26 dic. 2006

Asturies, sufrilo pa creyelo

Diba poneme a falar un poquiñín d'estes fiestes navidiegues, del trunfu del capitalismu y de perda de personalidá, pero ye que lo de Xixón yá ye increible. El Conseyu Asesor de la Llingua Asturiana de Xixón (que formaba parte asesora de la Oficina Municipal de la Llingua d'esti conceyu) decide dimitir énte la pasividá y la falta d'enfotu real del gobiernu de Xixón, que pon torgues y pilancos al desendolcu de polítiques llingüístiques. Recordemos qu'esti Ayuntamientu de Xixón ta formáu por PSOE-IX, y la conceyalía responsable de la Oficina Municipal de la Llingua llévala IX.


Esta dimisión, valiente y coherente col puestu en que se ta. Dende equí, chapeau a esi conseyu que nun tien remielgos en llanta-yos a los políticos que tenemos lo que piensen, faltaría más. Esa actitú ye la que deberíemos tener toos y toes.


Y claro, les declaraciones de los políticos pa xustificase ye vergoñosa. Jesús Montes Estrada, persona qu'escaeció lo que ye la verdadera izquierda n'Asturies, diz que la dimisión ye una postura «poco valiente y poco honesta». ¿Poco valiente?, non señor, poco valiente ye callar como afogaos, que ye lo que tais faciendo vosotros. ¿Poco honesta?, non señor, poco honesto ye trabayar por siguir na poltrona política, que ye lo que tas faciendo tu. Resulta qu'agora vais pretender que la xente nun se quexe nin vos critique cuando nun facéis el vuestru trabayu como debiere.


Carmen Rúa, la conceyala de Xixón, afirma que la Oficina Municipal ye un llogru d'IX. Y eso nun ye asina, el llogru ye de la sociedá asturiana más concienciada cola problemática llingüística que, tres años de llucha y glayar ¡oficialidá!, consiguió la creación d'eses oficines municipales como «remiendu» mentanto llegaba esa oficialidá. El llabor d'IX (del PSOE yá nun espero nada) yera'l de facer que'l llabor d'esa oficina se desendolcara ensin torgues, facilitando'l so trabayu, sofitándolu en tolo que seya p'afitar la conciencia llingüística nel conceyu. Falta entovía muncho por facer. Ye como si decimos que'l gobiernu del Principáu yá fizo tolo posible pol cenciellu fechu de crear un asesor toponímicu y aprobar espedientes toponímicos. Estos fechos, per se, nun son abondo sinón qu'hai qu'amás aplicalos, cosa que nun se ta faciendo, por exemplu, nos cartelos de les autovíes y enllaces que se tán faciendo en Xixón, onde a pesar de que tán aprobaes les correspondientes toponímies de Llangréu y Xixón, resulta que'l propio gobiernu nun les respeta.


En fin, por desgracia, siguimos viendo cómo los políticos que sufrimos anguaño nun cumplen les lleis sobre temes llingüísticos y arriendes d'ello pretenden que nun protestemos. Asturies, sufrilo pa creyelo.

17 dic. 2006

La pallabrería de José Montes Estrada

Lleí esta mañana una entrevista fecha a Jesús Montes Estrada, alias «Churruca», tercer teniente alcalde del Ayuntamientu de Xixón, y toi etovía ablucáu. Pongo per delantre que siempre defendí y defenderé los drechos de la clas obrera y xente probe. Podría paecer, entós, que los mios principios políticos converxen colos d'IX, pero si ún ta al tantu de les movilizaciones escontra la especulación urbanística en Xixón, y concretamente escontra la eliminación de los astilleros xixoneses, daráse cuenta qu'IX ta cada vegada más y más metida nel asuntu, pero non pa lluchar pola clas trabayadora, sinón p'afitar a lo seliquino la tendencia especulatoria.


De toos ye conocío que dos sindicalistes de Corriente Sindical d'Izquierdes, Carnero y Morala, tán siendo perseguíos pol so llabor reivindicativu. Y dempués d'una manifestación d'apoyu a Carnero y Morala (unes 15.000 persones aconceyaes), resulta qu'agora Jesús Montes Estrada vien con esto. Nesi artículu en La Nueva España tituláu «El pacto de la izquierda plural se debería reeditar en la ciudad y en Asturias en 2007», paez que Morala y Carnero tendríen que pidir perdón a esti señor. Pues mire usté, señor Estrada, pa entamar, una persona que quier facer del so cargu nel Ayuntamientu una posesión personal saltándose los propios estatutos del so partíu nun ta pa pedir a otros disculpes. Nun querer dexar savia nuevo ye malo, porque la xente mozo tien muncho que dicir y la renovación de puestos y de xente ye daqué perbono pa la salú «mental» d'un partíu, siempres dientro de los estatutos que lu guíen. Escaez esti home, qu'hai más votantes d'IX que militantes, y aquellos son más críticos qu'estos. Paez qu'apoltronase ciega a ún, y esti ye un casu claru. Tamién me paez vergoñosa esa actitú de perrín falderu col PSOE, ¿por qué debería reeditase'l pautu PSOE-IX?, ¿yá dais por perdida la mayoría nel Ayuntamientu?, mal andamos, porque asina, lo único que vais conseguir, ye facer campaña pal PSOE. Pero bono, con actitúes asina, el batacazu que vais sufrir va ser tamién enforma sonoru. Muncha xente ta viendo n'IX una pérdida de los sos ideales, renunciando a munches idees básicas d'izquierda por «siguir apoltronaos».


Ye vergoñosa la visión fantástica que sal del maxín d'esti home, cuando diz nesti artículu «Frutos y Alcaraz pretenden frenar el crecimiento de IU para culpar de todos los males a Llamazares», pero seyamos serios, ¿crecimientu d'IX?, ¿quién lo diz?, los sondeos que yo faigo ente familiares, amigos y xente que conozo ye'l de precisamente lo contrario. Conozo a xente que siempre votó a IX como fuerza d'izquierdes (por oposición a la «izquierda» imaxinaria del PSOE) y ta ablucao pola política d'IX. Ye más, nun va votalos nes próximes elecciones. Y ye qu'esi servilismu a la FSA-PSOE va pesar muncho. La falsa defensa de la oficialidá del asturianu, les movilizaciones por Morala y Carnero, los contínuos ataques a la industria astillera xixonesa, el descontentu pol PXOU pa Roces en Xixón, fuelgues nel sector sanitariu o quién ganó les elecciones sindicales nel profesaráu n'Asturies (SUATEA, sindicatu afín a Corriente Sindical d'Izquierdes) van pesar nes próximes elecciones. Y diciendo coses como que'l pautu debería reeditase, ye afitar nes conciencies que nun se debe votar a IX porque va siguir faciendo lo mesmo: dir de la mano col PSOE, partíu que d'izquierdes nun tien nada.


Y por cierto, cuando diz esti señor que recuerda «que estuvieron incomunicados cuando la gente de CC OO colgamos un camión y, pese a las dificultades de comunicación porque estaban bloqueados, se solidarizaron con nosotros» hai que dici-y que nun fueron namás los de CC.OO. los que colgaron el camión, hubo más xente y grupos metíos nesi asuntu, pero bono, paez que nun-y interesa agora dicilo too, presta más presentalo asina. Y diz esti señor «Me ha dolido que, con una jugada sucia, se pretendiera decir que yo estaba en la clave de machacar a Cándido y Morala. Y me ha dolido también que ellos dos, a los que conozco hace más de treinta años, no hayan salido públicamente para decir que no creían eso», pues mire, señor Montes Estrada, hai coses que güelen mui mal nesi ayuntamientu, y lo que nun val ye dicir que hai que reeditase'l pautu de gobiernu y llueu dicir qu'IX fizo muncho por Carnero y Morala, nun basta con dicir qu'eso ta mal, que nun se debería criminalizar a esos dos sindicalistes, eso fáigolo yo y le quince mil persones de la manifestación, el problema ye qu'usté ye parte del Ayuntamientu y nun fizo xestos reales d'oposición a eso, ¿cómo ye que dalguién presenta ante'l xulgáu unes factures en nome del Ayuntamientu y l'Ayuntamientu diz que nun tien nada que ver?, tendrá usté que glayar al cielu, ¿non?, tendrá que remover Roma con Santiago pa depurar responsabilidaes, tendrá que facelo usté que ta dientro'l gobiernu y pue facer presión real, ¿non?. Pero ye que la so política, señor Montes Estrada, quédase na pallabrería fácil.


Y continúa usté diciendo «Nuestro discurso político es el más coherente», y bono, si usté se lo cree, allá usté, pero esa ye una afirmación dafechu discutible.

15 dic. 2006

Entrugues que definen a ún

¿Qué piensa usté de la pornografía?, ¿consume usté?, ¿y de les prostitutes?, ¿qué piensa de llegalizar la práutica de la prostitución?, ¿y de llegalizar el consumu de dalgunes drogues como la marihuana?, ¿qué piensa usté de los homosexuales?, ¿y de que se puean casar?, ¿y de que puean adoptar fíos?, ¿prautica usté dalguna relixón?, ¿cree usté en dalgún dios?, ¿qué piensa usté de les relixones?, ¿qué rellación habría tener l'estáu coles relixones?, ¿cree que debería inculcase la enseñanza relixosa na educación pública?, ¿y qué relixón?, ¿qué opinión-y merez la monarquía española?, ¿qué opina de la república?, ¿qué sabe usté de la historia d'Asturies?, ¿fadría oficial la llingua asturiana?, ¿prestaría-y que los sos fíos deprendieran asturianu?, ¿qué sabe usté de la historia de la llingua asturiana?, ¿qué piensa de la reconversión industrial n'Asturies?, ¿ta Asturies bien gobernada?, ¿conoz dalgún llugar n'Asturies onde haya especulación urbanística?, ¿cree usté qu'Asturies ye rexón o nacionalidá?, ¿qué opinión-y merez el nacionalismu «periféricu»?, ¿y el centralismu estatal?, ¿qué opinión-y merecen los sindicatos?, ¿cuántos conoz?, ¿qué piensa de la inmigración?, ¿y les pateres?, ¿qué ye pa usté la globalización?, ¿ta d'acuerdu?, ¿qué ye'l capitalismu?, ¿qué opina del mercáu económicu européu?, ¿qué piensa de la dómina de Franco?, ¿qué opinión-y merez Franco?, ¿qué opina de los EE.XX. y de la so política?, ¿qué partíos políticos enxamás votaría?, ¿qué piensa de les corrides de toros?, ¿y de l'ablación del clítoris?, ¿sabe qué ye una «esfoyaza» y un «filandón»?, ¿tien dalgún problema pa contestar a dalguna d'estes entrugues?

1 dic. 2006

Estos lorquianos ¿qué sabrán?

Pa relaxar la cosa, qu'ultimamente ta que fierve, voi comentar una noticia qu'anque la lleí nel periódicu, fízome muncha ilusión y paez qu'acollumbra una cierta lluz d'esperanza ente tanta babayonería suelta. Refiérome a la entrega del Premiu «Cervantes» a Gamoneda. Y alégrome porque amás de sentir cierta pasión pola llingua asturiana y en xeneral por cualquier rasgu autóctonu asturianu que tea dientro de lo que se noma bayura cultural, tamién la lliteratura tien güequín nel mio ser, y la poesía especialmente, como moza gayaspera, llama especialmente la mio atención.


Fai tiempu que lleía versos de Gamoneda, de fechu un amigu regalóme una antoloxía d'esti poeta pola que naguaba dende demasiáu tiempu. Quien merguya peles páxines escrites d'esti home atopa la sensibilidá pulida col tiempu, la voz fonda de quien sabe posar los güeyos sobre'l mundu pa llueu tresmitinos la so esencia. Sobre too, destacaría los sos últimos llibros, onde la precisión del versu y la mirada más tienra espoxiguen y medren pallabra tres pallabra.


