25 feb. 2007

Medra'l descontentu

Cuando nun hai fonderes ganes de facer daqué, pasa lo que pasa, que nos venden fumu qu'amás ye perxudicial pa la salú de la nuestra llingua. Y claro que ta guapu'l descomanáu enllaz que conecta l'autovía minera cola ronda Sur de Xixón, cómo nun va tar guapu, que pa daqué se gastaron los euros públicos los políticos.


Pero pásanos lo de siempre, que la ciudá l'añu pasáu aprobó la toponimia n'asturianu de manera tala que'l nome oficial ye Gijón/Xixón, en forma billingüe pa toles notificaciones alministratives oficiales. Y nesti casu han d'incluise los cartelos nes vies. Y entá voi dicir más, Llangréu tien yá de muncho enantes aprobada la so toponimia n'asturianu. Pues el casu ye que nesti enllaz de carreteres, guapu onde los haya, podemos lleer los recién estrenaos cartelos colos nomes non oficiales de los conceyos de Xixón y de Llangréu (ye dicir, escritos namás en castellanu, cuando lo oficial ye facelo billingüe, n'asturianu y castellanu, Gijón/Xixón y Langreo/Llangréu).


Son pequeñes coses, pero cada vegada que s'incumple una de les poques lleis que nos abelluguen, ye dar un pasu atrás. Habrá tar ocupada IX de Xixón faciendo llistes, sofitando planes urbanísticos desproporcionaos y n'otres xeres que-yos deben abultar más importantes, pero escaeciendo estos pequeños drechos que tienen los asturianufalantes IX namás va llograr que medre'l descontentu que per otra parte fai tiempu qu'esnala pela ciudá.

21 feb. 2007

El ruxideru

Ye ún de los casos más sangrinos qu'asocedieron enxamás na Asturies d'anguaño. La represión a Carnero y Morala ta entrando na so fase más surrealista y vergoñosa: un xuez sentencia ensin pruebes y basándose namás nos testimonios de xente que nun son coherentes ente ellos o nos testimonios de xente que probadamente faltó a la verdá nos sos xuramentos. Veamos qué dicen güei tres de los periódicos más lleíos n'Asturies.


En La Voz de Asturias lleemos hasta tres anuncies sobre'l tema: CCOO: "El fallo de Morala y Carnero origina un peligroso precedente, La proyeccion de la prueba y Bloque por Asturias ve el proceso «propio de un sistema autoritario».


En La Nueva España atopamos güei estes dos noticies sobre'l casu del que falo: CC OO valora como un peligroso precedente el fallo contra Carnero y Morala y Que suenen alarmas.


Y p'acabar, n'El Comercio atopamos Hipocresía, carnaval y otra perlas, El Bloque por Asturies no se aliará con las fuerzas «cómplices» de la sentencia, El Poder Judicial recuerda a Valledor que el Código Penal lo aprueba el Parlamento y que debe «respetar su criterio» y Carnero y Morala denuncian la postura «oportunista» de IU.


Tol mio apoyu a estos sindicalistes. Oxalá nun dexen de salir na prensa, sobre too agora que s'acerquen les elleiciones, hemos de facer d'esto un ruxideru que nun dexe de llamar l'atención de la ciudadanía, pa que sepa qué sinvergüences tiene apoltronaos. Toos y toes somos Morala y Carnero.

19 feb. 2007

Lladriyu escontra la clas trabayadora

Vergoñosu ye tol procesu acusatoriu que tán sufriendo los sindicalistes Morala y Carnero.


