29 may. 2007

Dixestión elleutoral

Tamos nel momentu de facer la dixestión elleutoral y, nesi sen, camiento que l'abstención aumentó con respeuto les elleiciones del añu 2003 y con ello, ensin ser lo mesmo, tamién medraron los votos en blancu. De fechu, los más de 14.000 inmaculaos votos seríen, axuntándose toos ellos, la cuarta fuercia política dempués del PSOE, PP y IX. ¿Nun ye sintomático?, ¿nun paga la pena parase a analizar eso? Supongo qu'a los partíos mayoritarios, los que tienen acutaes les poltrones na Xunta Xeneral, nun-yos interesa l'espoxigue d'opciones polítiques que nun tean, como ellos, cortaos col mesmu patrón. Poro nun paga la pena da-yos espaciu publicitariu a esos más de 14.000 persones asturianes que nun tán d'acuerdu col sistema de representación político que se-yos ufre porque, no fondero, faen una crítica xabaz y vergoñosa colos políticos d'anguaño.


Y daqué güel a podre cuando una política del PSOE como Paz Fernández Felgueroso, alcaldesa del conceyu de Xixón dende cuantayá, fai los comentarios que van darréu sobre l'aminorgáu resultáu elleutoral sufríu por IX del conceyu de Xixón: «Yo creo que ha sido injusto, que sus resultados deberían de haber sido mejores». Ye la primer vegada qu'una política d'un partíu s'esmolez polos malos resultaos obteníos nunes elleiciones por otra fuercia política dafechu ayena, independiente del so partíu y cola que tien de competir. Mui bien teníen de llevase Churruca y Paz. Y eso, camiento, nun yera nada bono pa Xixón.

2 comentarios:

  1. Hola, Ricardo. Ye pa esmolecer tan alta astención, pero esplicaciones puen apurrise a embute. Equí vamos empobinaos dica´l bipartidismu, al más puru estilu Castellano-Manchegu, o Estremeñu, y dalgo d´eso entiendo porque vivo en fasteres asina, onde predomina´l caciquismu más ranciu. N´Asturies hai un caciquismu sindicalista y d´emrpresa parasitaria y lladrillera, que pa qué. Lo del Muselón ¿nun ye pucherazu al más puru estilu español? Una obra innecesaria y dañible namá que pa qu´unos pocos- los de siempre- pongan el cazu. Nun hai tercer fuercia, una "llave" seria. Porque lo d´IX-BPA-LV de serio nun tienen un res- ¿Van emburriar un poquiñín lo de la oficialidá o lo del mediu ambiente? Nin soñar. Ye mui guapo tener despachos...

    ResponderEliminar
  2. Gracies Carlos por apurrime'l to comentariu. Oxalá, como tu dices, tuviéremos una tercer fuercia seria... En fin, hasta entós habrá que siguir falando alto y claro. Un saludu

    ResponderEliminar