2 feb. 2006

Sobre un Partíu Español

Pues nada, dempués de lleer les declaraciones del secretariu xeneral de la FSA (ye dicir, Federación Socialista Asturiana, que de Socialista yá me diréis qué tien) y de les últimes de la Conseyera de Cultura del Principáu d'Asturies Ana Migoya, nun pueo más que quedar enforma ablucáu.


Pa entamar, hai tiempu que vengo pensando qué tien el PSOE (falando, polo menos, n'Asturies) pa siguir calteniendo les sigles que tien. La «S» perdióla nun sé cuantayá y ensin ella nun tien sentíu, tampoco, la «O». Ta perclaro que'l PSOE ye un Partíu y que ye Español, lo primero porque fizo los trámites afayadizos pa presentase a unos comicios (talamente como lo faen les Asociaciones pa rexistrase como Asociación oficial y poder gociar de les ventayes y obligaciones que-y otorga l'alministración) y lo segundo porque fala perbién l'español (o castellanu) y nun fai más que mirar pa Madrid.


Pero al marxe de la verdadera filiación política según les calces que marquen les sigles del partíu. Ye ablucante, como entamaba, escuchar les declaraciones de los ¿socialistes? que tan nel poder. Lleguen a dicir que la oficialidá de la llingua asturiana ye una imposición. Y dempués de tala babayada quédense tan contentos. Y lo que ye peor, nel so puestín bien pagáu n'alministración. ¿Cómo unos políticos s'atreven a falar de cuestiones filolóxiques o sociollingüístiques ensin sofitos de filólogos o sociollingüístes?. Ye dicir, si yo soi político y quiero facer una autovía, nun pueo dicir que l'autovía va pasar per onde me dea la gana, sinón que tengo que tar avaláu por inxenieros, topógrafos, urbanistes y pue que por xeólogos. Namás conociendo les opiniones d'estos espertos nel tema y siguiendo les sos valoraciones y propuestes, pueo yo escoyer la meyor solución. Pero equí non, equí unos políticos, ensin conocimientos de filoloxía nin de sociollingüística, dicen lo que piensen, apurriendo de pasu tolos sos prexuicios ya inorancia al ciudadanu. Y esto namás pasa equí. Y queden tan contentos, como dixi, nel so puestín. Lo peor ye que tienen nel so poder encuestes sociollingüistiques y un estudiu de valoración de la cooficiliadá que son positivos. Ye dicir, que tan al favor de la oficialidá del asturianu y sofítanla. ¿Cómo ye eso?. ¿Nun-yos cae la cara de vergoña?.


Nun ye por nada pero IX-BpA yá pue dir espabilando. Digo IX-BpA porque tan nel poder en coalición. Anque si yo fuera ellos, hai tiempu que tuviera rotu'l pautu de gobiernu. N'Asturies y en Xixón. Caltenese al llau de talos babayos (nómolos asina poles babayaes diches, ye dicir, polo de dicir que la oficialidá ye imponer) nun fai más que desprestixar un/os partíu/os qu'aspiren y prentenden ser d'izquierdes. Quiciás yá lleguen tarde y tuvieron más de la cuenta sentaos ehí al llau, quiciás debieron marchase enantes. Nun voi ser yo quien-y quite la razón a quien diz qu'IX morrió cuando marchó Julio Anguita.

3 comentarios:

  1. El problema ye otru... ye\'l d\'un pueblu al que-y diz un representante políticu (parlamentariu pa más señes) que\'l so partíu nun respeta namás que les llingües oficiales y que l\'asturianu nun ye (cuando\'l so partíu ye\'l responsable de nomar oficiales a unes sí y a otres non) y la sociedá que lu vota quédase tan tranquila. Pues ca ún tien lo que se merez... o si prefieres otru refrán: el mundu nun ye como ye, ye como nós dexamos que seya...
    Salu2

    ResponderEliminar
  2. Espero qu'agora me dexe escribir esti puñeteru blog que nun m'asoleya los mensaxes. Diba plantegar el tema del votu en blanco. ¿Si fuese masivu nun sería efeutivu?
    Tengo una teoría sobre porqué la xente vota lo mesmo pase lo que pase: muncho o al menos na mio zona debe favores (puestos nel ayuntamientu, suvenciones..)a esos. Tamos más corruptos que n'Italia, lo que yá ye dicir. Esos favores paguense nes urnes (y tamién con otros favores) y nun solo vota quien debe sinon tamién padres, fíos y demás familia. Al puntu ta la cosa que los amigos nun me creen cuando digo que yo nun quiero enchufes nin quiero trabayar debiendo nada. ¿Toi lloca por ser una llicenciada parada y con principios? Suena falso que nun quiera enchufes...que prefiera ser lleenda urbana que quedame a toa costa...¿nun ye terrible que nun se lleve la integridá?

    ResponderEliminar
  3. El Partíu Carlista d'Asturies llucha pola reconocencia de la llingua asturiana, asina como pola autodeterminación de lus pueblus.

    ResponderEliminar