Hai non munchu tiempu, tuvi la oportunidá d'asistir a una charla y recital que fizo organizao pola Asociación Cultural Poegía de Xixón. Nesa charla escuché la teoría gamonediana de que la poesía nun ye lliteratura (esta mesma charla, daríala meses dempués dientro d'una selmana poética al rodiu del día mundial de la poesía que la Fundación «Príncipe de Asturias» organizó n'Uviéu). Esta sentencia, paradóxica viniendo d'un lliteratu de talu altor, enmudeció a l'audiencia. Pero prosiguió col so discursu, argumentando. Básicamente, vieno a dicir que la poesía nun ye lliteratura porque nun ye ficción; asúmese que la lliteratura fala de ficción (más o menos adornada con experiencies o realidaes), pero la poesía, ai amigos, nun ye nenguna ficción, ye realidá, la realidá del poeta. Aplaudí aquella intervención como poques. Dempués tuvi la ocasión d'intercambiar dalgunes pallabres con él. Yo pienso que la calidá poética de Lorca naide la puede poner en dulda, pero tamién pienso que Cernuda ye otru poeta cuasi de mayor almiración poética; Lorca foi mitificáu por delles circunstancies y munches vegaes confúndese ser el más vendíu (fuera d'España) con el meyor. Y esta discusión ye eterna ente la mio moza (lorquiana a matar) y yo. Entrugue-y a Gamoneda, entós, que-y paecía a él esi alderique continuu que tenemos. Nunca escaeceré esa suave sonrisa (tien un gran sentí del humor), esa mirada que se xira p'hacia la mio moza y eses pallabres que vinieron a da-y la razón a ella. Gamoneda, miróme como dalguién que-y incomoda llevar la contraria a otru, pero sonrióme y yo sonri-y tamién, mentanto-y reburdié «...estos lorquianos ¿qué sabrán?...» en tonu bromista. Vi una mirada llimpia, ensin maldá nin sentimientu de meyor que naide.


Poro, alégrome d'esi premiu (anque toi a la escontra de premios) porque polo menos, sé qu'ún se-y dio a dalguién que lu merez. Norabona Gamoneda.

25 nov. 2006

Artículu de Miguel Ángel Llana

Equí vos dexo un artículu apaecíu güei en La Nueva España, ye de Miguel Ángel Llana tituláu «Quince mil personas se manifiestan en Gijón contra la "democracia"». Yo tuvi na manifestación pa defender los drechos de los trabayadores y de Carnero y Morala (sindicalistes a los que se-yos piden años de cárcel por llevar p'alantre la llucha obrera), y creo que la visión de Miguel Ángel Llana ta enforma acertada. Lleer esti artículu espero que faiga a la xente reflexonar, porque les elecciones tán ehí al llau, y los que nos gobiernen nun piensen en nosotros.

22 nov. 2006

Ésitu na manifestación de Carnero y Morala

Güei miércoles pue dicise que foi un ésitu la manifestación en solidaridá de Carnero y Morala. Unes 15.000 persones sofitaron l'actu cola so presencia, daqué que p'Asturies nos últimos años, ye un ésitu de convocatoria.


Veremos que dicen los medios de comunicación, qu'habelos, habíalos, pero otra cosa ye que se-y de llueu pasu na prensa. Esperemos qu'esti gobiernu (llocal y autonómicu) s'entere de que nun se xuegan colos derechos de los/es trabayadores. Nun faltó, nesti actu de repulsa a la represión del gobiernu asturianu y xixonés contra dos sindicalistes, la petición de dimisión del delegáu del gobiernu asturianu, Trevín, otru represor de los movimientos sociales y de la clas trabayadora, al empar que promotor del desastre especulatoriu ya urbanísticu n'Asturies.


Esti día y siempre fuimos toos Carnero y Morala. Porque la so llucha, ye la de toos.

21 nov. 2006

Poles llibertaes y la xusticia

Nun quiero dexar d'encamentar a tol mundu que vaya'l próximu miércoles, a les 19.30 hores de la tarde, na plaza del Humedal de Xixón, a una manifestación pa defender les llibertaes y los drechos de la clas trabayadora, esto ye, manifestase pola represión que'l gobiernu de la FSA xunto con IX del Ayuntamientu de Xixón quier llevar p'alantre a Carnero y Morala. Vémonos toos ellí.


Pa entender un poquiñín meyor esta manifestación, encaméntovos tamién lleer esti interesante artículu d'opinión espublizáu güei llunes en La Nueva España por Manuel Sánchez Terán, tituláu «Con Cándido y Morala, contra la represión y por las libertades». Que nun-yos salga de baldre zarrar la industria y acabar con puestos de trabayu.

20 nov. 2006

Resaca pola oficialidá

Tamos en díes dempués de la manifestación del sábadu n'Uviéu. Ellí aconceyamos unes 15.000 persones, según los organizadores (Conceyu Abiertu pola Oficialidá) y según yo, que tuvi ehí. La verdá, los númberos, pa estes coses, dan lo mesmo. Da lo mesmo que lo reivindiquen cuarenta que cuarenta mil persones. Y da lo mesmo porque ye un drechu, un drechu básicu llinguísticu. Nun soi homosexual, pero ehí taré siempre pa defender los drechos d'eses persones, dame lo mesmo que na mio ciudá vivan cuatro homosexuales o cuarenta mil.


El problema ye que la FSA nun s'entera de nada. Y sigue erre qu'erre poniendo pilancos y torgues al desendolcu llingüísticu pol que venimos naguando tantes y tantes persones, falantes y non falantes d'asturianu.


Y El Comercio sigue faciendo de les suyes, el domingu nun-y dio semeya de portada a la manifestación, y arriendes d'ello terxiversó datos y cifres (dixo que los organizadores dixeron que fueren 10.000 persones, cuando en realidá -yo tuvi ellí y oyilo- los organizadores dixeron que fueron 15.000 persones). Pero güei llunes, ¿qué vemos nesi diariu panfletariu pro-FSA?, pues na primera llana una semeya de la manifestación col encabezáu «PSOE y PP afirman que «las manifestaciones no modificarán» su rechazo a la oficialidad del asturiano». Vamos, que la manifestación en sí nun merez llugar privilexáu nel diariu, pero les declaraciones d'estos partíos sobre ella sí. Yá, y eso lo fai pa informar. Yá, y yo chúpome'l deu.


L'asturianu, por muncho que-yos duela asumilo a munchos ye una patrimoniu llingüísticu asturianu qu'hai que defender, protexer y dignificar. L'asturianu ye llingua, como otra cualquiera. Y mentanto tengamos los políticos que tenemos, siguiremos siendo'l culu d'España (y non solo no llinguístico o cultural).

9 nov. 2006

Nun van facenos escaecer el casu Morala y Carnero

Sé que soi pesadín con esti procesu, pero ye que nun soporto la inxuticia cola clas trabayadora. Y amás, como'l blog ye míu faigo lo que me da la gana. Namás quiero siguir faciendo alcordanza d'esa persecución a la que tán sometiendo a Morala y Carnero por ser miembros destacaos del únicu sindicatu que nun se vende y cabezaleros nes movilizaciones trabayadores de los astilleros de Xixón (ver una entrada anterior nesti blog titulada «Con Morala y Carnero»).


Esti artículu que güei vos dexo equí ye de Miguel Ángel Llana, tituláu «PSOE-IU de Gijón mantienen el juicio contra Morala y Carnero», sal en La Nueva España esti día y diz grandes verdaes. Fala por exemplu de la hipocresía del gobiernu que ta nel Ayuntamientu de Xixón (PSOE-IX). Si sigo falando d'estos sindicalistes a los que-yos pue cayer seis años de cárcel, ye porque lo que pretende'l gobiernu de Xixón y d'Asturies ye que nos escaezamos d'ello (yá se sabe, tán les elecciones ehí y nun hai que facer mala imaxe). Espero que lu lleais y que vos preste.

6 nov. 2006

Lo de la FSA nun tien igua

Otru día más que me llevanto ablucáu. Y nun ye pola resaca de les elecciones catalanes, onde cuasi'l 50% de la población con drechu a votu nun votó (y 60.000 fueron votos en blancu, non nulos), fechu que ye pa echase les manos a la cabeza. Y yelo porque amuesa a les clares que l'Estatutu catalán, por munchu (auto)bombu que se-y diera dende ciertos seutores catalanistes, nun-y importa en Cataluña a muncha xente. Conclusión, los políticos catalanes (nel poder, el famosu tripartitu) nun son a coneutar cola población catalana, colos sos problemas; piensen más Carod y compañía en llevar p'alantre midíes polítiques a base d'autocomplacencia (cuando non, autovictimismu), en cuentes de solventar problemes reales de la so sociedá. Y lo peor de too foi que namás saber l'escrutiniu, yá entamaron toos a negociar, a atalantar con quien o con quien non. ¿Nun debería ser esi datu d'ablucante baxa participación un elementu al que-y dar protagonismu?, ¿nun foi'l tripartitu'l responsable d'eso?. Pues pa colmu va siguir gobernando'l mesmu tripartitu.


Pues como vos dicía, llevantéme ablucáu poles declaraciones del responsable de la FSA (Federación Socialista Antiasturiana), el tristemente conocíu polos asturianistes d'esti país asturianu como Javier Fernández. Resulta que, según recueye LNE, esti sinvergüenza de políticu atrevióse a dicir «Nosotros apostamos por garantizar a todos la enseñanza del asturiano en las escuelas, pero sin que desde las distintas administraciones públicas se tenga que contestar en asturiano a los usuarios». Vamos, qu'estos socialistes asturianos dempués de lo de Graciano Torre (ver l'anterior post de mio) y agora esto, ta claro que nos traten por babayos. Vamos entamar la crítica oxetiva a eses declaraciones.


Camiento que n'Asturies hai lleis qu'abelluguen la llingua asturiana como por exemplu la Llei de Promoción y usu del asturianu del añu 1998. Nesta llei lleemos no que cinca a la llingua asturiana:


«Asegurar el so llibre usu y la non discriminación de los ciudadanos por esti motivu» (Cap. 1, Art. 3, puntu d)


«Tolos ciudadanos tienen drechu a emplegar el bable/asturianu y a espresase nél, de pallabra y per escrito» (Cap. 2, Art. 1)


«Tendráse por válido a tolos efeutos l'usu del bable/asturianu nes comunicaciones orales o escrites de los ciudadanos col Principáu d'Asturies» (Cap. 2, Art. 2)


«El Principáu d'Asturies afalará la conocencia del bable/asturianu per parte de tolos emplegaos públicos que desenvuelvan el so llabor n'Asturies; la conocencia del bable/asturianu podrá valorase nes oposiciones y concursos convocaos pol Principáu d'Asturies, cuando'l calter del puestu de trabayu y la naturaleza de les funciones que vaigan a desenvolvese lo precisen» (Cap. 2, Art. 3)


Vemos asina que'l principal dirixente de la FSA tien un desconocimientu total de les lleis qu'hai en vigor, cayendo nun ridículu ensin igual. Esta llei desacredita dafechu les declaraciones de Javier Fernández. ¿Ye esti un políticu que sabe lo que diz?, pues non, y poro debería dir a tocar los coyones y ovarios a otros, porque los asturianos y asturianes yá tamos fartos de les sos babayoneríes.

27 oct. 2006

Partidismu ya incompetencia política

Ye vergoñosa l'actitú de munchos medios de comunicación y de cómo se-yos ve'l plumeru acarretando a los sos llectores menos críticos (por desgracia la mayoría) pa ocultar ciertes verdaes que podríen perxudicar al gobiernu socialista.


Güei voi falar d'El Comercio, periódicu onde vese más qu'a les clares el so posicionamientu favoratible al PSOE.


Güei, por exemplu, día 27 d'ochobre, vamos a la edición dixital de La Nueva España y El Comercio. El primer titular que sal nel primeru ye «Asturias, comunidad donde más subió el paro en el tercer trimestre». El primer titular que sal na edición dixital del partidista diariu El Comercio ye «El presupuesto del Principado en el año electoral tendrá más inversión y mayor gasto social».


