29 ago. 2006

Un exemplu de capitalismu: la Bayer

Toi dafechu ablucáu, xúrolo. Resulta que taba lleendo'l periódicu (ún de los cuatro a los que-yos suelo echar una güeyadina) y atopéme cola noticia que va darréu «Bayer mantiene el beneficio semestral y suprimirá 1.500 empleos en su unidad agroquímica» espublizada güei n'El Comercio. Sí, sí, como tais lleendo, la Bayer algamó 1.052 millones d'euros de beneficios nel primer semestre del añu en que tamos. Y como paez que-yos abulta poco, pues van eliminar al rodiu de 1.500 emplegos pa reducir costes. ¿Nun ye esto ablucante?, ¿nun ye indecente ganar eses perres y querer entovía ganar más a costa de suprimir puestos de trabayu?, ¿ye esti'l mundu que queremos dexar pa los nuestros fíos?, ¿ye esta la moralidá que nos convién, ye dicir, la de too pol dineru?.


El capitalismu, ente otres coses, afitó na sociedá la idea d'algamar más y más dineru, a costa de lo que seya. El dineru yá ta, pa esti modus vivendi penriba'l bien y el mal, penriba de la xente. Lo peor ye que lo asumimos, yá nun nos llama l'atención. De xuru que la xente que llee esto (si ye qu'anguaño lo llee dalguién) nun se decatara d'esta anuncia nos periódicos.


¿Qué podemos facer?, ¿dexar de mercar productos de Bayer?, por desgracia nun creo qu'eso sirviera, porque lo bono sería una acción en masa, cuasi mundial, pero eso ye yá una utopía, cuando los medios de comunicación tán al serviciu d'intereses ocultos y los poderes. Lo único que nos queda ye esti mediu, internet, pa tar comunicaos, pa saber d'informaciones alternatives, pa pensar llibremente. Espero que los nuestros fíos deprendan que penriba del dineru a esgaya, tán otres families que tamién tienen drechu a facer planes de futuru.

3 comentarios:

  1. De xuru que en Lada tienen toles papeletes porque produz muncho y en EEUU que ye onde más ganen ye onde más xente quieren echar...

    ResponderEliminar
  2. Miguel Anxel2/10/06 6:36

    si ho ya asi vei el mundu ya'l nuesu pais cagon ros..
    hai que acabar con los fartones ya'l capitalismu ....

    ResponderEliminar