Camiento que daqué hai na prensa escrita de mases n'Asturies que nun me presta un res. Y ye que si comparamos l'anuncia en La Nueva España y n'El Comercio sobre la sentencia a Carnero y Morala, decatámonos que ¡ye'l mesmu testu, pallabra a pallabra!. Entiendo qu'estos periódicos funcionen d'axencia de noticies pa llugares alloñaos, pero tamos falando de Xixón, ciudá onde tienen xente abondo trabayando los dos diarios (recordemos que La Nueva España tien edición especial pa Xixón y qu'El Comercio ye un periódicu cola so sé en Xixón), ¿qué pasa entós?, ¿nun paga la pena nin mandar ellí, al xulgáu, a un periodista propiu?, ¿nun se considera qu'esti casu tien importancia tala como pa tener información propia y nun tener que fotocopiar l'anuncia con otros periódicos?. Daqué güel a podre. Ye lo que tien tar hasta les mesmes gónades, qu'ún piensa yá mal por sistema. Y sigo ensin saber qué opina'l PP d'esto (y qu'entá nun opinaren a estes altures del partíu ye pa siguir pensando mal).


Dende equí'l mio apoyu a estos sindicalistes. No fondero, toos y toes somos Morala y Carnero.

15 feb. 2007

Si vos paez

Como camienta'l trasgu d'Areces, paez mentira que llevemos trenta años glayando lo mesmo, que les proclames, les reivindicaciones seyan les mesmes. Trenta años pidiendo dignidá pa una llingua, que por estensión tamién ye la dignidá d'un país, la dignidá de poder facer vida nuna llingua llariega.


Esta próxima manifestación del sábadu, por un sistema educativu asturianu que respete y valore la identidá asturiana, abarrunto que nun va ser la última. Dalgunes vegaes camiento que de tan seliquino qu'avanzamos nun vamos enxamás llegar al final. Y ye cierto qu'hubo llogros de gran valir (como la creación d'una institución asturiana pa curiar y normativizar la llingua, l'Academia de la Llingua Asturiana), pero son migayes que per se nun valen un res si nun hai un marcu políticu y enfotáu detrás que lo sofite too. Atalanto que son llambionaes que nos dexen pel camín p'acallanos un ratiquín. Nun sé, quiciás toi pesimista güei. Sicasí, vémonos n'Uviéu esti sábadu si vos paez.

12 feb. 2007

Pel camín drechu a la drecha

Dende'l mio entender, la represión qu'anguaño sufren dos sindicalistes ye de llibru. Y too col apoyu direutu de los principales partíos que gobiernen Xixón (por cierto, los mesmos que gobiernen Asturies), porque hai munchos puntos escuros nesti procesu qu'entá tán por esplicar. El PSOE xixonés diz nun querer saber nada, como si la cosa nun fuera con ellos, y IX diz apoyar a los sindicalistes pero de lloñe, que yá se sabe qu'eso de xugar a dos bandes ye lo que tien.


Pero ¿y el PP? Llámame enforma l'atención que'l PP d'Asturies atope siempre cualquier sida pa poner a parir el gobiernu d'Areces y toos recordamos les declaraciones d'Ovidio Sánchez, por exemplu, nel famosu casu del llibru publicitariu sobre Asturies que se repartió gratuitamente a gran parte d'asturianos y asturianes. Nun tardó en salir esti políticu a pidir esplicaciones, dimisiones, comparecencies y la madre que nos parió, qu'eso ye mui gordo, gastase perres de toos y toes en llibros panfletarios. O por exemplu, el mesmu día en que se cellebró'l segundu xuiciu a Carnero y Morala, sal a la palestra'l principal peperu asturianu a glayar contra unes interpretaciones estadístiques sobre educación qu'una conseyería ayeri espublizó.


