25 feb. 2007

Medra'l descontentu

Cuando nun hai fonderes ganes de facer daqué, pasa lo que pasa, que nos venden fumu qu'amás ye perxudicial pa la salú de la nuestra llingua. Y claro que ta guapu'l descomanáu enllaz que conecta l'autovía minera cola ronda Sur de Xixón, cómo nun va tar guapu, que pa daqué se gastaron los euros públicos los políticos.


Pero pásanos lo de siempre, que la ciudá l'añu pasáu aprobó la toponimia n'asturianu de manera tala que'l nome oficial ye Gijón/Xixón, en forma billingüe pa toles notificaciones alministratives oficiales. Y nesti casu han d'incluise los cartelos nes vies. Y entá voi dicir más, Llangréu tien yá de muncho enantes aprobada la so toponimia n'asturianu. Pues el casu ye que nesti enllaz de carreteres, guapu onde los haya, podemos lleer los recién estrenaos cartelos colos nomes non oficiales de los conceyos de Xixón y de Llangréu (ye dicir, escritos namás en castellanu, cuando lo oficial ye facelo billingüe, n'asturianu y castellanu, Gijón/Xixón y Langreo/Llangréu).


Son pequeñes coses, pero cada vegada que s'incumple una de les poques lleis que nos abelluguen, ye dar un pasu atrás. Habrá tar ocupada IX de Xixón faciendo llistes, sofitando planes urbanísticos desproporcionaos y n'otres xeres que-yos deben abultar más importantes, pero escaeciendo estos pequeños drechos que tienen los asturianufalantes IX namás va llograr que medre'l descontentu que per otra parte fai tiempu qu'esnala pela ciudá.

4 comentarios:

  1. Sarastur27/2/07 9:28

    Pásanos lo de siempre. Si nun oficialicen l'asturianu cómo quies que pongan carteles cola nuesa llingua?
    Si dependieran 100.000 votos de ello yá vía yo a Vicente Álvarez Areces faciendo los cursos de branu de la ALLA en Ibias.
    Carnero y Morala somos toos!!!

    ResponderEliminar
  2. Home, hai una llei qu'obliga a poner los cartelos según la toponimia oficial y la toponimia oficial en Xixón y en Llangréu ye Gijón/Xixón y Langreo/Llangréu. Por eso m'esmolez que l'únicu partíu (IX) nel gobiernu y que diz sofitar la oficialidá dexe pasar estes coses. Les lleis hai que cumpliles, toos y toes, seyas d'un bandu o d'otru.
    Pero toi d'acuerdu contigo, Sarastur, en qu'ensin oficialidá nun habrá xusticia real pa colos asturfalantes.
    Gracies por escribir.

    ResponderEliminar
  3. Sarastur5/3/07 9:45

    Toy d'acuerdu contigo en que lo que hay nun se cumple, y que empezar por ahí ye la manera de avanzar. Nun toy tan conforme colo de IX. Ye cierto que se llenen la boca y lluéu se desinflen pero, nun te paez ser un poco rompewebs (nun lo digo pa ofender, ye un mou de falar) tirando piedres escontra los únicos que faen daqué (poco, pero daqué) en vez d'atacar al problema gordu del asuntu? (y lo de gordu claramente va por el señor Areces).
    Hay que entamar por Riopedre y la neglixencia na educación (soy de Sieru, escribo un castellán que ni los de Valladolid pero nun se escribir correutamente n'asturiano, manda narices). Siguir polos ayuntamientos y acabar quitando al orondu del sillón en mayu. ¿tú qué pienses?
    Gracies a ti por facer un blog comprometíu.

    ResponderEliminar
  4. Si tienes tola razón Sarastur, el principal cáncer pa la cultura ya identidá asturiana ye esi quien tu dices, son los cabezaleros de la FSA. Y eso siempre lo dixi nesti pequeñu requexu cibernéticu.
    Pero per otra parte nun creo que tea tirando piedres escontra'l mio teyáu. Que n'IX hai bonos políticos nun hai dulda. Na última manifestación polos drechos del asturianu na enseñanza vi a Jesús Iglesias. Y yo agradézo-y que tuviere, él y tantos otros votantes d'IX que de xuru taben perhí. Agora, yo nun milito en nengún partíu, poro, nun tengo que callar «por disciplina de partíu». Pueo dicir les coses que nun entiendo y que me prestaría que m'esplicaren: cómo tando pola oficialidá y siendo parte del gobiernu, nun hai más avances en cuantes al asturianu. El de cuidar la toponimia ye un detalle, claro, pero pa munchos ye importante, pa min por exemplu. Esi esmolecimientu qu'a vegaes proclama pol asturianu, quédase en nada nestos casos nos que siguen ensin cumplise les lleis. Creo que l'autocrítica ye bona, y eso ye lo que pretendo que faiga IX (porque'l PSOE-FSA ye yá un casu irrecuperable), nun pretendo nin facer campaña en contra o al favor de nengún partíu. Un saludu, Sarastur.

    ResponderEliminar