19 may. 2007

Sindicalismu pantasma

Ye vergoñosa l'actitú de dalgunes persones que nun faen más qu'engañar a la xente probetayo y trabayador con pallabrería barata y cancios que chirríen nos oyíos.


Refiérome a José Ángel Fernández Villa, que lloñe de defender les postures que se-y suponen a una organización o líder sindicalista, afalaga'l llabor del PSOE n'Asturies encamentándo-yos a los ciudadanos fieles a los sos discursos llinguateros a votar a partíos tan separtaos y ayenos a la verdadera llucha obrera como'l PSOE. Efeutivamente, esti sindicalista pide'l votu pa los socialistes. Y digo yo ¿dende cuándo un paisanu que se autonome sindicalista pue pidir el votu pal PSOE, partíu que d'obreru y socialista tien más bien poco (tirando a nada)?, ¿acaso nun sabe lo que-yos pasó a Cándido y Morala (¿sabrá quién son?) por facer llabor sindical?, ¿acaso nun quier alcordase de que'l PSOE tramó toa una estratexa pa baltiar la llucha del naval xixonés?.


Ye vergoñoso asistir a tales ocurrencies y que nun pase nada. Si toos y toes sabemos qu'esti seudosindicalista ye un perrín falderu del gobiernín arecista, ¿a qué xugamos?, ¿cómo siguimos dándo-y credibilidá sindicalista a dalguién que nun fai otra cosa que combayar al PSOE?


Tamos énte un sindicalismu pantasma, un espeyismu que namás sirve pa que los de siempre se farten a costa de los de siempre. Hai díes, sobre too los de campaña elleutoral, que s'oin coses dafechu pantasmales, que más que mieu, dan ganes de llorar.

3 comentarios:

  1. SOMA-FIA-UGT, sindicatu vertical mineru ya auténticu cáncanu del sindicalismu n'Asturias.

    ResponderEliminar
  2. Nun voi ser yo quien te quite la razón, amigu... gracies por contestar

    ResponderEliminar
  3. A dia de hoy todos los sindicatos son lo mismo porque siempre apoyan a los partidos que los subvencionan, y creo que eso lo tenemos todos claro, verdad?

    ResponderEliminar