Dalguién pue atalantar que ye cuestión d'echar una güeyada positiva o negativa sobre Asturies. Pero yo yá nun me quexo tanto de que nun tea en primer plana l'anuncia «negativa», sinón qu'arriendes d'ello, l'anuncia «negativa» ¡nun apaez en nenguna sección del periódicu!. Yo tuvi buscándola y nun la atopé (nel día de güei y pela mañana nun apaecía, nun sé si más tarde, pela tarde o nueche la pondrán).


Yo, que llevo yá munches noticies comparaes o mesmamente nel desarrollu de les mesmes, toi hasta los coyones mesmos (y perdónaime esti llinguaxe con tan pocu procuru) de los engaños y de qu'esti periódicu que se diz xixonés tea combayando a los socialistes (polo tanto, nun ye xixonés, ye socialista; nun mira informar a los ciudadanos sobre lo qu'asocede, sinón manipular el criteriu de los ciudadanos pa que nun se dean cuenta de la llaceriosa política que tan faciendo los socialistes). Marxinación del asturianu nes sos ediciones creando falses polémiques sobre temes llingüísticos, nun informar de los problemas sindicales nel sector Naval desinformando sobre el casu Carnero y Morala... en fin, y faciendo alcordanza de xuru qu'hai munches más noticies que faen a ún dicir «daqué güel a muertu en Dinamarca».


Una vez que yá me despaché a gustu, quiero dicir poner agora a parir al PSOE, rellacionandolo cola noticia cola qu'abría güei La Nueva España. El paru n'Asturies creció ¡un 21%!, eso ye una burrada (de fechu, la comunidá onde más xubió'l paru). Y ¿qué diz el responsable de trabayu del PSOE? pues el mesmu conseyeru d'Industria y Emplegu, Graciano Torre, va y diz qu'eso ye porque la xente, viendo la bona época en que tamos p'alcontrar trabayu, pues apúntase en masa a les llistes del paru, ¡tócate los coyones!. Eso ye rise de la xente, eso ye tomar el pelu a los ciudadanos y ciudadanes d'Asturies que tienen que sufrir la llaceriosa política del PSOE. ¿Cómo vamos permitir insultos d'esi altor?. Espero que los partíos políticos na oposición (o incluso IX) pongan el gritu en cielu sobre estes declaraciones que nos traten por babayinos. Tracamundien la realidá pa tener razón, y encima nun se ponen nin coloraos. ¡Reconocéi la vuestra incompetencia, socialistes!

24 oct. 2006

Les vergüences de Xixón

Como xixonés, esmolecíu pola mio ciudá, que veo cómo los políticos privilexen a los sinvergüences del cementu y a los especuladores estranxeros que vienen equí p'arramplar con tolo que puean, namás pueo amosar equí'l mio malestar y falar de lo que ta pasando en verdá. En Xixón ta asocendiendo un estropiciu urbanísticu que nun va tener igua como siga asina. Y ye vergoñoso que seya'l PSOE-IU quienes dean el visto bonu a esti asoceder dende les poltrones de la casa Conceyu.


Pa entamar, equí va'l videu de la protesta na inauguración nel Acuariu de Xixón, protesta que nun foi recoyida pelos medios informativos de la manera qu'habíen de facelo. Los trabayadores de los astilleros xixoneses ven cómo'l futuru de Xixón quier enterrase embaxo'l cementu, ye dicir, cambiar industria de futuru (emplegu pa próximas xeneraciones) por pisos de luxu. La inauguración del acuariu de Xixón yá amuesa cómo'l gobiernu empobina esa zona industrial hacia un usu más ociosu y residencial, ¿dalguién sinón entiende que s'abra un acuariu al llau d'unos astilleros?


Y siguiendo con esa persecución hacia la defensa de los puestos de trabayu y pola industria de futuru (penriba d'intereses estranxeros y especuladores), equí va'l videu d'una entrevista nuna televisión llocal d'Asturies onde espliquen la trama gubernamental que quier echar el pieslle a los astilleros xixoneses pa facer pisos de luxu (ye dicir, pa que s'enriquezan unos pocos) y la persecución que sufren los sindicalistes Morala y Carnero. Equí vemos la versión de los trabayadores, diferente de la falsa imaxe que quier tresmitir l'alministración.


Un videu onde nuna televisión llocal entrevisten a Morala, sindicalista acusáu pola alministración al que-y quieren meter años de prisión por defender puestos de trabayu. Siempre ta bien conocer la versión de los implicaos, non solo la del gobiernu, que miente y falsea les coses col sofitu de medios de comunicación como «El Comercio» de Xixón.


Y pa terminar, equí vos dexo otru videu que nun tien desperdiciu, ye otra entrevista nuna television llocal onde falen de los estropicios que quier facer el gobiernu col paisaxe asturianu, esfarrapar les nuestres costes y medios naturales namás pola especulación urbanística, pa facer del nuestru país, Asturies, un negociu pa los lladrones de corbata.


En fin, asina tamos, con unos políticos que primen más la so cartera y facer xalés de luxu que los verdaderos problemes d'Asturies y de los sos trabayadores. Estos videos tan recoyíos de youtube, poro, abarrunto que son de difusión gratuita. Si hubiere drechos d'autor, namás tendríen que ponese en contautu conmigo.

13 oct. 2006

Con Morala y Carnero

Lo que ta asocediendo n'Asturies paez sacao d'una película que nos falara d'años grises onde nun se podía dicir un res a la escontra del gobiernu. Los sindicalistes Juan Manuel Martínez Morala y Cándido González Carnero tan sufriendo la inxusticia d'un aparatu del Estáu al serviciu d'intereses ocultos, al serviciu d'unos políticos ensin vergüenza, políticos qu'amás de mentinos son unos especuladores que xueguen con families y cola industria y el futuru d'un país como'l nuestru, Asturies.


Los políticos n'Asturies planearon, cuantayá, desmantelar los astilleros de Xixón, pa montar pisos de luxu, lo que supón un despropósitu si, arriendes de que los benificiaos van ser les grandes constructoras y los propios políticos embaxo primes o dellos favores que nunca nun nos espliquen, va suponer la perda de munchos puestos de trabayu que dan de comer a munches families asturianes y que suponen un futuru llaboral en Xixón.


Estos sinvergüences que se faen llamar políticos, y que tienen la poca dignidá de siguir usando la pallabra «socialista» y «obrero» pa definise, nun cumplen acuerdos firmaos hai años, nun protexen los intereses d'Asturies penriba de les grandes multinacionales y empresarios. Con actuaciones asina tán consiguiendo facer una llaceria de país, ensin futuru.


Dende equí, la mio solidaridá colos sindicalistes citaos, Cándido y Morala, porque tán siendo perseguíos por defender unos drechos básicos de cualquier persona, el drechu a tener un trabayu. Quieren meter na cárcel a estos lluchadores pola clas obrera, cuando tamos fartos de sentir pela tele y pela radio grandes empresarios y políticos que s'enriquecen aprobando y faciendo planes illegales. Agora resulta que toles fuercies del aparatu del Estáu van pa meter a estos defensores de la xusticia social. Ai mamina, si punxeren los mesmos enfotos pa perseguir a los verdaderos sinvergüences, nun diben quedar munchos socialistes llibres de culpa.


El gobiernu asturianu (y llocal, xixonés) constata una y otra vegada la so postura de persecución de les voces crítiques cola so actuación (mui típico d'otres dómines más escures pa la historia d'España). Esto, sumao a la censura de la que foi acusáu'l gobiernu asturianu pol diariu críticu «El Comentario TV», al nun permitir la entrada nesti sitiu web a los ordenadores que d'él dependen, amuesen la deplorable xestión y pocu esmolecimientu polos problemes reales de los asturianos que tien el gobiernu qu'agora nos toca sufrir.


Oxalá, toes estes acusaciones nun caigan en baxo y nes próximes elecciones medren los verdaderos votos asturianistes y d'izquierdes pa partíos verdaderamente concienzaos cola situación llaceriosa qu'anguaño vivimos n'Asturies.

9 oct. 2006

Y nosotros viéndoles pasar

Resulta qu'ayeri ficieron un partíu de fútbol ente la seleición del País Vascu y la de Cataluña. Too entama a goler a lo que güel, ye dicir, política pura y dura. Y asina foi, cartelos (bien grandones) colo de «Catalonia is not Spain» y otros colo de «Euskal presoak Euskal Herrira» arriendes de bandorones independentistes de Cataluña y el País Vascu. Ta perclaro (y tábalo enantes de qu'entamare'l partíu) qu'eso diba tornase nuna reivindicación política.


Y por qué salgo con esto agora, pues bien, alcuérdome de cuando entamó la TPA les sos primeres emisiones y retresmitíen los partíos del Sporting y del Uviéu. Polo visto los de la Xunta pola defensa la Llingua Asturiana (organización que se define apartidista, o lo que ye lo mesmo, nes sos files allúgase xente de estremaes pensamientos políticos) quixeron entrar con pancartes a los estadios col lema «L'asturianu na TPA» (o daqué asemeyao) y nun los dexaron entrar. Les razones esgrimíes fueron que nun taba pertmitío amosar cartelos con mensaxes políticos.


Pues bien, agora (volviendo al entamu) pasa eso, lo del partíu País Vascu contra Cataluña. Toa una denunca y reivindicación política (per otra parte, y como yera d'esperar, antiespañola con quema de bandera española nes grades).


En fin, como dixo la Xunta, la reivindicación de presencia de la llingua asturiana na TPA (televisión que pagamos toos, incluíos esa mayoría d'asturianos que son favoratibles a la oficialidá del asturianu) nun ye una reivindicación política, sinón cultural. La llingua ye, enantes qu'otra cosa, una ayalga cultural d'un valir descomanao, qu'hai que sofitar como se sofita l'Alhambra de Granada o les naranxes de Valencia.


Agora resulta, como se vio, que mentanto que n'Asturies nun se permite la reivindicación llingüística (cultural) pacífica nos estadios de fútbol, fuera de les nuestres llendes (pero dientro entovía de lo qu'anguaño ye España) permítense nos estadios actos políticos radicales ensin que naide-yos diga un res.


Y agora nosotros a velo pasar too. Los políticos que tenemos son una mierda, téngolo comprobao. Y nun paren de restreganos pela cara que somos inferiores a otres comunidaes, que lo que faen n'otres comunidaes equí non, nin falar. Que yo sepa, eso nun ye defender los nuestros drechos, sinón tratanos como una comunidá de tercera categoría, ensin pesu, ensin personalidá. En fin, vergoñoso.

3 oct. 2006

Topónimos aprobaos en Xixón

Bono, pues yá tan aprobaos los topónimos en Xixón, pero por desgracia, mesmo que los topónimos aprobaos en Llangréu cuantayá, nun serán utilizaos pola alministración nos sos escritos oficiales. Vamos, eso ye lo que me temo. Ver veremos, que dixo un ciegu. Toi esperando la revista que saca l'Ayuntamientu de Xixón pa facese autopropaganda «La gaceta de Gijón» pa ver l'incumplimientu qu'ellos mesmos aprobaron. En fin, una contradicción en si mesma, qu'afita(rá) más entovía la idea de que'l PSOE (anguaño nel poder) ta faciendo d'Asturies la llaceria de país que ye. Un partíu (PSOE) que nun respeta la cultura (llingua) del so pueblu ¿qué fai nel poder?

18 sept. 2006

La belleza irreal

Ta falándose muncho anguaño de la extrema flacura que sufren munches moces y mozos fomentada pola industria de la moda. Como tol mundu que tea un poquiñín informáu sabrá, la pasarela Cibeles paez que va poner un criteriu pa impedir que desfilen modelos con aspeutu poco saludable. El criteriu ye'l d'imponer qu'aquella moza que nun tea penriba del 18% de masa corporal nun desfila. Yera hora de que l'Estáu tomara cartes nel asuntu, porque tamos falando de salú público y ye bien conocío que'l mundu de la moda nun ye nada beneficioso pa la mocedá (la mayor parte de la mocedá nun tien eses talles, nin eses cares, nin eses perres) y creánse problemes que puen derivar en verdaderos traumes.


