8 may. 2006

Los cuadros en Madrid y la cultura asturiana

Lleo con atención los alderiques al rodiu de los cuadros que Carmen Cervera quier preservar (con tol enfotu que munchos quixéramos pa los nuestros políticos) de manera enfocicada. Diz que va negase per tolos moos posibles al establecimientu d'una avenida d'altu tráficu al llau'l so muséu. Nun entamu paecióme too perbién, caún tien el drechu de defender lo que-y pete, por mui estraño y raro que nos paeza a los demás (siempres y cuando nun entre en conflictu con normes morales y llegales). Pero resulta que los cuadros, en casu de facese la vía que tanta medrana-y cuela pel cuerpo a Cervera, van tar dientro un muséu. No fondero, taríen abellugaos del tráficu por bones construcciones que los caltuvieren bien protexíos, de manera tala que los fumos y materies contaminantes taríen controlaes más que nun quirófanu. Nun creo qu'una señora como ella, con tanto amor pa col arte pintao, mirase muncho les perres (más que nada porque les tien y de sobra) nesos menesteres.


Por embargu, vien a la mio mente una obra d'arte, nun digo que meyor nin peor, namás otra obra de arte. Pero que pa min, pa tolos asturianos y pa tolos historiadores, de xuru que nos produz una tenrura especial polo que significa pa una cultura tan desprestixada como la nuestra. Y refiérome a la Ilesia de San Xulián de los Prados en Santullano (n'Uviéu). Pa quien nun lo sepa, trátase d'una ilesia que foi declarada «Monumentu Históricu-Artísticu» en xunu de 1917 y «Patrimoniu de la Humanidá» el 2 d'avientu de 1998. Resulta, como poco, interesante'l por qué de tales denominaciones. Ye esta ilesia la más antigua construcción del prerrománicu y la d'un mayor tamañu, que foi posible por Alfonso II, allá pel sieglu octavu. Destaca dientro d'ella unes pervalioses pintures (decatáivos de los años en que foi construida) con temes inspiraos nel arte profano romano. Arriendes d'estes pintures y de la so arquiteutura, camiento que ye una de les construcciones más emblemátiques de l'arquiteutura prerrománica n'Asturies, yá que ye única na so construcción y estética.


Y agora vien lo vergoñoso. Esta ilesia allúgase na zona de Santullano (Uviéu) y xusto al llau mesmu d'ella atopámonos cola autopista A-66 (sí, sí, lleístis bien, autopista) asina que podéis imaxinar tolos fumos, materiales tóxicos y vibraciones del tráficu rodao (camiones y autocares constantes pasen tolos díes perhí) que representa too ello. Pal que nunca la viera enxamás, dici-y que l'autopista ta a pocos metros de la ilesia, vamos, que sorprende esta cercanía. Pienso entós nos cuadros de la Cervera y de lo que se ta falando pola so protección. Pienso nel error urbanísticu, na aberración que supunxo la construcción d'una autopista al llau de tan históricu y artísticu monumentu (tuvi cinco años de la mio vida viendola tolos díes cuando estudiaba y l'autocar pasabe delantre d'ella enantes de que me posara pa dir a la facultá). ¿Ónde tán les responsabilidaes polítiques d'esti agraviu a un interés artísticu ya hisóricu de toos (non solo asturianos)? Ye una pena que pa lo nuestro, pa la nuestra cultura ya historia, tengamos tan pocos güeyos y enfotos. Y que veamos cómo los demás defienden les sos posesiones artístiques (por cierto, movibles) mentanto n'Asturies ta asocediendo'l xenocidiu d'una cultura que namás va quedar en cuatro pallabres nos cartelos de les fiestes de práu. Que nun tenga visto artículos (nos periódicos) faciendo tala comparanza (ente los cuadros de la Cervera y la Ilesia de Santullano) ye una pena, porque significa qu'asumimos estos errores como vezos normales n'Asturies, como resignación énte polítiques vergoñoses. Yá que nun vamos poder arreglar esta pergafa decisión política n'Uviéu, polo menos nun escaezamos lo malo que se fizo too. Pensáilo durante toos estos díes en que tantu bombu se-y ta dando (y se-y dará) a la polémica avenida al llau del muséu de la Cervera.

3 comentarios:

  1. Un blog ejemplar.La cultura y la lengua de Asturias tienen que ser potenciadas.
    Puxa Asturies y Puxa'l País Llïonés.

    ResponderEliminar
  2. Gracies Coronel Kurtz poles tos pallabres. Yo yá viera'l to blog fai tiempu (y prestóme) y si nun te dexé nengún mensaxe foi porque'l to blog nun me lo permitía (por nun tar rexistráu nesi tipu de blogs). Un saludu dende Asturies.

    ResponderEliminar
  3. Suscribo les pallabres del coronel

    ResponderEliminar