29 may. 2007

Dixestión elleutoral

Tamos nel momentu de facer la dixestión elleutoral y, nesi sen, camiento que l'abstención aumentó con respeuto les elleiciones del añu 2003 y con ello, ensin ser lo mesmo, tamién medraron los votos en blancu. De fechu, los más de 14.000 inmaculaos votos seríen, axuntándose toos ellos, la cuarta fuercia política dempués del PSOE, PP y IX. ¿Nun ye sintomático?, ¿nun paga la pena parase a analizar eso? Supongo qu'a los partíos mayoritarios, los que tienen acutaes les poltrones na Xunta Xeneral, nun-yos interesa l'espoxigue d'opciones polítiques que nun tean, como ellos, cortaos col mesmu patrón. Poro nun paga la pena da-yos espaciu publicitariu a esos más de 14.000 persones asturianes que nun tán d'acuerdu col sistema de representación político que se-yos ufre porque, no fondero, faen una crítica xabaz y vergoñosa colos políticos d'anguaño.


Y daqué güel a podre cuando una política del PSOE como Paz Fernández Felgueroso, alcaldesa del conceyu de Xixón dende cuantayá, fai los comentarios que van darréu sobre l'aminorgáu resultáu elleutoral sufríu por IX del conceyu de Xixón: «Yo creo que ha sido injusto, que sus resultados deberían de haber sido mejores». Ye la primer vegada qu'una política d'un partíu s'esmolez polos malos resultaos obteníos nunes elleiciones por otra fuercia política dafechu ayena, independiente del so partíu y cola que tien de competir. Mui bien teníen de llevase Churruca y Paz. Y eso, camiento, nun yera nada bono pa Xixón.

25 may. 2007

Cola cabeza mui alta, compañeros

El sangrín procesu a Carnero y Morala llega a les cotes más surrealistes sofitáu polos principales medios de comunicación, que lloñe d'informar de les coses qu'asoceden pela cai siendo elles de descomanáu interés pa la ciudadanía, alimenten esa mazana podre en que se convirtió fai tiempu la sociedá política. Ye curioso que La Nueva España, na so edición dixital, nun faiga mención nenguna a la concentración masiva -col atenuante de producise embaxo un chaparrón- al favor de los dos sindicalistes condenaos inxustamente. En cuentes d'ello, mirái qué bien, inunda hasta l'aburrición el so mediu con declaraciones de dirixentes peperos y socialistes panfletaries empobinaes a engañar a votantes (que non a ciudadanos, porque d'éstos namás interesen los que voten) y asina medrar en diputaos, que ye dicir, poltrones.


El Comercio, pela so parte, fala del casu de la concentración d'ayeri, pero coses de la vida, fala d'ello na estaya d'Economía. Duldo qu'a la xente que llee esa parte del periódicu-y interese un res Cándido y Morala. De fechu, nin sabrán quién son estos dos sindicalistes. Lo lóxico sería poner esa anuncia na estaya de "Gijón" o "Asturias". Debió ser que como na concentración semóse de monedes (d'un céntimu) la entrada de la Casa Conceyu de Xixón (como protesta pola inxusta indemnización que'l xulgáu-yos obliga a pagar), pues yá se sabe, la moneda ye dineru, y el dineru ye economía. Que tanto monta, monta tanto, y que pa qué se van molestar en facer les coses bien, polo visto, mesmo que La Nueva España, importa más falar de los bla bla blas engañabobos qu'anguaño xorrecen peles boques de dalgunos políticos.


La Voz de Asturies, fala d'ello con anuncia breve pero onde manda la lóxica, na estaya "Gijón". Eso sí, choca que falando de les mesmes fuentes d'información, discrepe con El Comercio en númberu d'asistentes.


Eso sí, por si nun quedó claro, Cándido y Morala si entren na cárcel lo fairán cola cabeza mui alta, que los sinvergüences son otros bien apoltronaos.

19 may. 2007

Sindicalismu pantasma

Ye vergoñosa l'actitú de dalgunes persones que nun faen más qu'engañar a la xente probetayo y trabayador con pallabrería barata y cancios que chirríen nos oyíos.


Refiérome a José Ángel Fernández Villa, que lloñe de defender les postures que se-y suponen a una organización o líder sindicalista, afalaga'l llabor del PSOE n'Asturies encamentándo-yos a los ciudadanos fieles a los sos discursos llinguateros a votar a partíos tan separtaos y ayenos a la verdadera llucha obrera como'l PSOE. Efeutivamente, esti sindicalista pide'l votu pa los socialistes. Y digo yo ¿dende cuándo un paisanu que se autonome sindicalista pue pidir el votu pal PSOE, partíu que d'obreru y socialista tien más bien poco (tirando a nada)?, ¿acaso nun sabe lo que-yos pasó a Cándido y Morala (¿sabrá quién son?) por facer llabor sindical?, ¿acaso nun quier alcordase de que'l PSOE tramó toa una estratexa pa baltiar la llucha del naval xixonés?.


Ye vergoñoso asistir a tales ocurrencies y que nun pase nada. Si toos y toes sabemos qu'esti seudosindicalista ye un perrín falderu del gobiernín arecista, ¿a qué xugamos?, ¿cómo siguimos dándo-y credibilidá sindicalista a dalguién que nun fai otra cosa que combayar al PSOE?


Tamos énte un sindicalismu pantasma, un espeyismu que namás sirve pa que los de siempre se farten a costa de los de siempre. Hai díes, sobre too los de campaña elleutoral, que s'oin coses dafechu pantasmales, que más que mieu, dan ganes de llorar.

17 may. 2007

El mio pueblu

Ellí per onde paso


la historia de les piedres


paez la única verdá del llugar.


Temo escaecer el camín que me lleve


al porosu centru de les coses


y que cada pueblu nun seya más que polvu


que sacudir nel camín.


(Ricardo Candás)


Esti ye ún de los poemes espublizaos nel primer númberu de la revista de lliteratura mui moza Formientu, editada por H.a Xareos l'añu pasáu. Cuando lu escribía taba pensando n'Asturies.

9 may. 2007

Tomadura de pelo

Hai muncho por facer nesti país. Lo primero, echar a esti sinvergüenza pa que dexe de tomanos el pelo.

8 may. 2007

Xente raro

Interesantes les conclusiones del primer alcuentru de blogueros n'asturianu. Podéis atopales nel blog de Trayasgaya. No fondero, como suel pasar en tolo que cinca al asturianu, hai mui bones intenciones pero too queda pa práu. Y nun ye culpa de naide. Si una llingua ye pequeña (pero galana, oiga) poco pue espoxigar nos blogs, a la fin, y nel mio casu, yo entamé esti blog por dos razones: por da-y presencia na rede a la llingua asturiana y por desfogar de tanta babayonería política. Ye un pequeñu granín d'arena. Y nun tengo enfotu en que seya lleío masivamente, tampoco nun digo nada del otru mundu, como dixi, escribo pa desfogar, ye como la xente raro que-y da por escribir poesía...