Ye vergoñoso que la sociedá nun pare de dicite que pa ser guapa tienes que midir tales o cuales midíes o tales o cuales talles. La talla 34 ye talla d'adolescente, asina que ha de cortase esa imaxe de qu'esa ye la talla estándar pa cualquier muyer que quiera ser bella. Amás, eses moces enfermices, qu'arriendes de tar yá descomanadamente flaques, maquillábenles coles cares pálides, con solombra embaxo los güeyos, que paecíen zombis, ¿a quién-y pue paecer bello eso?. Eso ye una belleza irreal. Non solo l'Estáu español debería tomar cartes nel asuntu (como afortunadamente ta faciendo), sinón tola Xunión Europea. Y nun me valen eses modelos o persones que trabayen nesa industria de la moda (pa min nun ye un arte, ye un negociu) que dicen qu'agora va discriminase a modelos que seyan delgaes por constitución, ¡coime!, ¡nun se tuvieron discriminando a modelos por llevar talla 38 o 40 llamándoles gordes!, ¿onde taben estes persones años pasaos pa glayar col mesmu enfotu eses discriminaciones?.


Por desgracia, pienso que como industria bien incrustada na sociedá pesa muncho, y hai munches persones a les que nun-yos interesa que-yos toquen la pita de los güevinos d'oru. No fondero, la industria de la moda que remana cantidaes indecentes de dineru ye otru exemplu de capitalismu, y polo tanto nun-y importa nin la salú nin la moral de la xente. Namás arramplar cola mayor cantidá de dineru posible.


Y tengo que dicilo pa quedame a gustu. La directora de la pasarela Cibeles, Cuca Solana, ye una sinvergüenza, porque foi la responsable de qu'añu tres añu, tuvieren baxando les talles imponiendo una imaxe de muyer nociva pa la sociedá. Ye una sinvergüenza porque esto yá tuvo denunciao hai años y ella llavóse les manes. Ye una sinvergüenza porque punxo penriba la salú de les modelos, los sos intereses personales. Ye una sinvergüenza porque agora va de defensora d'una belleza sana.


Paga la pena pasar pela páxina de Dove, la marca de productos de belleza pa muyeres, y echar una güeyada a la so campaña pola belleza real. Oxalá munches muyeres, sobre too les más moces y que tán entovía formando la so mente, pasen per esta páxina, pa dase cuenta de que pa ser bella nun fai falta midir tales o cuales talles, sinón que basta con ser una mesma, con ser vital, con tresmitir ilusión. Un aplausu dende equí pa empreses como Dove.

29 ago. 2006

Un exemplu de capitalismu: la Bayer

Toi dafechu ablucáu, xúrolo. Resulta que taba lleendo'l periódicu (ún de los cuatro a los que-yos suelo echar una güeyadina) y atopéme cola noticia que va darréu «Bayer mantiene el beneficio semestral y suprimirá 1.500 empleos en su unidad agroquímica» espublizada güei n'El Comercio. Sí, sí, como tais lleendo, la Bayer algamó 1.052 millones d'euros de beneficios nel primer semestre del añu en que tamos. Y como paez que-yos abulta poco, pues van eliminar al rodiu de 1.500 emplegos pa reducir costes. ¿Nun ye esto ablucante?, ¿nun ye indecente ganar eses perres y querer entovía ganar más a costa de suprimir puestos de trabayu?, ¿ye esti'l mundu que queremos dexar pa los nuestros fíos?, ¿ye esta la moralidá que nos convién, ye dicir, la de too pol dineru?.


El capitalismu, ente otres coses, afitó na sociedá la idea d'algamar más y más dineru, a costa de lo que seya. El dineru yá ta, pa esti modus vivendi penriba'l bien y el mal, penriba de la xente. Lo peor ye que lo asumimos, yá nun nos llama l'atención. De xuru que la xente que llee esto (si ye qu'anguaño lo llee dalguién) nun se decatara d'esta anuncia nos periódicos.


¿Qué podemos facer?, ¿dexar de mercar productos de Bayer?, por desgracia nun creo qu'eso sirviera, porque lo bono sería una acción en masa, cuasi mundial, pero eso ye yá una utopía, cuando los medios de comunicación tán al serviciu d'intereses ocultos y los poderes. Lo único que nos queda ye esti mediu, internet, pa tar comunicaos, pa saber d'informaciones alternatives, pa pensar llibremente. Espero que los nuestros fíos deprendan que penriba del dineru a esgaya, tán otres families que tamién tienen drechu a facer planes de futuru.

22 ago. 2006

Llibros panfletarios

Lo d'Asturies nun tien igua. Nun hai per onde agarralo. Ye ablucante qu'una comunidá autónoma del Estáu español seya a tragase tanta puxarra político y equí nun pase nada. Yo yá albidraba que la campaña eleutoral entamaría pasando'l branu, y nun andaba tan desencamináu. Resulta que los aturianos tamos recibiendo'l famosu llibru onde s'afalaga al gobiernu socialista asturianu pola so -agarráivos que van curves -«bona xestión». Quién ye l'autor d'esa obra ye una incógnita, y quien lu pagó más entovía. Véase «El PP señala al Principado como responsable de la publicación de un libro de «autobombo» n'El Comercio (día 22 d'agostu del 2006). Daqué güel a podre n'Asturies, sobre too pela Xunta'l Principaú. Si nos ponemos a investigar, resulta qu'esta obra espublizada ensin reparar en gastos (unos 40 millones de pesestes según los espertos pudo costar una edición luxosa como esa) tien anunciantes, la mayoría empreses constructores. Esto ye más raro entovía. Hai un llibru anónimu que resalta les «bondaes» del gobiernu socialista y qu'amás ta en parte subvencionáu por constructores (porque daqué pagaríen por anunciase, ¿non?). En fin, a toos nos vien a la tiesta lo asocedio en dalguna ciudá del sur español onde los negocios inmorales del lladriyu ponen a ún los pelos como escarpies.


Yo, xixonés, fui agraciáu con ún d'esos llibros y da pena. Tanto dineru gastáu pa convenceme de daqué que sé que nun ye cierto, pa convenceme de que'l gobiernu d'anguaño ye'l meyor qu'hai. Ye vergoñoso. Yo sé que'l gobiernu nun diz la verdá en munches coses, sé que too eso qu'amuesa'l llibru ye propaganda panfletario barato. Y selo porque soi asturianu y sé de primera mano la verdá.


Per otru llau faime gracia un apartáu d'esti llibru que fala de lo qu'invierte'l gobiernu en cultura. Sí, fala de la promoción y del so «compromisu» cola llingua asturiana. En fin, amás atrévense a soltalo asina, a la cara, ensin ponese coloraos.


Voi dir acabando porque toi poniéndome malu. Ta perclaro que too esto ye una estratexa pa facer campaña publicitaria. Como entamaba esti artículu del blog, ye increible que pase esto n'Asturies. Tamos viviendo una situación tráxica: el desencantamientu de la política de los asturianos. Si ficieren una encuesta o estudiu sobre cuála ye la visión que tienen los asturianos sobre los políticos de xuru que la xente s'echaría les manes a la tiesta. La opinión de la política ta a niveles infraterrestres, y culpable d'ello ye la FSA (Federación Socialista Antiasturiana) y el gobiernu socialista, que tan engañando a los asturianos, faciéndose pasar por partíu d'izquierdes, cuando en verdá son unos sinvergüences que tan desaniciando la cultura asturiana. Asturies necesita un verdaderu gobiernu d'izquierdes y non esos parrulos mentirosos que nos gobiernen. Asturies necesita un cambéu y que se metan los llibros pel culu.

11 jul. 2006

Republicanu, con más fuercia entovía

Llevantéme ceo, pa facer dalgunes coses que tenía pendientes, yá sabéis, a quien madruga dios lu ayuda, o eso dicen dalgunes persones y anque se seya atéu o agnósticu, nunca vien mal tener entidaes positives del to llau, nun vaya ser qu'ún s'equivoque (sicasí, reconozo que ye pa duldar eso de que dios -el cristianu o musulmán, por ser los más espardíos- seya una entidá positiva, porque echando una güeyadina al mundu, nun ta la cosa como pa da-y gracies por nacer y sabiendo amás que too lo pue, atalanta ún nesi pocu enfotu en meyorar ciertes coses que podríen facer del home y la muyer meyores seres).


Seya como fuere, a les diez de la mañana yá taba yo dándo-y un repasu a los periódicos que suelo mirar. Y como nun podía ser d'otra manera, ehí, nesi periódicu pro-FSA (por si dalguién nun sabe a qué se refieren estes sigles diré-yoslo yo: Federación Socialista Antiasturiana) llamáu El Comercio atopéme con una d'eses noticies que lu faen a ún ferver per dientro. L'epígrafe dicía lo que va darréu «Bueno critica la condena al franquismo de la UE y califica la República de "golpe de estado"». Nun ye que me coyera despreveníu, porque de Gustavo Bueno (y de dellos buenistes confesos) yá conozo salides d'esti altor. Más que nada porque tuvi la suerte d'estudiar embaxo'l so adoctrinamientu. Sí, lleístis bien, digo suerte porque namás asina pue ún dase cuenta de les munches coses que diz y pueo falar con conocencia de causa. Faime gracia toos esos que lu respeten y lu combayen, nomándolu «profesor» anque enxamás-yos diera clas y que lu xuben a pedestales ensin tener lleío la so obra, ensin entender el tresfondu de la so filosofía. Cenciellamente Gustavo Bueno tien el llugar respetable que tien pola complacencia y la inorancia de xente que ta en cargos de poder, que como nun quieren quedar de lo que son, ye dicir, d'inorantes, pues rin-y les gracies al Bueno y acaten lo que diz ensin dicir un res. Pero bono, eso n'Asturies ye vezu normal ente los políticos, eso de nun tener nin idea de daqué y ponese a sentar cátedra o defender postures ensin argumentos (por exemplu, sobre temes llingüísticos).


El casu foi que me punxi a lleer la noticia, sabiendo que diba acabar enfurruñáu y coles vidayes ferviendo. Que la II República fuera tomada por un grupu de dreches ta perclaro, pero eso nun quita pa que la República, como estructura y conceptu de gobiernu, seya meyor que la monarquía qu'anguaño hai n'España. Quiero dicir que ta desprestixándose la República (en sentíu xeneral, como conceutu) por culpa del gobiernu de la II República. Ta perclaro que'l poder que taba na II República, represora de drechos básicos (bien lo sabemos n'Asturies) nun foi daqué bono pa repetir. Pero lo que nun hai que repetir ye'l gobiernu, non la forma de gobiernu (la República). Ta perclaro qu'hai maneres d'entender la democracia, pero los atentaos escontra los drechos humanos más básicos que s'asoceden n'EE.XX., onde gobierna una supuesta democracia, nun tienen que facenos pensar que la democracia nun seya la forma de gobiernu más amañosa pa una sociedá. Gustavo Bueno, neses declaraciones ta cometiendo un error, identificar una forma de gobiernu, col gobiernu mesmu que lu contién. Nun se pue defender una dictadura por muncho que'l gobiernu anterior tamien lo fuera. Eso ye daqué que los asturianos tamos más que fartucos d'oyelo, refalfiaos de sentir, eso d'énte una crítica d'un partíu a otru dicir «tu más».


Con estes declaraciones (sobre les de la defensa del franquismu o la so crítica a postures d'izquierdes ya indixenistes como les d'Evo Morales) Gustavo Bueno defínese próximu a eses idees neocapitalistes, qu'asumen la fuercia del dineru y de los países más ricos. Ye una pena qu'una persona, que se noma filósofu, caiga nesa complacencia y arriendes d'ello quiera xustificalo. Pero tenemos que saber velo. Nun tenemos que dexar que nos taragañen la parte de razón que llevamos, por munchu renome qu'haya tres d'eses pallabres. Les idees d'esti home, de la drecha pro-neolliberal, tienen que servir pa caltener les nuestres idees con más fuercia entovía.

