24 sept. 2007

Pa Lope

Cuanto más me somorguio no que de maravilloso -y disparate, que diría José Hierro- tien la poesía, menos me gusta la música qu'anguaño pue sentise peles ondes radiofóniques. Y ye que tantu estilismu de neñu de diseñu con peináu fashionable y ropa puntero nun se pescancia peles oreyes. Y nun tengo nada a la escontra del vestir de la mocedá que canta, pero eso considérolo circunstancial. Que Chillida vistiera d'Armani o con falda escocesa da lo mesmo, lo que quedó d'él ye'l so arte clavao per tierres de tol mundu. Y ye que, mesmo que la propia masa revolucionaria francesa mató la madre que los sacara al mundu escontra l'antigu réxime, el videoclip -les imáxenes- foi'l fíu que, anque nun entamu nació pa complementar les canciones, acabó taragañando'l llugar de privilexu qu'habíen d'ocupar les solfes. El videoclip, camiento, abrió les puertes al capitalismu más xabaz, más ocupáu en vender a cualquier preciu ensin importar la calidá musical de lo vendío.


Salvando dellos autores -cuasi esceiciones-, cánsome d'escuchar lletres d'auténtica vergüenza ayena, faltes de la mínima coherencia poética, carentes d'orixinalidá, ensin calidá lliterario per nengún llau, pretencioses y avergonzantes. Lo peor ye que lo canten sobreactuando y queriendo tresmitir una emoción que, en verdá, fuxe de semeyantes canciones. ¿Acaso prentenden algamar con tales fates declamaciones un llugar al llau del maxistral versu de José Hierro Abre tus ojos verdes, Marta, que quiero oír el mar?, ¿sabrán estos cantapedraes quién yera Lope?, ¿y Marta?


Ún, que ye un namoráu de la poesía, nun entiende que xente mozo nun sepa recitar nin una estrofa de Neruda Me gustas cuando callas porque estás como ausente / y me oyes desde lejos y mi voz no te toca / parece que los ojos se te hubieran volado / y parece que un beso te cerrara la boca (...) pero gaste les perres de sos pas en baxase'l politonu de canciones de calidá probetayo. Y les multinacionales y grandes empreses discográfiques a forrase. Y los poetes morriendo na probitú de cuerpu (que non d'alma). Y lo peor, que la xente mozo nun sabe lo que se pierde.

5 comentarios:

  1. Escuito a Bisbal, si xanto fuora de casa fáigolo no Mc'Donalds, préstame pagar 7€ nos cines de "Parque Principado" pa ver la última de Stallone, el l.libru que más me prestó foi "El código Da Vinci", veo tolos días el "tomate" ya los domingos pásolos colos fíos no centro comercial. ¿Sabes que yia lo peor? Nun séi si'l perdeme la música de la cai, la cocina de tola vida, el buon cine independiente, la l.literatura clásica ou'l pasar horas colos fíos al aire, xugando, "saltapiricando" ou que me faigan creer que sou feliz.
    Salú compañeru!

    ResponderEliminar
  2. Salú compañeru ;) y gracies pol to comentariu

    ResponderEliminar
  3. Un emburrión más. A ver qué te paez el plan, ya entama a haber rempuestes pola nuesa blogosfera:
    http://trayasgaya.blogspot.com/2007/09/i-sidra-pola-oficialid.html

    ResponderEliminar
  4. Ricardo, lo que fales del nomatu de la xunta, ya lo había pensao y toi totalmente d'alcuerdu. Sicasí, paezme una d'eses coses que se puen falar el 24.

    ResponderEliminar
  5. URXENTE!!!! Con motivu del empiezu del calendario de reuniones ente los grupos parllamentarios pa la reforma del Estatutu d’autonomía, la Xunta pola Defensa de la Llingua Asturiana convoca una concentración col lema "Na Reforma l’Estatutu, L’Asturianu Llingua Oficial".
    La concentración va facese a les 11:30 d’esti vienres 5 d’ochobre delantre de la Xunta Xeneral, na cai Fruela d’Uviéu.
    ¡AVISÁI A TOLA XENTE QUE PODAIS!
    http://www.exunta.org/spip/article.php3?id_article=164

    ResponderEliminar