26 jul. 2007

Más pallabres

Nun m'interesen les pallabres del mieu que venden mieu, de la falsedá que mata la xusticia nos mesmos llabios, de la vergüenza con arume político, del desconsuelu del que nun ye naide, del escaezu onde aporten les coses probes qu'a naide-y importen, del fríu qu'entra pel costazu en busca de trabayu.


Nun me gusten les pallabres ferruñoses porque al besales, manquen; nin les que nacen pa caer como piedres sobre les esperances del mundu.


Porque les pallabres nomen el mundu que ta al rodiu de les coses qu'amamos. Asina, a veces, val más callar.

11 jul. 2007

Pallabres

¿Cuántes llingües cimbren pel mundu?, pallabres qu'esnalen d'un llau pa otru y reboten o españen pa tornar al silenciu d'au nacieron. Sonidos qu'en gargüelu los vestimos pa llanzalos al mundu, la mayor de les vegaes, al debalu. Y a vegaes falo un dialeutu del silenciu.

5 jul. 2007

Coses de zoon politikon

¿Por qué toles anuncies al rodiu Carnero y Morala, ye dicir, sobre manifestaciones o concentraciones solidaries como la de tolos miércoles na plaza de Carnero y Morala de Xixón a les 19.30 hores (crítiques cola FSA ya IX), qu'apaecen nel diariu dixital El Comercio, apaecen na seición tan poco lleía d'«Economía»?, ¿nun pega más na seición «Asturias»?, ¿o si m'apures, en «Política»?


¿Por qué l'anuncia de güei sobre l'ameyoramientu de les condiciones carcelaries d'estos dos sindicalistes, apaez na seición «Asturias» d'esi diariu, seición muncho más lleía que, por exemplu, «Economía» onde avezaba esti diariu a poneles?


Nun me faigáis casu, son coses de ser zoon politikon.