30 jun. 2006

Salir del armariu

Esta ye la respuesta del xefe de la oficina de política llingüística del Principáu ante les pallabres del conseyu consultivu sobre la llingua asturiana. Quien lleera'l mio comentariu anterior del día 21, nun pue perdese la respuesta de Ramón del día 29 de xunu. Apaeció n'El Comercio, col títulu «Un dictamen que no contribuye a ningún consenso» (o tamién la so versión n'asturianu espublizada nel diariu dixital Asturies.com «Un dictamen que nun contribúi a nengún consensu») y vien a dicir, bien claro y ensin pelos na llingua, lo que munchos pensamos.


Declaraciones asina, de responsables dientro de l'alministración ye lo que creo que faen falta. Munches vegaes paez que'l discursu pro-llingua ta arrequexáu nel marxen la sociedá, poro esti tipu de defenses faen dar puxu a esa xente anónimo que llucha dende la cai por salvar una llingua. Oxalá, declaraciones asina medraren. Oxalá declaraciones asina pudieren faceles políticos con representación, conceyales, alcaldes de pueblos y conceyos de menos pesu n'Asturies, saliendo d'un armariu que la FSA y Areces nun quieren abrir.

21 jun. 2006

Prexuicios espardíos pol gobiernu asturianu

Toi enforma ablucáu. Pues resulta qu'un conseyu consultivu fizo un analis (mandáu pol gobiernu) de la situación anguaño n'Asturies p'asesorar enantes d'aniciar la reforma del Estatutu d'Autonomía asturianu. Ente otres coses diz qu'«...existe una parte no pequeña de la sociedad que considera que la normalización, de hacerse, sería puro artificio...». ¿Cómo pue dicise tala babayada? y digolo asina, babayada de talu altor tien dificil comparanza. ¿En qué se basa esti conseyu consultivu pa sofitar eso?, que yo sepa, Francisco Llera Ramo, socillingüísta de prestixu fizo hai un añu o asina un estudiu n'Asturies (tamién mandáu pol gobiernu d'Areces que sufrimos los asturianos) y nél amosaba la mayoritaria aceutación de la xente asturiano énte la posibilidá d'una oficialidá de la llingua asturiana (pero claro, como nun-y daba la razón, escondiólu nun caxón pa que naide s'enterara; pero l'estudiu ta ehí pal que quiera miralu). ¡Toma yá!, ¿cómo se come eso?, per un llau, un estudiu de rigor y de dalguién ensin interés políticu (Francisco Llera Ramo, de fechu, ye socialista) defende la oficialidá de la llingua asturiana porque, según comprobó con estudios sociollingüísticos, la oficialidá tien el respaldu de la mayor parte de la población asturiana; per otru llau, el conseyu consultivu diz qu'esiste una parte non pequeña de la sociedá que considera la oficialidá artificiosa. Pero claro, resulta qu'esti últimu nun aporta datos, estudios, encuestes... Suéname más bien a prexuicios. Los prexuicios de siempres y que la FSA intenta facer medrar pente la sociedá.


La conclusión ye qu'esti conseyu consultivu nun diz tola verdá. Ye dicir, diz la «verdá» que-y interesa al gobiernu. L'asturianu tien de ser oficial, nun s'entiende esta marxinación llingüística que sufrimos n'Asturies. El gobiernu incumple lleis (por exemplu la Constitución española) qu'afeuten al asturianu, y nun pasa nada. Como pasa col gobiernu, esti conseyu consultivu primó los sos intereses y prexuicios penriba de los intereses de la sociedá asturiana. ¿Dalguién-yos esplicó a los del conseyu consultivu qué ye'l Conceyu Abiertu pola Oficialidá?, ¿o será que nun tienen nin idea?. Y no fondero, que la xente nun sepa qué ye'l CAO ye tamién culpa de los medios de comunicación de mases, qu'afiten na conciencia coleutiva de la sociedá les idees falses y prexucioses de la FSA y esti gobiernu. Y esto amuesa tamién, bien a les clares, cómo la mayoría de los medios de comunicación de mases («El Comercio», «La Nueva España», «La Voz de Asturias», RTPA) son partícipes d'esti engañu a los asturianos por nun asoleyar estes contradicciones. ¿Cómo nun espeyen la hipocresía del gobiernu? Ta perclara la cosa. Estos medios siguen espardiendo les idees mayoritaries del PSOE y el PP, ensin facer sitiu a informaciones d'altor políticu p'Asturies qu'amuesen les manipulaciones socialistes.


La mayoría d'Asturies sufrimos los prexuicios d'una minoria poderosa, y nun me refiero namás al tema llingüísticu, sinón tamién a otros temes de reindustrialización (¿dónde?, ¿cuándo?), gastu de subvenciones (¿donde?, ¿pa qué o quién?)... en fin, tengolo escrito nesti blog hai tiempu. Ye lo qu'hai. ¿Pa cuándo un gobiernu que piense n'Asturies y non en siguir calteniéndose na poltrona?, ¿pa cuándo espertaremos los asturianos d'esti apigazamientu?

17 jun. 2006

Asturies y el conceutu nacional

Anguaño, delles Comunidaes Autónomes d'España tán en procesu de reforma de los sos estatutos d'autonomía. Delles d'elles tán insertando'l conceutu de «nación» (o deriváu conceutual como «entidad nacional», «nacionalidá histórica», «realidá nacional»...). D'esti mou vemos en Cataluña'l términu «nación», nel País Vascu «nacionalidá», n'Andalucía atopamos «realidá nacional», en Galicia, el PSOE y el BNG (que gobiernen en coalición) pautaron el conceutu de «calter nacional», na Comunidá Valenciana lleemos «nacionalidá histórica», nes Isles Baleares «nacionalidá histórica», incluso en La Rioja, el presidente del parlamentu José Ignacio Ceniceros dixo que se pue definir la so comunidá como «nacionalidá histórica».


Agora bien, ¿qué ye Asturies?, ¿ye menos que La Rioja?, ¿menos que les Isles Baleares? Ta claro que non (ensin enfotu en facer de menos a nengún territoriu), nin ye menos que'l País Vascu o Cataluña por munchu ruiu y tradición política que tengan los sos nacionalismos políticos n'España. ¿Por qué esi enfotu en nomase como «nación» (o pallabra derivada)? Vemos que nun ye namás cuestión de Comunidaes con «puxu» separatista (País Vascu, Cataluña, Galicia), sinón que tamién ye vezu normal en Comunidaes, en xeneral, fondamente españoles (Andalucía, La Rioja, Isles Baleares). ¿Qué quier dicir esto?, ¿pue tener que ver eses deonominaciones cola división de comunidaes de primera y de segunda?, ¿vamos perder la oportunidá de tar allugaos coles comunidaes de primera?


Agora, prestaríame que pensemos na historia d'Asturies y los rasgos culturales propios de la Comunidá Asturiana. Si dalguna Comunidá merez esi nome de «nación» ye la nuestra (anque otres tamién puean denominase asina), esto está perclaro. Cualquier razón anguaño pa denominar asina a Cataluña o'l País Vascu, tenémosla n'Asturies tamién (cultura propia, llingua propia, historia propia, muérganos políticos propios...). Y si esa denominación va a dixebrar Comunidaes de primera de les de segunda, ¿nun deberíemos tar nes de primera?. Nun pretendo «obligar» a naide a pensar nada, anque yo lo tengo perclaro. Namás que se piense y se reflexone. Llueu la decisión ye de caún.

31 may. 2006

¿Dalguién pue esplicámelo?

Llevo unos díes ablucáu, sinceramente, toi que nin duermo. Too escomencipió cuando lleí hai dalgunos díes nun diariu d'ámbitu autonómicu la noticia de que'l gobiernu del PSOE n'Asturies (que ye'l que gobierna en coalición con IX-BpA) quier ufrir sofitu económicu a les families pa que-yos merquen llibros escolares a los sos fíos. Abríeronseme los güeyos y pensé que yá yera hora de facer verdadera política d'izquierdes. Pero ¡ai mamina!, como si d'un suañu se tratare, esperté dándome un gran golpazu cola realidá. Pues resulta que'l gobiernu del PSOE va da-yos dineru (público, de tolos asturianos) a los que tengan ingresos inferiores a 60.000 euros al añu. Sí, sí, lleeron bien, 60.000 euros al añu, que p'aquellos que nun seyan a contar n'euros diré-yos que tamos falando d'unos 10 millones de pesetes. Esto ye ablucante, ¿dende cuándo xente que gana diez o nueve o ocho millones de pesetes al añu va necesitar dineru pa mercar llibros a los sos fíos?, ¿nun se supón qu'esi dineru debería dir pa les families que nun tengan recursos propios, aquelles que de verdá necesiten el dineru?.


Yo, que soi de Xixón, toi, como dixi, ablucáu dafechu. Esti partíu, el PSOE, que se diz d'izquierdes anque toos sabemos que nun lo ye, amuesa una vegada más la poca sensibilidá social. Y amuésala porque nun saben lo que ye'l ciudadanu de clas baxa. Nun s'entiende sinón esa propuesta, que paez más que se ta riendo de la xente probe y en xeneral de tolos ciudadanos.


La conceyala d'educación en Xixón que ye d'IX diz que s'enteró pola prensa y que quedó ablucada (¡menos mal!). Carmen Rúa, la conceyala d'educación en Xixón, yá espuso públicamente la so disconformidá cola midida y espresó la campaña elleutoral que ta entamando'l PSOE, yá qu'anque nun avisara a los sos socios de gobiernu, sí que comunicó la midida a les asociaciones de padres y alumnos (¡enantes qu'a IX!).


En fin, que n'Asturies yá nun sé quién gobierna. Y la xente debería salir a la cai, denunciar esto. O polo menos debería, nun votar al PSOE, por despilfarrar dineru público (¡o peor: da-ylo a los que-yos sobra!). Téngolo dicho yá nun artículu nesti blog, el PSOE fai tiempu que perdió pel camín la «S» y la «O» del nome. Que nun caiga en baxo esto que toi diciendo. Porque esto nun hai quien lo entienda o ¿dalguién pue esplicámelo?

19 may. 2006

La defensa d'un pueblu

Al mundu paez que-y entró la medrana poles decisiones llexítimes d'un pueblu, constituíu como talu, qu'amás ye estáu, constituíu como talu, de querer beneficiase de los sos propios recursos en cuentes de que xente estranxero (europeo) seya quien lo faiga. Toos sabemos, no fondero, qu'esi mundu reaciu que ta echándose les manos a la cabeza ye la minoría elitista que vive como la mayoría namás pue suañar.


Ye dicir, esa minoría elitista ye la que domina los medios de comunicación de mases y les estructures de poder pa poder esparder les sos idees y siguir, cuando-y convién, ababayando la masa social. Y ye sintomático y qu'amuesa una manera de vivir la política na sociedá occidental el fechu de que, cuando Evo Morales taba faciendo propaganda elleutoral y nun yera entovía presidente llexítimu, yá taba glayando al altu la lleva les reformes que, güei, tantu mieu dan a los que más ganen (banqueros, executivos...). Si eso yá taba nel so programa elleutoral, ¿por qué nun s'esmolecieron daquella? ¡Ai amigu!, pensaben que yera ún más, ún d'esos que prometen y prometen y llueu les idees queden pel camín cuando s'apoltronen nel gobiernu. O quiciás pensaben qu'Evo diba cayer nel sobornu. El casu ye que namás altérense cuando tienen efeutos les sos decisiones, non cuando dicíen que diba llevales a cabu. En fin, eso, como dicía, amuesa l'estáu actual de la política n'Asturies (y n'España), que yá damos por fechu que nun van cumplise les promeses elleutorales (equí n'Asturies sabémoslo bien).


