20 nov. 2006

Resaca pola oficialidá

Tamos en díes dempués de la manifestación del sábadu n'Uviéu. Ellí aconceyamos unes 15.000 persones, según los organizadores (Conceyu Abiertu pola Oficialidá) y según yo, que tuvi ehí. La verdá, los númberos, pa estes coses, dan lo mesmo. Da lo mesmo que lo reivindiquen cuarenta que cuarenta mil persones. Y da lo mesmo porque ye un drechu, un drechu básicu llinguísticu. Nun soi homosexual, pero ehí taré siempre pa defender los drechos d'eses persones, dame lo mesmo que na mio ciudá vivan cuatro homosexuales o cuarenta mil.


El problema ye que la FSA nun s'entera de nada. Y sigue erre qu'erre poniendo pilancos y torgues al desendolcu llingüísticu pol que venimos naguando tantes y tantes persones, falantes y non falantes d'asturianu.


Y El Comercio sigue faciendo de les suyes, el domingu nun-y dio semeya de portada a la manifestación, y arriendes d'ello terxiversó datos y cifres (dixo que los organizadores dixeron que fueren 10.000 persones, cuando en realidá -yo tuvi ellí y oyilo- los organizadores dixeron que fueron 15.000 persones). Pero güei llunes, ¿qué vemos nesi diariu panfletariu pro-FSA?, pues na primera llana una semeya de la manifestación col encabezáu «PSOE y PP afirman que «las manifestaciones no modificarán» su rechazo a la oficialidad del asturiano». Vamos, que la manifestación en sí nun merez llugar privilexáu nel diariu, pero les declaraciones d'estos partíos sobre ella sí. Yá, y eso lo fai pa informar. Yá, y yo chúpome'l deu.


L'asturianu, por muncho que-yos duela asumilo a munchos ye una patrimoniu llingüísticu asturianu qu'hai que defender, protexer y dignificar. L'asturianu ye llingua, como otra cualquiera. Y mentanto tengamos los políticos que tenemos, siguiremos siendo'l culu d'España (y non solo no llinguístico o cultural).

2 comentarios:

  1. Cuido que nun miraste bien los periódicos d'esti día. El Comercio foi, el que meyor trató la información so la manifa. El tema de los númberos paezme menor (6.000 y 10.000 foi la primer estimación que se diera enantes de qu'acabara la marcha). Pero El Comercio, nes sos ediciones d'Avilés y Uviéu, dio-y la semeya de portada a la manifestación. LNE y LVA non. Y tamién foi l'únicu que recoyió les repercusiones, en primera. Nel restu, como si pela cai Uría hubiera pasáu un Alsa: un res.

    ResponderEliminar
  2. Home, refiérome siempre a les ediciones dixitales. Y lo de les cifres pa min sí tien importancia. La esplicación esa de que yeren cifres d'enantes qu'acabare la marcha pues qué quies que te diga, menudu periodismu, non? En cualquier casu, gracies por dexame mensaxes. Saludinos.

    ResponderEliminar