11 jul. 2006

Republicanu, con más fuercia entovía

Llevantéme ceo, pa facer dalgunes coses que tenía pendientes, yá sabéis, a quien madruga dios lu ayuda, o eso dicen dalgunes persones y anque se seya atéu o agnósticu, nunca vien mal tener entidaes positives del to llau, nun vaya ser qu'ún s'equivoque (sicasí, reconozo que ye pa duldar eso de que dios -el cristianu o musulmán, por ser los más espardíos- seya una entidá positiva, porque echando una güeyadina al mundu, nun ta la cosa como pa da-y gracies por nacer y sabiendo amás que too lo pue, atalanta ún nesi pocu enfotu en meyorar ciertes coses que podríen facer del home y la muyer meyores seres).


Seya como fuere, a les diez de la mañana yá taba yo dándo-y un repasu a los periódicos que suelo mirar. Y como nun podía ser d'otra manera, ehí, nesi periódicu pro-FSA (por si dalguién nun sabe a qué se refieren estes sigles diré-yoslo yo: Federación Socialista Antiasturiana) llamáu El Comercio atopéme con una d'eses noticies que lu faen a ún ferver per dientro. L'epígrafe dicía lo que va darréu «Bueno critica la condena al franquismo de la UE y califica la República de "golpe de estado"». Nun ye que me coyera despreveníu, porque de Gustavo Bueno (y de dellos buenistes confesos) yá conozo salides d'esti altor. Más que nada porque tuvi la suerte d'estudiar embaxo'l so adoctrinamientu. Sí, lleístis bien, digo suerte porque namás asina pue ún dase cuenta de les munches coses que diz y pueo falar con conocencia de causa. Faime gracia toos esos que lu respeten y lu combayen, nomándolu «profesor» anque enxamás-yos diera clas y que lu xuben a pedestales ensin tener lleío la so obra, ensin entender el tresfondu de la so filosofía. Cenciellamente Gustavo Bueno tien el llugar respetable que tien pola complacencia y la inorancia de xente que ta en cargos de poder, que como nun quieren quedar de lo que son, ye dicir, d'inorantes, pues rin-y les gracies al Bueno y acaten lo que diz ensin dicir un res. Pero bono, eso n'Asturies ye vezu normal ente los políticos, eso de nun tener nin idea de daqué y ponese a sentar cátedra o defender postures ensin argumentos (por exemplu, sobre temes llingüísticos).


El casu foi que me punxi a lleer la noticia, sabiendo que diba acabar enfurruñáu y coles vidayes ferviendo. Que la II República fuera tomada por un grupu de dreches ta perclaro, pero eso nun quita pa que la República, como estructura y conceptu de gobiernu, seya meyor que la monarquía qu'anguaño hai n'España. Quiero dicir que ta desprestixándose la República (en sentíu xeneral, como conceutu) por culpa del gobiernu de la II República. Ta perclaro que'l poder que taba na II República, represora de drechos básicos (bien lo sabemos n'Asturies) nun foi daqué bono pa repetir. Pero lo que nun hai que repetir ye'l gobiernu, non la forma de gobiernu (la República). Ta perclaro qu'hai maneres d'entender la democracia, pero los atentaos escontra los drechos humanos más básicos que s'asoceden n'EE.XX., onde gobierna una supuesta democracia, nun tienen que facenos pensar que la democracia nun seya la forma de gobiernu más amañosa pa una sociedá. Gustavo Bueno, neses declaraciones ta cometiendo un error, identificar una forma de gobiernu, col gobiernu mesmu que lu contién. Nun se pue defender una dictadura por muncho que'l gobiernu anterior tamien lo fuera. Eso ye daqué que los asturianos tamos más que fartucos d'oyelo, refalfiaos de sentir, eso d'énte una crítica d'un partíu a otru dicir «tu más».


Con estes declaraciones (sobre les de la defensa del franquismu o la so crítica a postures d'izquierdes ya indixenistes como les d'Evo Morales) Gustavo Bueno defínese próximu a eses idees neocapitalistes, qu'asumen la fuercia del dineru y de los países más ricos. Ye una pena qu'una persona, que se noma filósofu, caiga nesa complacencia y arriendes d'ello quiera xustificalo. Pero tenemos que saber velo. Nun tenemos que dexar que nos taragañen la parte de razón que llevamos, por munchu renome qu'haya tres d'eses pallabres. Les idees d'esti home, de la drecha pro-neolliberal, tienen que servir pa caltener les nuestres idees con más fuercia entovía.

3 comentarios:

  1. Bones, acabo d'aterrizar nesti mundu de los blogs y prestome asgaya encontrar coses como esta.
    Yo tamién lleí al Gustavin sacando la llingua a pacer n'El Comercio. Na ye llamentable lo que pasa equí, da-y la cancha que-y dan a esti elementu, senil, momia que reniega del so pasau comunista p'allinease col comandu neo-lliberal que ta tan de moda agora n'España. Dende esti filosofu de tres al cuartu, a historiadores de pacotilla como Pio Moa o Cesar Vidal, pasando por locutores del odiu como Losantos y politicuchos que-yos dan cancha, esti país nun tien igua, nin tampocu l'Estau español. Mal vamos cuando esta xente vomita visceres y odiu nos medios y encima dexase-yos dicir lo que-yos pete.
    No referente a la República prestame lo que dices, esi matiz ente'l sistema de gobiernu en si y la propia hestoria de lo que foi. A la izquierda nesti país fainos falta un "esamen de conciencia" pa dir dandonos cuenta que la República nun foi esi paraisu utópicu que mos pinten, nin tampoco los partíos d'izquierda fueron tan demócrates nin tan defensores d'ella como mos quieren facer creer (nin el PCE nin la xente d'Indalecio Prieto creíen na República burguesa). Ta bien lo de ser republicanos, pero pa ello hai milenta motivos y coses pa xustificalu ensin facer falta recurrir a la mitoloxía republicana, que ta bien saber qué pasó, pero nun ye imprescindible pa xustificar la postura republicana anguaño.
    Na, pues un saludu y prestame'l to blog asina que vas direutu a los enllaces del mio.
    Un abrazu.

    ResponderEliminar
  2. Gracies amigu por collaborar col to comentariu. Yo soi republicanu por oposición a la monarquía, por xusticia, democratización de poderes ya igualdá d'oportunidaes ente tolos ciudadanos. Pero la República, de por sí, nun crea un mundu más xustu, too depende del arrieru que remane les riendes.
    Apúntote agora na mio llista d'enllaces.

    ResponderEliminar
  3. Muitas gracias pol to comentario ya'l to sofitu. Siguiremos en contauto.
    (por cierto, ties un blog bien guapín)

    ResponderEliminar