Un país, como Bolivia, tien tolos drechos de querer participar nos beneficios que-y correpuenden. Crticar eso ye llamentable y constata'l poder del dineru. El mundu ta fechu de manera tala que pa que unos tengan munchísimo otros nun tienen de tener nada. Bolivia merez salir d'esi pozu y les decisiones d'Evo Morales son un bon entamu, porque nun querer cambeos profundos ye siguir colo mesmo, ye dicir, l'enriquecimientu de los que más tienen (y que nun son bolivianos) en cuentes del trabayu y sufrimientu de los poseedores llexítimos de les tierres.


Hai un artículu, espublizáu'l día 18 de Mayu nel periódicu asturianu «El Comercio» tituláu «Inseguridad jurídica, petróleo y negocios» escritu por Federico Aguilera Klink, catedráticu d'Economía de la Universidá de La Laguna, que convién lleer. Ye un artículu ensin pelos na llingua que vien a confirmar esto qu'escribo y que toos y toes deberíemos lleer. Y recordái, cuando lo lleáis, que ye Catedráticu d'Economía.

8 may. 2006

Los cuadros en Madrid y la cultura asturiana

Lleo con atención los alderiques al rodiu de los cuadros que Carmen Cervera quier preservar (con tol enfotu que munchos quixéramos pa los nuestros políticos) de manera enfocicada. Diz que va negase per tolos moos posibles al establecimientu d'una avenida d'altu tráficu al llau'l so muséu. Nun entamu paecióme too perbién, caún tien el drechu de defender lo que-y pete, por mui estraño y raro que nos paeza a los demás (siempres y cuando nun entre en conflictu con normes morales y llegales). Pero resulta que los cuadros, en casu de facese la vía que tanta medrana-y cuela pel cuerpo a Cervera, van tar dientro un muséu. No fondero, taríen abellugaos del tráficu por bones construcciones que los caltuvieren bien protexíos, de manera tala que los fumos y materies contaminantes taríen controlaes más que nun quirófanu. Nun creo qu'una señora como ella, con tanto amor pa col arte pintao, mirase muncho les perres (más que nada porque les tien y de sobra) nesos menesteres.


Por embargu, vien a la mio mente una obra d'arte, nun digo que meyor nin peor, namás otra obra de arte. Pero que pa min, pa tolos asturianos y pa tolos historiadores, de xuru que nos produz una tenrura especial polo que significa pa una cultura tan desprestixada como la nuestra. Y refiérome a la Ilesia de San Xulián de los Prados en Santullano (n'Uviéu). Pa quien nun lo sepa, trátase d'una ilesia que foi declarada «Monumentu Históricu-Artísticu» en xunu de 1917 y «Patrimoniu de la Humanidá» el 2 d'avientu de 1998. Resulta, como poco, interesante'l por qué de tales denominaciones. Ye esta ilesia la más antigua construcción del prerrománicu y la d'un mayor tamañu, que foi posible por Alfonso II, allá pel sieglu octavu. Destaca dientro d'ella unes pervalioses pintures (decatáivos de los años en que foi construida) con temes inspiraos nel arte profano romano. Arriendes d'estes pintures y de la so arquiteutura, camiento que ye una de les construcciones más emblemátiques de l'arquiteutura prerrománica n'Asturies, yá que ye única na so construcción y estética.


Y agora vien lo vergoñoso. Esta ilesia allúgase na zona de Santullano (Uviéu) y xusto al llau mesmu d'ella atopámonos cola autopista A-66 (sí, sí, lleístis bien, autopista) asina que podéis imaxinar tolos fumos, materiales tóxicos y vibraciones del tráficu rodao (camiones y autocares constantes pasen tolos díes perhí) que representa too ello. Pal que nunca la viera enxamás, dici-y que l'autopista ta a pocos metros de la ilesia, vamos, que sorprende esta cercanía. Pienso entós nos cuadros de la Cervera y de lo que se ta falando pola so protección. Pienso nel error urbanísticu, na aberración que supunxo la construcción d'una autopista al llau de tan históricu y artísticu monumentu (tuvi cinco años de la mio vida viendola tolos díes cuando estudiaba y l'autocar pasabe delantre d'ella enantes de que me posara pa dir a la facultá). ¿Ónde tán les responsabilidaes polítiques d'esti agraviu a un interés artísticu ya hisóricu de toos (non solo asturianos)? Ye una pena que pa lo nuestro, pa la nuestra cultura ya historia, tengamos tan pocos güeyos y enfotos. Y que veamos cómo los demás defienden les sos posesiones artístiques (por cierto, movibles) mentanto n'Asturies ta asocediendo'l xenocidiu d'una cultura que namás va quedar en cuatro pallabres nos cartelos de les fiestes de práu. Que nun tenga visto artículos (nos periódicos) faciendo tala comparanza (ente los cuadros de la Cervera y la Ilesia de Santullano) ye una pena, porque significa qu'asumimos estos errores como vezos normales n'Asturies, como resignación énte polítiques vergoñoses. Yá que nun vamos poder arreglar esta pergafa decisión política n'Uviéu, polo menos nun escaezamos lo malo que se fizo too. Pensáilo durante toos estos díes en que tantu bombu se-y ta dando (y se-y dará) a la polémica avenida al llau del muséu de la Cervera.

Himnu del Principáu d'Asturies

Asturies, patria querida


Asturies de mios amores,


¡Ai, quien tuviere n'Asturies


en toes les ocasiones!


Tengo de subir al árbol


tengo de coyer la flor


y dá-yla a la mio morena


que la ponga nel balcón.


Que la ponga nel balcón


que la dexe de poner


tengo de subir al árbol


y la flor tengo coyer.


(Testu asturianu que foi aprobáu pola Xunta Xeneral del Principáu d'Asturies nel so conceyu plenu de 17 d'abril de 1984)

6 may. 2006

Semeyes de la Manifestación pola oficialidá

Equí dexo dalgunes semeyes de la manifestación pola oficialidá. Dalgunes nun tan mui bien feches, pero pa dase una idea creo que valen.




Esta primera semeya ye un cartelín amestáu nuna bandera d'Asturies que llevaba un paisanu vieyu. Caún protesta como-y dea la gana.




Esta ye del entamu la manifestación.




Nun podía faltar la nuestra Pita, esa que-y debe quitar el suañu a Areces.




La manifestación entamó y los glayíos nun tardaron.




Prestóme ver lleende urbanes. Yeran reconocibles pol cartelu que dicía «Urban Myth, thanks Mr Areces. Lleenda Urbana, gracies Sr Areces». Un saludu pa toos y toes (a los que tuviestis y a los que nun pudistis).




Nun se ve bien pero sirve pa ver el mogollón de xente qu'había.




Como la otra anterior.




Paez que non, pero la manifestación foi llarga.


En xeneral unes dos mil o tres mil persones. Tampoco nun eché la cuenta nin tuvi per tola manifestación. Quédome con que faltó muncha xente que de xuru nun pudo venir. En cualquier casu, la oficialidá de la llingua asturiana ye un drechu al marxe de cuánta xente glaye o non. ¡L'asturianu, llingua oficial yá!.

28 abr. 2006

Oficialidá de la Llingua Asturiana

Quiciás, el pilancu más importante pa la nuestra llingua asturiana ye'l de la non reconocencia de llingua oficial na nuestra Comunidá. Ye yá hora de glayar toos y toes con fuercia. Yo intentaré sacar dalgunes fotines pa poneles llueu equí.


18 abr. 2006

Más de lo mesmo

Resulta qu'ún se pon tranquilamente, con tola pachorra qu'esta vida-y dexa, a lleer el periódicu y ensin querelo llévase un sustu que ye cuasi pa ingresar nel hospital d'un ataque cardiacu. El casu ye que la noticia ye qu'Areces va volver a presentase a les próximes eleiciones. Home, esto avísase. Areces va volver a presentase, dempués de nun sé yá cuántes llexislatures faciendo de les suyes, primeru nel ayuntamientu de Xixón y llueu nel gobiernu d'Asturies.


Paez qu'a la FSA (esi ente socialista represor de tou tipu d'asturianía)-y paez bien. Siempre me llamó l'atención esa xente que nun tien mirada crítica pa ún mesmu, que nun sabe lo que ye l'autocrítica. ¿Qué hai de les lleendes urbanes?, ¿qué de la xente mozo que tien d'emigrar (como'l mio hermanu) pa fuera d'Asturies?, ¿qué ye de los fondos mineros?, ¿ónde tán les perres qu'aportaron dende fuera pa reindustrializar les zones mineres?, porque como nun se fizo nenguna industria alternativa ¿en qué se gastaron les perres?, ¿qué ye de la llingua asturiana?, ¿por qué'l gobiernu nun cumple les lleis qu'hai y qu'abelluguen la nuestra llingua?, ¿qué hai de la ecoloxía?, ¿qué pasó cola empresa que diba atopar oru nel occidente asturianu?, ¿que ye de la incineradora que tien el rechazu de toa Asturies?, ¿que ye de l'autovía del cantábricu, qu'entovía se ta faciéndo?, ¿qué hai de potenciar más l'aeropuertu d'Asturies?, ¿y de la promesa de quitar el peaxe pa salir d'Asturies?, ¿y de los atentaos escontra'l paisaxe asturianu y les urbanizaciones que-y peguen taragañazos a la llei de costes?, ¿y del hospital de parapléxicos nes cuenques mineres?, ¿nun podría ser esi hospital de parapléxicos una bona inversión de futuru pa zones ensin futuru?, ¿y qué ye eso de poné-y a un parque pa xugar los rapacinos el nome d'un alcalde franquista en La Felguera, por decisión del gobiernu socialista qu'ehí gobierna?, ¿ye eso de reivindicar nomes franquistes propio del socialismu obreru? (espléndidu l'artículu espublizáu en La Nueva España'l día 14 d'abril tituláu «Un parque franquista» escritu or Elizabeth Felgueroso)...


En fin, podría siguir pero meyor dexalo ehí. El casu ye que naide s'entruga por too eso. Naide na FSA paez que vive n'Asturies. Bono, yo creo que sí lo faen, sí hai xente que s'entruga por eso y ye socialista, pero tienen cargos y un bon llugar y tienen mieu de perdelos si falen escontra los que tán p'arriba. Entós, nesta circunstancia, yo entrúgome por qué volver a repetir cabeza de llista con Areces, si ta perclaro que la so llexislatura foi nefasta. Y aporta a la mio tiesta el verdaderu ser de la política nos dies que cuerren anguaño: algamar poder y nun soltalo. Van volver a poner a Areces porque ye'l que más confianza paez que tien ente los sos votantes, ¡¡pero non porque lo ficiera bien!!. Lo importante, aldovino, ye aparentar.


Resulta, a la fin, que si gana'l PSOE vamos siguir colo mesmo. Cola política desatrosa que llevamos sufriendo n'Asturies dende va munchu tiempu. Una política que namás mira polos que tán nel poder. Una política que nun sabe lo que ye la realidá asturiana. Que s'avergoña de lo que ye la identidá asturiana, porque val más paecese a Madrid. N'Asturies, hai opciones polítiques abondes, el problema ye que nun-yos dan pesu nos medios de comunicación de mases, nos que tienen tirada en tola autonomía y que tán escritos en castellanu. Y paez que na conciencia de los asturianos ta'l bipolarismu políticu: o PSOE o PP. Oxalá que los asturianos nos deamos cuenta de que nin PP nin PSOE ye lo que necesita Asturies. Como yá tengo dicho per dalgún lláu, el problema n'Asturies ye que se ye más fiel a unes sigles (un partíu) qu'a unos ideales. Porque, colos fechos na mano (o meyor na hemeroteca) reto a cualquier socialista a que m'amuese qué tien de socialista y d'obreru'l PSOE. Eses lletres fai tiempu que argayaron del nome del partíu.


Voi permitime dar un conseyu pol bien d'Asturies, que caún vote en coherencia coles sos idees, non en coherencia coles perres que ganaría si votara a esti o a aquel otru partíu. Decatáivos qu'Asturies necesita un cambéu, esto nun pue siguir asina. Porque siguir asina ye más de lo mesmo.

