28 abr. 2007

Cola cara tontu

Empobiné'l pasu a la biblioteca pública. Más pa buscar les ganes de lleer que porque les tuviere, pero qué cóime, tamos na fiesta cimera de les nuestres lletres y había que sofitala de dalguna manera. Pero ai amigu, foi llegar y entrame'l descontentu. Esperaba ver per dalguna muria o na puerta cartelos anunciantes o panfletos nel mostrador, falando d'actos empobinaos a amosar lo bono de les lletres asturianes. Pero non. Nun vi cartelos per llau nengún qu'avisaren a los usuarios de la Selmana de les Lletres Asturianes. Sorprendióme esti fechu, sobre too dempués de lleer les declaraciones d'Ana Rosa Migoya de que toles biblioteques públiques diben collaborar nestos actos. El mínimu actu collaborador habría ser el de dar anuncia pública de los eventos que s'organicen al rodiu la lliteratura n'asturianu. Digo yo.


El casu ye que nes vitrines qu'hai p'amosar les novedaes o llibros encamentaos tampoco vi nengún llibru n'asturianu. Too siguía como siempre. Too yeren llibros dafechu en castellanu.


Asoméme a la estantería de la seición asturiana, con pizca resquemor pola ausencia anuncies sobre la susodicha selmana. Entós cayóme otru palu. Los cartelinos qu'había en dellos estantes nun respetaben normes ortográfiques del asturianu. Asina atopé «Relixión», «Estoria d'Asturies» en cuentes de «Relixón» y «Hestoria d'Asturies», qu'a la hora de falar caún y caúna que fale como-y pruya, pero a la hora d'escribir habrá que guardar les formes. Qué costará facer un llamáu a la oficina de la Llingua tamién de Xixón, o un mail mesmu, pa entruga-yos el mou correutu d'escribir n'asturianu lo que quieren escribir. «Pero total, qué más da, ye bable, val escribilo de cualquier manera, pa cuatro que van venir a echar una güeyada» foi lo que pensé que pensó'l qu'escribió eso.


Agarré dos llibros y col pasu astristayáu llegué al mostrador. «Un regalín». O eso creí escuchar de quien m'atendió, mentanto metía daqué ente les fueyes d'ún de los llibros que sacaba. Pensé entós que nun teníen escaecío la selmana les lletres, qu'anque mínimu, teníen un xestu pa la xente que lleía n'asturianu. Miré, entós, al empar qu'empobinaba camín pa casa, qué me metiere ente los llibros y yera un marcapáxines. «Por el día del libro que fue el día 23», díxome al tiempu. Y yo quedé cola cara tontu hasta que llegué a casa.

20 abr. 2007

Sinvergüences

¿Dende cuándo dalguién pue presentase d'izquierdes y ganar anguaño 6.000 euros nun cargu públicu teniendo poder pa iguar esi despilfarru? Cuando dalguién me lo esplique, siguimos falando de sueldos vitalicios. Y de pasu, de sinvergüences.

11 abr. 2007

Blogs y l'asturianu

Equí van dos anuncies que me paecen importantes y qu'amesten o converxen nesos dos elementos que dan titulu a esti post.


Per un llau, na Escuela de Seronda van tener el so espaciu los blogs fechos n'asturianu y les reflexones al rodiu d'ellos. Yo nun creo que puea pasar y agradézo-yos a los compañeros que m'avisaron d'ello. Sicasí, quiciás haya dalguién al que-y preste y nun s'enterara entovía.


Per otru llau, ta acabantes d'espublizase Nireblog dafechu n'asturianu. Ye un mou percenciellu de crear el to blog dafechu n'asturianu (anque pues facelo en munches otres llingües). La idea xurdió de David González, creador tamién d'esti espaciu Gugara onde ta allugáu esti blog míu. Lo bono de Nireblog ye que ta too n'asturianu, incluyíes les opciones internes p'alministrar el blog, polo que non solo ye prestoso pal que lu llee, sinón tamién pal que lu alministra.

10 abr. 2007

Si quies, pues votar

Que caún y caúna faiga lo que-y pruya, faltaría más. Pero ye que col cuentu de que tan ehí mesmo les elleiciones el nuestru gobiernu gasta perres en campañes na radio y na televisión, que son los que yo tengo sintíos. Pero daqué hai que nun acaba de soname mui bien. Estos anuncios nun tán fechos pa encamentar a la xente a votar, como drechu democráticu (anque de toos y toes ye sabío que vivimos nuna oligarquía, non democracia), sinón que si los escuchamos sollertes, atalantamos que namás nos falen de la posibilidá de dir a votar, pero nun nos afalen pa dir a votar.


Nestos anuncios atopamos la sentencia «si quies, pues votar». Y esto ye un error, un gobiernu nun tien que camentanos la posibilidá de dir o non a votar, d'exercer el nuestru drechu o dexar d'exercelu, sinón que por salú, por hixene política, debería afalanos a dir a votar, encamentanos con fuercia que votemos, que nun nos quedáremos en casa y que nos pronunciemos, pa bien o pa mal, nes urnes. El lema «si quies, pues votar» nun nos diz nada que nun sepamos, nun ufre nengún significáu nin intencionalidá reconocible. Nun-y veo xacíu si lo que se quier ye estimular a la xente al votu.


