8 ene. 2006

La RTPA entama

Ayeri, como toos de xuru sabéis, retresmitióse'l partíu ente'l Sporting de Xixón y el Ferrol pela canal autonómica. Esa que tien como logotipu una «a» que fueron a diseñala n'Inglaterra, como si n'Asturies nun hubiera bones empreses diseñadores, o persones capacitaes; porque qué queréis que vos diga, pa facer el diseñu que ficieron tampoco me paez que ficiera falta salir d'Asturies. En fin, seya como fuere, el casu ye qu'ayeri tuvieron tresmitiendo'l partíu de fútbol esi.


Yo tuvi mirandolu un ratín. Y si vos digo la verdá, nun lu miraba pol interés que podría tener dalguién que fuera de Xixón (que lo soi), sinón que lu taba mirándo cola ilusión d'alcontrar una alegría. Pero nun tuvi alegría tala. Ye cierto que taba esperando un poco de llinga asturiana, que punxeren cartelos, que ficieren comentarios n'asturianu, pero nada. Quedóse too nun partíu más, abondu ramplón.


Nun entiendo, si lleemos l'Estatutu d'Autonomía, la Llei de Promoción y Usu del bable/asturianu y amás-y sumamos el Plan de Normalización Social de la Llingua Asturiana del gobiernu que ta nel poder paez que la creación del ente autonómicu asturianu diba trayer con él (como un siloxismu aristotélicu) una importante presencia de la llingua asturiana falada nella. ¿Cómo una alministración va normalizar una llingua (que reconoz qu'esiste y qu'almite como padremoñu asturianu) si nun ye falándola dende l'alministración?, y si esta alministración crea un mediu de comunicación tan poderosu pal averamientu a un estándar llingüísticu, ¿nun vien darréu l'usu de la llingua asturiana de manera importante nesi mediu conociendo la fuerte diglosia qu'esiste nel país asturianu?.


Yo lo que sé ye que como asturianu dame vergoña la política asturiana. Y nun quiero ente autonómicu, que toos sabemos que pa lo que va servir ye pa la manipulación y pal usu del gobiernu de turnu (más entovía sabiendo que van primase na parilla los programes informativos). Namás taría d'acuerdu con una radiu y televisión autonómica si nella tuviera presencia abonda l'asturianu (yá pa mentinos que nos mientan n'asturianu).


Nin siquiera ganó'l Sporting de Xixón. Fuime pa la cama atristayáu.

3 comentarios:

  1. Lo del Sporting paez que me da lo mesmo, pero lo de la Tv ponme de una mala baba que nun veas. la única utilidá que-y veía yo al gastu desproporcionau nuna tele (caro, como n'asturies lo que sobren son perres) yera la socialización y promoción de la llingua asturiana. La verda ye que tampoco debería molestame porque como Tinín siga tirando el dineru nun va a quedar mocedá n'asturies pa falar la llingua. Casi que me pongo a ver TV3 que el catalán va a servime pa más

    ResponderEliminar
  2. zato-ino17/1/06 2:48

    Home la tv tamién sirve pa dar trabayu a dellos profesionales y, sobre too, si se fai bien, pa desarrollar un sector audiovisual nel que tamos a años lluz con relación a otres comunidaes.

    ResponderEliminar
  3. a mi k me tan dexando sin subenciones cmo a otros tantos estudiantes xa poner una tv y encima k nun nos la pongan n\\\\\\\'asturianu tien delitu

    ResponderEliminar