Magar too esto, entovía nun atopé nengún aspavientu políticu del PP sobre'l casu Carnero y Morala. Porque esto sí que ye pa echá-yoslo a la cara a los actuales socios de gobiernu en Xixón o Asturies. Y yá se sabe cómo se les gasten los políticos d'esi altor, que nun tarden en facer lleña d'árbol caíu nin un nanosegundu, que les elleciones tan ehí. Sicasí, Ovidio nun diz un res sobre esti casu, ún de los más graves incidentes en Xixón y n'Asturies contra la clas obrera y de clara represión y vengatismu políticu. ¿Por qué nun denuncia tamién esti enguedeyu'l PP?, ¿por qué nun apoya a dos sindicalistes acusaos inxusta y falsamente? Y claro, ún qu'intenta ser críticu y que yá nun piensa bien de naide, atalanta que si Carnero y Morala tán na situación que tán, perseguíos por mafies polítiques, ye por denunciar y querer poner frenu a la especulación urbanística en Xixón que conlleva la eliminación de puestos de trabayu. Y esta llucha sindical nun la entamaron precisamente ayeri, sinón hai munchos años. De fechu, tol plan urbanísticu de luxu que se ta pensando pa la zona de poniente nun ye d'agora, surdida nún o dos años. Sinón que yá s'entamó a planear y a crear un plan d'eliminación paulatinu d'elementos discordantes y pilancos a esi plan, como yeren (son) los astilleros qu'hai ellí. Toi falando de quiciás diez o quince años que se lleva en Xixón trabayando nesa direición. Habría qu'entrugase, quién gobernaba n'Asturies daquella.


En fin, llástima qu'hasta nes sos crítiques al PSOE (que comparto dafechu) el PP siga pel camín drechu a la drecha.

8 feb. 2007

Yo yá lo sabía

Diz Aznar, ex-presidente del gobiernu español que metió daquella a España nuna guerra n'Iraq pa defender los intereses bélicos d'EE.XX. magar qu'una montonera xente español como enxamás salió a la cai dende que tengo usu de razón dicía-y que non, manifestándose per toa España, que lo de les armes de destrucción masiva yera una sida norteamericana pa facer negociu onde sobre too xente civil diba morrer y sufrir, pues resulta qu'agora diz que Todo el mundo pensaba que en Irak había armas de destrucción masiva, ahora sé que no. ¿Y les miles, de xuru que millones, de persones que salieron a la cai?, ¿nun sabíamos yá daquella lo que tu, sinvergüenza, tas diciendo agora?

5 feb. 2007

La banca siempre gana

La sociedá ta apigarzada. Atopéme con esta anuncia navegando per internet, Los cinco grandes de la banca ganaron 17.415 millones en 2006, un 31,54% más.


Mentanto la xente cotidiano pensamos que lo importante ye'l fútbol, que si'l mio equipu sube o baxa o se-y amplia'l plazu pa pagar les deudes acumulaes, que yá se sabe, que l'equipu nun tien culpa, que la xunta direutiva ta enllena de robaperes y qu'hai qu'apurrir dineru d'onde seya, que si a min nun me conceden una ampliación de la hipoteca ye normal, pero al mio equipu non, home, eso non, pol amor de dios, que sinón qué voi facer yo los domingos; o que lo importante ye ver esi programa nel qu'un pseudoperiodista esbabaya pa dexar a l'altura la mierda a cualquier personaxe, que pa daqué ye famosu y sinón que s'aguante, qu'en mio vida nun se meta naide, qu'equí nel portal hai munchu cotilla y si yo falara del del cuartu drecha a les hores qu'aporta per casa y con quien, pero voi callar, que soi un señor, pero esa, esa de la tele de tetes operaes, porque se-y noten que ye una barbaridá, a esa que-y saquen tolos trapos sucios; o non, que nada d'eso ye importante, que lo importante ye ver un programa onde un garrapiellu rapaces canta bien o mal o, bono, eso da lo mesmo, porque mira que son guapos, el próximu casting voi dir yo que de cantar nin idea, pero pa gayasperu naide me gana, qu'eso de dir vestíu según marquen los patrones más horteres de les grandes firmes (que pa daqué son grandes firmes, pa marcar patrones horteres) me gusta enforma, pa llueu vende-yos los discos, bono, vende-yoslos a quien los merquen, porque lo del e-mule ye de persones males, males, ensin corazón, que roben l'alma y los dineros a xente bono, bono, pallabrina de la SGAE.


En fin, qu'eses anuncies que la mayoría nun miramos, son les que de verdá importen, anque nun les entendamos. Si los pisos tán peles nubes, pues nada, les hipoteques más beneficios darán. Y asina los pocos s'enriquecen gracies a los munchos. Si yá lo dicía un amigu de mio, la banca siempre gana y los que tán nella siempre son los mesmos.