Ta claro que la baxa participación elleutoral ye malo pa la sociedá y pa l'alternancia política nos puestos de poder. ¿A quién-yos beneficia la baxa participación?, ¿a quién nun-yos interesa que tola masa potencial votante, vaya a votar?, pues ta claro, a los qu'anguaño más poder tienen, al bipartidismu políticu que ta desaniciando la nuestra identidá cultural asturiana. El PSOE y el PP saben que con que namás vayan los militantes a votar, yá tienen aseguráu un bon garrapiellu votos, abondos como pa siguir incrustaos na poltrona (bien na oposición, bien nel poder). Eso ye asina. Y los militantes van dir a votar, afalaos pol deber al partíu del que quieren sintise partícipes y útiles. Entós, toa esa masa de persones que nun tien más guía políticu que les sos propies idees, que nun se debe a nenguna xerarquía organizativa na que dexar de llau principios o callar como afogaos cuando dalgún mandamás diga que non, qu'eso del bable ta bien pal prau y pa les folixes, pero na Universidá y nos asuntos serios too na llingua cervantina, y como digo, toa esa xente que pue ser crítico ensin rendir cuentes a naide tien la oportunidá de camudar les coses. Esos nun son interesantes pal gobiernu facelos partícipes, porque sabe que lóxicamente nun votan al so favor.


Ello ye qu'entós, como digo, esi lema de «si quies, pues votar» tien vergoñosamente daqué d'esto que toi diciendo. Nun me paez acertáu esi anunciu nin esi lema. Votar nun ye una posibilidá, porque nun votar enxamas pue ser una posibilidá. Nun votar ye dexase vencer. Muncho llucharon hai años pa qu'agora pudiéremos exercer esi drechu, ¿vamos desperdiciar lo qu'otros consiguieron a base de non poques hosties físiques y morales?. Y nun ye namás eso, ye que la posibilidá enxamás ye ente votar y nun votar, sinón que les posibilidaes se dan dientro del votar: sí, non, en blancu, abstención (y votu nulu). Y nun hai más. Nun entender el significáu de qué significa caúna d'estes posibilidaes yá amuesa un gran fallu na concienciación política de la sociedá, onde'l mayor culpable d'ello ye'l gobiernu que ta por nun igualo. La obligación d'un gobiernu ye la de facer partícipes a la ciudadanía na actividá política y non dexalos al marxe.

5 abr. 2007

Yá callo

Cuando nun se tien nada interesante que dicir, val más callar y dexar falar a otros. Val más arrequexase con un llibru y deprender ente les llinies que habiten les páxines. Perdese nesa viesca simbólica que nos remite a mundos alloñaos ye una manera de vivir otres realidaes, de da-yos la oportunidá a otres persones de llegar a ti. Llees y espiertes. Namás, nesi intre, ún ta a salvu de too. Y yá callo.

3 abr. 2007

Meme

Recibí un mensaxe raru onde los haya del collaciu que lleva'l blog Esfarrapando'l mundu. Y ún, a quien-y picó la curiosidá na so xusta midida, pues pasó a enterase qué ye lo que ye eso de meme.


Nun sé hasta onde vamos llegar con esti «xuegu», pero como agora mesmo toi un poquiñín folgáu, daqué raro ultimamente, paso ensin más esplicaciones a facer rodar la bola pela blogsfera n'asturianu.


- Una tipografía: Kechupa. Eso de «junk de llitérature» o lo de «hamburgers have feelings too» llegóme al alma.


- Una páxina web imprescindible: google.


- Un blog n'otra llingua distinta del asturianu: Sairutsa, blog bien prestosu coles ocurrencies d'una amiga.


Agora tócame pasalo a tres blogs, qu'a falta de confianza voi tener qu'escoyer a bultu ente la mio llista d'enllaces.


- Blog Fiyos de Nicer.


- Blog Rapiega.


- Blog La embaxada prieta.

2 abr. 2007

Más noticies na rede

Enteréme hai poco de que'l selmanariu n'asturianu n'edición impresa Les noticies tien yá la so propia páxina web onde amuesa tamién información n'asturianu.Mesmo que tengo fecho con otros diarios dixitales dafechu n'asturianu, paso a incluyílu na mio llista d'enllaces.


Per otra parte, agradezo a Miguel Barrero que con fecha del 25 de marzu pasáu escribiere un artículu dedicáu a la blogsfera n'asturianu tituláu «La blogosfera escribe n'asturianu». Nesi artículu fai un rápidu repás resultante de lo que-y abulta qu'atopamos xuniendo «llingua asturiana» y «blog». Y l'agradecimientu ye por citar esti humilde llugar onde dacuando desfuego dempués de tragar babayoneríes polítiques d'un altor difícilmente superable. Llástima que l'enllaz qu'hai de La esfoyaza (esti blog) tea mal puestu. Sicasí, enseñáronme dende neñu que la intención puntúa doble, asina que gracies igual.