3 ene. 2007

Yo nun me creo nada, ¿y tu?

Ente tantu espumillón, boles, lluces y sobre too merques d'estos díes, atopamos a los políticos, que nun pierden la oportunidá pa facer campaña electoral. Les campañes electorales paecenme mui bien, polo menos na so concepción orxinal, la de dar a conocer a los votantes les futures promeses. Lo malo ye facer promeses que llueu nun se cumplen, y eso n'Asturies sufrímoslo siempre.


Hai unos díes facíen-y una entrevista al máximu dirixente del PP nun conocíu periódicu xixonés. Ovidio Sánchez, peperu conocíu, respondía sobre la posibilidá de la oficialidá del asturianu que «No es un debate que esté abierto. Ya hay una ley que regula su uso, agotemos ese camino. Hay temas que en el Estatuto ya se recogen bien y éste es un ejemplo». Y claro, ún que yá tien dalgunos añinos y nun se chupa'l deu, apláude esa sinceridá, por muncho que nun comparta'l so conteníu. Qu'un políticu nun utilice l'ambigüedá n'asuntos de talu altor ye d'agradecer, pa tar avisaos.


Pero ai amiguinos, resulta que güei, según recueye'l diariu dixital Asturies.com nun artículu tituláu «Reinerio Álvarez Saavedra afirma qu’hai que dir a una redacción “más ambiciosa” del artículu cuartu del Estatutu» resulta qu'atopamos un garrapiellu de peperos tamién conocíos que tán por remocicar l'artículu del estatutu d'autonomía asturianu que-y toca al asturianu. Si bien ye cierto que nun falen abiertamente d'oficialidá, si qu'amuesen el so esmolecimientu por resolver o dar dalgún pasu p'alantre nel tema llingüísticu. Y claro, ún que yá tien dalgunos añinos y nun se chupa'l deu, entrúgase qué pasa equí, ¿nun hai comunicación ente los propios miembros del PP?, ¿o ye que xueguen a facer campaña electoral pa llueu facer lo que ficieron los que tán, nun cumplir?, ¿a quién facemos casu, al máximu dirixente del PP n'Asturies o a esti grupín de miembros del PP? El casu ye que como mínimo sorprenden eses contradicciones peperes, y tando les coses como tán, yá nun me creo nada (y oxalá m'equivoque).

4 comentarios:

  1. seique nun t'equivocas, más que me pese. You inda nun tengo claro el miou votu, si en blancu ou nulu. Porque nun quiero siguir dando-ys de comer a los mesmos aguarones de siempre. Colo del PP ya la oficialidá, nun me creo nada, entovía nun hubo nengún peperu que dixera: "vamos pedir la oficialidá". Con ese datu peime que yia abondu pa saber por onde van.
    Por cierto, quedóte guapu el cámbeu estéticu nel blog, ties que dicime cumo faes pa poner una semeya nel cabeceru.

    ResponderEliminar
  2. Yo toi ente dir a les urnes o a la playa, porque va a tener la mesma repercusión nesti país. Diré a les urnes por concencia, non por ilusión...

    ResponderEliminar
  3. Gracies a los dos por contestar. Pa «esfarrapando'l mundu» dici-y que tola razón. El problema, yo creo, ye que naide nel PP fala de la oficialidá por mieu al partíu, y eso, que ye lo que debe pasar nel PSOE, ye pergrave pa la conciencia individual.
    Y gracies polo de la meyora estética. Voi mandate un mensaxe dende'l to blog pa dicite cómo fici lo de poner una semeya. Saludos.

    ResponderEliminar