3 abr. 2006

La güeyada de la mio gata

La mio gata yá tien dellos años d'esperiencia pente'l mundu del ser humano. Ta acabante facer unos nueve añinos y camiento que, no que tien de vida, ye más llista que lo que podamos ser les persones coles que vive. Paez mentira pa un ser con una mente (supongo) más cenciella que la nuestra lo rápido qu'entiende les coses. Dende un puntu de vista conductista pue paecer fácil d'entender el procesu pel cualu'l mundu queda asimiláu pente les neurones gatunes. Namás ye una especie d'esperiencia tres d'otra, y d'ehí va sacando les coses positives y les negatives, repitiendo les primeres y evitando les segundes.

Pero hai qu'amestar a esto'l fechu de que la mio gata (supongo que tolos demás tamién) davezu te mira con carina picarona, y aldovíno-y dacuando una especie de sonrisina nel fociquín. Pienso entós si tendrá sentimientos, si sabrá y gociará de lo que ye la felicidá, si se pondrá triste por coses asemeyaes a les nuestres, si toa esa bayura de sentimientos (dende la tristura o señardá, hasta'l gociu y felicidá dafechu) tendrán llugar nel so corazoncín, tan pequeñín él.

Quiciás soi yo'l que-y otorga esti paecer, el que quier creer que tamién «piensa» como podamos facelo nosotros. Acaríciola y falo con ella como si fuera una persona (tolos que tenéis mascotes sabéis a lo que me refiero), que no fondero, ye una forma de falar con ún mesmu.

Pero lloñe del conductismu, nesti casu creo más en daqué místico, en daqué poco esplicable. Y non por ello menos científico, nun hai más que pensar nel principiu d'incertidume de Heisenberg. Eso pasa colos gatos y animales domésticos, l'observador influi no observao. La mio gata ye como ye, entós, porque ye de mio. ¿O seré yo como soi porque m'agüeya la mio gata?

1 comentario:

  1. La mio perra tien 16 años, que se diz pronto pero ye más de la mitá de la mio vida. Toy segura de que piensa, aunque nun sea de la mesma manera que pensamos los seres humanos.Munches veces tien pesadilles y mueve les patines y gruñe cuando ta dormida. Igual suaña que un pantasma quier quita-y los xuguetes.Oxalá toles persones fueramos un poco más animales y menos besties...

    ResponderEliminar