en contautu cola sociedá en campaña elleutoral?


Toos estos exemplos amuesan que con tal de vender, val too. La política, por desgracia, ye un munchu per cientu marketing. Y la xente ciudadano habría decatase d'ello. Poro, publicidá o márketing, habría d'estudiase nes escueles ya institutos, pa que na hora de la verdá delantre la urna, la xente tenga mente abierta y crítica y nun se dexe engañar por una clas política que nagua (namás) por siguir sentada na poltrona.


La comunidá bloguera n'asturianu, tamos aguantando tiempu ehí, enantes durante y depués de les elleiciones siguimos dándo-y a la parpayuela cibernética. Munches vegaes (y falo por min) como quien fala consigo mesmo sabiendo que naide lu llee. Sicasí, nos últimos tiempos paez que ta entamando a crease una conciencia de comunidá bloguera n'asturianu importante, penriba de coyuntures sociales y polítiques. Encamiénto-y a tol mundu a visitar el sitiu web del I Sidra & Blogues y dexe la so opinión. Eso, camiento, ye mui bono pa la llingua asturiana y amuesa qu'esti blog, xunto con tantos otros, nun ye marketing, nun quier vender nada. Ye más una necesidá de mio. De la llingua asturiana.