3 abr. 2006

La güeyada de la mio gata

La mio gata yá tien dellos años d'esperiencia pente'l mundu del ser humano. Ta acabante facer unos nueve añinos y camiento que, no que tien de vida, ye más llista que lo que podamos ser les persones coles que vive. Paez mentira pa un ser con una mente (supongo) más cenciella que la nuestra lo rápido qu'entiende les coses. Dende un puntu de vista conductista pue paecer fácil d'entender el procesu pel cualu'l mundu queda asimiláu pente les neurones gatunes. Namás ye una especie d'esperiencia tres d'otra, y d'ehí va sacando les coses positives y les negatives, repitiendo les primeres y evitando les segundes.

Pero hai qu'amestar a esto'l fechu de que la mio gata (supongo que tolos demás tamién) davezu te mira con carina picarona, y aldovíno-y dacuando una especie de sonrisina nel fociquín. Pienso entós si tendrá sentimientos, si sabrá y gociará de lo que ye la felicidá, si se pondrá triste por coses asemeyaes a les nuestres, si toa esa bayura de sentimientos (dende la tristura o señardá, hasta'l gociu y felicidá dafechu) tendrán llugar nel so corazoncín, tan pequeñín él.

Quiciás soi yo'l que-y otorga esti paecer, el que quier creer que tamién «piensa» como podamos facelo nosotros. Acaríciola y falo con ella como si fuera una persona (tolos que tenéis mascotes sabéis a lo que me refiero), que no fondero, ye una forma de falar con ún mesmu.

Pero lloñe del conductismu, nesti casu creo más en daqué místico, en daqué poco esplicable. Y non por ello menos científico, nun hai más que pensar nel principiu d'incertidume de Heisenberg. Eso pasa colos gatos y animales domésticos, l'observador influi no observao. La mio gata ye como ye, entós, porque ye de mio. ¿O seré yo como soi porque m'agüeya la mio gata?

15 mar. 2006

L'autovía minera, exemplu d'un gobiernu

L'autovía minera ye toa una sorpresa. Al mes d'estrenala, alcuérdome de que yá aparecieren dellos badenes qu'a cientu y picu per hora facian estrapayate la tiesta escontra'l techu'l coche. Cuasi que yera recomendable poner cascu diendo dientro'l coche tamién. Nun pasó nada, punxéronse delles señales avisando del badén. Como si l'avisar d'ello solucionara daqué; vamos, que les señales avisaben de daqué que la xente que davezu agarrábemos l'autovía yá sabíamos, y el bote dibamos dalu igual.


Llueu, coles lluvies (¿qué estraño nesta tierrina, non?) y el mal tiempu apaecieron los primeros argayos, y poro los cortes nos carriles, o desdoblamientos pasando de dos a un carril. Yera daqué sorprendente que nun se tuvieren previstos los terrenos pindios que taben al rodiu los arcenes y de cómo pue influyir la lluvia y los regatos na tierra blando. Pasó lo que tenía de pasar. Que la tierra entamó a cayer hacia l'autovía y, como dixi, los cortes y molesties. Tengo de dicir qu'al menos l'autovía nun tuvo, nin ta, tán saturada como la "Y" asturiana por antonomasia que xune Uviéu, Avilés y Xixón.


Dempués, de tantes vegaes que pasé (que paso) per ella, decatéme en que nos montes y terrenos que s'alluguen a los llaos de l'autovía apaecieron (de xuru que yá taben ehí dende cuantayá, pero yo decatéme hai bien poco) ocalitos, munchos ocalitos, bosques d'ocalitos per toos llaos. Entiendo que pa Navia, onde hai una empresa papelera necesita terrenos de rápidu crecimientu d'árboles y poro, creo, tien tou un bosque plantáu d'ocalitos pa él, onde van rotándose les tales pa permitir que mentanto talen nun llau, n'otru llau medren los árboles. Los ocalitos, equí, son fundamentales porque tienen un rápidu desendolque vital y crecen mui rápido. Lo que nun entiendo, ye que fuera d'estos márxenes acotaos y que tienen una bona razón d'esistir, haya ocalitos. Ye dicir, nos terrenos públicos (quier dicir de toos alministraos pol gobiernu del Principáu) plantáronse (porque daquién tien de facelo) ocalitos y enllenen, como l'espaciu de l'autovía minera, munchos llugares asturianos. ¿Cómo se permite eso?, ¿cómo ye que se permite y favorez dende l'alministración la plantación d'un árbol non autóctonu?, ye más, ¿cómo se permite dende l'alministración la plantación n'espacios públicos d'un árbol (non autóctonu) que ye amás nocivu pa les demás plantes (ye dicir, nocivu p'árboles autóctonos)?. En fin, una vergoña. Ta claro que los carbayos, les fayes, castaños... son árboles que tarden más en nacer, pero ¡cóime!, ¿nun ye eso parte del paisaxe asturianu?, ¿nun debería protexese precisamente por ello?. Interesante ye'l llibru tituláu Tecnología, Ciencia y Sociedad, una introducción al estudio social de la ciencia y la tecnología, escrito por dellos autores; y concretamente'l capítulu tituláu «Participación pública en política tecnológica y ambiental: el caso de la política forestal en Asturias». Paga la pena lleelu, perbonu estudiu fechu por dellos profesores universitarios y catedráticos d'Universidá.


Esto, dende'l mio puntu de vista, amuesa una manera de facer política: fáense les coses ensin tener en cuenta Asturies y les sos especifidaes (o quiciás van quedándose euros pel camín y a la fin de dalgún llau hai qu'aforrar), nun hai respetu pola cultura asturiana nin ganes de facer nada si nun va dar votos (ye dicir, si nun-yos facilita siguir na poltrona chupando perres).


Reflexón final. Esta autovía minera que xune Mieres y Xixón, según sales d'ella en Xixón, llévate hasta un sitiu onde tan construyendose munches carreteres, enllances d'autovíes y la madre que me parió. Daqué enguedeyao que de momentu namás entienden cuatro inxenieros pero que ta tomando pinta d'un monstruu urbanísticu. Nun digo que nun seya necesario too eso, de xuru que va meyorar les comunicaciones y va facilitar a los conductores los trayeutos a siguir. Pero visto que l'autovía, cuantes más conduzo per ella, más tristures y pesares m'ufierta, pienso qu'esti gran nudu d'enllaz ente delles carreteres principales en Xixón va traer daqué negativo qu'amestar a lo dicho. Namás digo que xusto al llau de toa esta construcción, onde hai unes cases con ganadería (según sales de l'autovía, en Xixón, a la drecha) hai, si vos fixáis, un horreu y una panera (anque creo que tien ocho pates, non seis). Namás pueo dicir ¡virxen de la cueva, que se quede too como ta!.

3 mar. 2006

asturiar

asturiar: 1. v. tr. Tener un sentimientu de señardá por daquién (o daqué) que se conoció (Asturió los años mozos). 2. Escaecer daquién la so propia cultura (Los aboríxenes americanos tán asturiando por culpa'l capitalismu). 3. Paecese o asemeyase a dalgún aspeutu tradicionalmente asociáu a Asturies (La torre Eiffel asturia un castillete mineru)


[Más aceiciones encamentaes a l'ALlA pa la so inclusión nel so próximu Diccionariu de la Llingua Asturiana pues atopales na categoría Diccioesfoyaza]

21 feb. 2006

Lliteratura y l'asturianu

L'asturianu, toos sabemos, nun tien los mesmos drechos llingüísticos que'l castellanu y d'esti mou s'arrequexa la nuestra llingua. Con esti paisaxe ye perdifícil qu'haya xente llector, más entovía escritor.


Amás, nesta tierra mía tan querida y que tanta murnia alluga nos güeyos cuando pienso nella, dase daqué que nun creyo que seya mui bono. Hai un enfotu, pa sofitar la llingua, dende ciertes estayes polítiques en subvencionar y asoleyar lliteratura n'asturianu. Esto ye mui bono, pa compensar esta desigualdá que sufre l'asturianu con respeutu'l castellanu, pero nun podemos quedanos namás neso. Refiérome a qu'hai muncho enfotu n'espublizar (en crear autores) pero nun veo'l mesmu enfotu en crear llectores, en crear una demanda real de llibros. Resulta, a la fin, que la masa llectora ye la mesma que la qu'escribe. Nun digo que tola xente que merca, o mercó, dalgún llibru (o sacólu de la biblioteca; ye un error midir la capacidá llectora d'una sociedá namás polos llibros vendíos, creo qu'ha de tenese en cuenta tamién l'afilición a biblioteques y el númberu de llibros mediu que saca cada usuariu; nun hai qu'escaecer que munches vegaes, sobre too n'Asturies, les families nun puen permitise gastar perres, y muncho más si les puen aforrar diendo a les biblioteques públiques y gratuites), pues como dicía, de xuru que hai xente que nun escribe y llee lliteratura n'asturianu, pero creo que muncha xente ye la qu'escribe y amás (se) llee.


Como digo, creo qu'hai un escedente de lliteratura que nun correspuende cola demanda real n'asturianu. ¿Ye eso bono?. Home, creo qu'eso nun debe perdese, creo que debe caltenese esi sofitu (hasta la llegada de la oficialidá) pero tien d'acompañase con midíes pa crear llectores, entamando dende los más rapacinos hasta los pas. Tien qu'atendese más a la creación d'habitos de llectura n'asturianu. Na escuela l'asturianu ta como ta, yá lo sé, pero amás de clas de «llingua asturiana» debería haber otra que fuera «lliteratura en llingua asturiana». Supongo qu'eses dos asignatures de les que falo tan axuntaes nuna solo agora mesmo, y que los maestros y profesores d'asturianu faen malabarismos pa falar de tou un poquiñín ya intentar dignificar una materia ensin prestixu social.


En cualquier casu, too son suposiciones. La única solución ye la oficialidá (y a ver). El mio plantegamientu ye que la lliteratura n'asturianu nun pue tener como motor la subvención, sinón la demanda real de lliteratura. Esta demanda tien de crease, fomentase dende les instancies polítiques y pedagóxiques afayadices pa ello. Quiciás soi mui agorero, nun lo sé, pero la llaceriosa situación n'Asturies nun ye pa pensar lo contrario.

2 feb. 2006

Sobre un Partíu Español

Pues nada, dempués de lleer les declaraciones del secretariu xeneral de la FSA (ye dicir, Federación Socialista Asturiana, que de Socialista yá me diréis qué tien) y de les últimes de la Conseyera de Cultura del Principáu d'Asturies Ana Migoya, nun pueo más que quedar enforma ablucáu.


Pa entamar, hai tiempu que vengo pensando qué tien el PSOE (falando, polo menos, n'Asturies) pa siguir calteniendo les sigles que tien. La «S» perdióla nun sé cuantayá y ensin ella nun tien sentíu, tampoco, la «O». Ta perclaro que'l PSOE ye un Partíu y que ye Español, lo primero porque fizo los trámites afayadizos pa presentase a unos comicios (talamente como lo faen les Asociaciones pa rexistrase como Asociación oficial y poder gociar de les ventayes y obligaciones que-y otorga l'alministración) y lo segundo porque fala perbién l'español (o castellanu) y nun fai más que mirar pa Madrid.


Pero al marxe de la verdadera filiación política según les calces que marquen les sigles del partíu. Ye ablucante, como entamaba, escuchar les declaraciones de los ¿socialistes? que tan nel poder. Lleguen a dicir que la oficialidá de la llingua asturiana ye una imposición. Y dempués de tala babayada quédense tan contentos. Y lo que ye peor, nel so puestín bien pagáu n'alministración. ¿Cómo unos políticos s'atreven a falar de cuestiones filolóxiques o sociollingüístiques ensin sofitos de filólogos o sociollingüístes?. Ye dicir, si yo soi político y quiero facer una autovía, nun pueo dicir que l'autovía va pasar per onde me dea la gana, sinón que tengo que tar avaláu por inxenieros, topógrafos, urbanistes y pue que por xeólogos. Namás conociendo les opiniones d'estos espertos nel tema y siguiendo les sos valoraciones y propuestes, pueo yo escoyer la meyor solución. Pero equí non, equí unos políticos, ensin conocimientos de filoloxía nin de sociollingüística, dicen lo que piensen, apurriendo de pasu tolos sos prexuicios ya inorancia al ciudadanu. Y esto namás pasa equí. Y queden tan contentos, como dixi, nel so puestín. Lo peor ye que tienen nel so poder encuestes sociollingüistiques y un estudiu de valoración de la cooficiliadá que son positivos. Ye dicir, que tan al favor de la oficialidá del asturianu y sofítanla. ¿Cómo ye eso?. ¿Nun-yos cae la cara de vergoña?.


Nun ye por nada pero IX-BpA yá pue dir espabilando. Digo IX-BpA porque tan nel poder en coalición. Anque si yo fuera ellos, hai tiempu que tuviera rotu'l pautu de gobiernu. N'Asturies y en Xixón. Caltenese al llau de talos babayos (nómolos asina poles babayaes diches, ye dicir, polo de dicir que la oficialidá ye imponer) nun fai más que desprestixar un/os partíu/os qu'aspiren y prentenden ser d'izquierdes. Quiciás yá lleguen tarde y tuvieron más de la cuenta sentaos ehí al llau, quiciás debieron marchase enantes. Nun voi ser yo quien-y quite la razón a quien diz qu'IX morrió cuando marchó Julio Anguita.

22 ene. 2006

¿Sindicalismu vivu?

Ye increyible. Lleí l'otru día qu'Hunosa, esa empresa minera de toos conocida, rebaxó la plantilla llaboral más de lo que tenía pensao. Y comémonoslo asina, ensin un cachu pan y culete pa qu'esboligue meyor pel gargüelu. Ye llaceriosa la situación llaboral n'Asturies, onde les grandes empreses y multinacionales (lléase tamién Aceralia del Grupu Arcelor) faen lo que-yos peta col corporativismu de l'alministración asturiana. Pero hai que dir un poquiñín más p'allá. Más llacerioso entovía que la situación llaboral (sobre too onde más perres se mueven, ye dicir, nes empreses más poderoses, como éstes que nomé) ye la defensa organizada de los trabayadores (nin dicir tien que quien más sufre esta desproteición llaboral y esti recorte de drechos ye la clas trabayadora, la que ta embaxo too, la que fai'l trabayu sucio pa la meyora económica de los de siempre).


¿Cómo ye que n'Asturies nun haiga un sindicalismu seriu?, ye dicir, ¿cómo ye que n'Asturies nun haiga un sindicalismu?, porque los sindicatos qu'anguaño hai son pa rise si nun fuera poles pergafes consecuencies que tienen pa toos. Ta perclaro (y ye daqué percenciello de ver pa cualquiera que viva n'Asturies al rodiu les zones mineres) que los fondos mineros nun s'usaron pa lo que se deberíen. Que los mandamases políticos y sindicalistes callen como afogaos y firmen vergonzosos pautos, vendiendo los ideales sindicalistes y, de pasu, Asturies. ¿Cómo ye que n'Asturies, los sindicatos firmaren los pautos polos que se vendieron puestos de trabayu?, ¿cómo ye que nun planteguen propuestes d'industrialización o una rede industrial alternativa pa la minería?, ¿de qué van vivir les zones (güei) mineres cuando'l carbón muerra?


Yo veo que'l sindicalismu morrío. Y danme noxu toos esos «líderes» sindicales qu'agarraron el sillón y los cuartos y nun los suelten. ¿Ónde se vio que cobren lo que cobren y pa encima nun defendan como debieren los intereses trabayadores?.


Y vuelvo al entamu. ¿Cómo ye que nengún sindicatu obreru o mineru se decatara de qu'Hunosa fizo lo que-y petó?, ¿cómo ye que nun glayaron pa protestar?. En definitiva, el sindicalismu, los principales sindicatos, son una vergüenza n'Asturies. Una tierra d'histórica tradición trabayadora y proletaria. Oxalá los trabayadores mandaran a la mierda los sos carnés de filiación sindical. ¿Nun veis que los sindicatos nun faen nada?, ¿ye normal que s'imcumplan davezu los pautos perxudicando a los trabayadores?, ¿ye normal que nun se denuncien?.


Que Tini Areces militó nel PC sábelo tol mundu y mirái en qué terminó. Y tol mundu tien drechu de camudar de chaqueta cuando-y pete, nun digo que non. Pero ye sintomático que tolos que lleguen a ciertu poder (seya políticu o sindical) escaecen los sos entamos proletarios. A mio pá nun-y pueo nomar el nome de Tini, porque él (mio pá) tamién simpatizó col PC y tuvieron a la vera en reuniones y manifestaciones. Y toos tamién, un poco qu'escarbayemos, sabemos de casos paecíos, de cómo se vende la xente.


Anguaño nun creyo nel sindicalismu. Oxalá dalgún día puea volver a creer. Polos trabayadores. Por Asturies. De momentu, creo en persones, n'amigos (dalguna tuvo un tiempu na probitú guatemalteca p'ayudar) y pa ellos sería, de xuru y ensin duldes, el mio votu.

15 ene. 2006

Pente'l borrín de la memoria

Pues pasóme qu'ayeri foi un d'esos díes nos qu'a un amigu-y salen les coses bien. Nun sé si llovía, dame lo mesmo, tampoco m'importó'l IPC, nin les coses per Oriente mediu, nin les babayaes polítiques que toi avezáu a escuchar nesta tierra mía. Escaecí, per unos momentos, les caxigalines que nos afueguen día tres día, y centré la mio atención nesi xestu de bon home que ye, neses pallabres enllenes de nerviosismu, neses güeyaes que tornaben a la so infancia, nesi pechu onde cuasi nun-y cabe'l corazón de lo grande que lu tien.


El casu foi qu'asocedió too talamente como, hai años, quixi suañar yo. Les coses salíen-y bien al mio amigu. Y ellí tábemos tolos sos collacios, con él, pa sofitalu en tolo que fuera, pa da-y ánimos y participar del so gociu. Yera'l so día. Dempués de tantu tiempu esperando, a la fin parió un fíu. Yá tenía ún de carne y güesu, de nome Pablo y tou un personaxe enllenu tenrura y cariñu. Pero esti otru fíu del que falo yera distintu porque yera un fíu nacíu pente'l borrín de la memoria y pente'l que val la pena adientrase y perdese un ratín. Prometo, yo que lu tengo nuna estantería de la mio habitación, agarralu dacuando y echa-y una güeyada. Ye una forma de sentite cerca, amigu.

8 ene. 2006

La RTPA entama

Ayeri, como toos de xuru sabéis, retresmitióse'l partíu ente'l Sporting de Xixón y el Ferrol pela canal autonómica. Esa que tien como logotipu una «a» que fueron a diseñala n'Inglaterra, como si n'Asturies nun hubiera bones empreses diseñadores, o persones capacitaes; porque qué queréis que vos diga, pa facer el diseñu que ficieron tampoco me paez que ficiera falta salir d'Asturies. En fin, seya como fuere, el casu ye qu'ayeri tuvieron tresmitiendo'l partíu de fútbol esi.


Yo tuvi mirandolu un ratín. Y si vos digo la verdá, nun lu miraba pol interés que podría tener dalguién que fuera de Xixón (que lo soi), sinón que lu taba mirándo cola ilusión d'alcontrar una alegría. Pero nun tuvi alegría tala. Ye cierto que taba esperando un poco de llinga asturiana, que punxeren cartelos, que ficieren comentarios n'asturianu, pero nada. Quedóse too nun partíu más, abondu ramplón.


Nun entiendo, si lleemos l'Estatutu d'Autonomía, la Llei de Promoción y Usu del bable/asturianu y amás-y sumamos el Plan de Normalización Social de la Llingua Asturiana del gobiernu que ta nel poder paez que la creación del ente autonómicu asturianu diba trayer con él (como un siloxismu aristotélicu) una importante presencia de la llingua asturiana falada nella. ¿Cómo una alministración va normalizar una llingua (que reconoz qu'esiste y qu'almite como padremoñu asturianu) si nun ye falándola dende l'alministración?, y si esta alministración crea un mediu de comunicación tan poderosu pal averamientu a un estándar llingüísticu, ¿nun vien darréu l'usu de la llingua asturiana de manera importante nesi mediu conociendo la fuerte diglosia qu'esiste nel país asturianu?.


Yo lo que sé ye que como asturianu dame vergoña la política asturiana. Y nun quiero ente autonómicu, que toos sabemos que pa lo que va servir ye pa la manipulación y pal usu del gobiernu de turnu (más entovía sabiendo que van primase na parilla los programes informativos). Namás taría d'acuerdu con una radiu y televisión autonómica si nella tuviera presencia abonda l'asturianu (yá pa mentinos que nos mientan n'asturianu).


Nin siquiera ganó'l Sporting de Xixón. Fuime pa la cama atristayáu.

4 ene. 2006

Nuna serie estatal falan n'asturianu

Mirái per onde. Ayeri encendí la tele y entamaba una serie d'emigrantes asturianos. Concretamente d'ún que viaxaba a L'Arxentina. Y sorprendióme que falara n'asturianu. Nun yera un asturianu académicu, claro, intentaba asemeyase al asturianu espontáneu que la xente de les Cuenques del Nalón conoz bien.


Per un llau, al marxe de caxigalines, que nun tienen la mayor importancia (porque la serie ye una serie, nun pretende dignificar nenguna llingua, namás intenta ser creíble), paecióme interesante sacar al escaparate estatal una llingua arrequexada. Un murcianu, un sevillanu o un valencianu, polo menos, entrugaríanse cómo ye que falamos equí daqué distinto al castellanu (suponiendo que nun conocieran la esistencia del bable; yo yá m'atopé a una murciana de vacaciones per Asturies a la que-y sorprendía qu'equí hubiera una llingua distinta al castellanu, ye más, nun conocía nin la pallabra «bable»), pues como dicía, ye una manera de dar a conocer (o de reafirmar) una realidá llingüística más allá de les nuestres llendes. Pero esti efeutu hai que miralu con cuidáu. Nestes coses, sobre too cuando ta en xuegu daqué político, la xente suel tener memoria selectiva. Lo que ta claro ye que nun van venir de fuera a defender lo nuestro, nin ye esa tampoco la pretensión de la serie. Prestaríame entruga-y a dalgún de los nuestros políticos, esos que namás arrequexen l'asturianu al llugar de lo «folclórico», qué-y responderíen a dalgún que nun ye d'Asturies y entrugue por esa forma de falar. Esa serie, quiciás, más que pa qu'un murcianu, un sevillanu o valencianu conoza l'asturianu (que por muncho que respeten la nuestra llingua, nun dexarán de sentila lloñe y fadrán namás un sofitu moral), sirva pa que dalgunos asturianos comprueben que lo que falen (sienten falar) ye daqué asturiano que nun hai que dexar morrer.


Per otru llau, nun pudi dexar d'acordame de la Madre del Emigrante, más conocida como la Lloca'l Rinconín, escultura de Xixón. Representa, esta escultura, la resignación y la tristura d'una madre que paez que despide a los sos fíos que marchan a facer les amériques. Nun sé si esta escultura, saldrá n'otru capítulu de la serie, pero nun taría nada mal.


No fondero, una serie interesante, porque amuesa lo que dicen tolos estudios filolóxicos y sociolóxicos, que l'asturianu ye una llingua que se tresmitió de pás a fíos nes clases baxes de la sociedá, ye dicir, tresmitióse ente la xente non castellanizao na escuela, la que tenía que buscase la vida no primero qu'atopaba, la que tuvo vida dura y malpenes salía p'alantre. En definitiva, la xente aldeano que nun tuvo poder nin dineru.